除咗好多電車男之外，辦公男樣嘅又有，女仔又有！睇黎呢個動漫都好受歡迎！D人對住個巨型LED Wall喺度狂影，唔知喺度玩緊咩?!
之後去到築地，唔講以為自己番咗香港！因為周圍都聽到廣東話！我地首先去咗場外市場先！
一開波買D簡單野食先啦，買咗串積最鍾意嘅燒玉子！
我不嬲對玉子都冇咩喜好，但都幾香嘅。之後就逐條巷行下啦，終於都算係遊客區，賣D手信類型嘅野唔平，好彩我地之前喺上野已經買夠晒。
之後見到長龍店壽司清又真係好長龍！
之後見到網上好多人介紹嘅「北海番屋」
之前已經爭扎咗好耐食邊間好，但之前網上又見有人介紹「鈴木水産」話1000yen有一大板海膽定食，我又真係想試下係咪真係又平又正嘅好野！網上話佢其中一個缺點係比較難搵，但有GPS就唔係問題啦！
「鈴木水産」唔喺D巷入面，而係喺馬路旁邊嘅一間小店舖。網上嘅人話佢另一個缺點係D人成日黑面，入去之前要諗定自己要咩，對於要食平野，呢D我一早已經有晒心理準備。點知一去到，我發現到個問題係。。。佢得呢個餐牌。。。
都唔知點叫野食好，又唔知D野幾多錢，但見都已經黎到喇，就諗住求其指人地嘅野跟住食啦！
海膽就冇問題嘅，因為好多人都食緊，但積又唔食海膽，其他食客食嘅野佢又話唔啱，雞同鴨講一大輪之後，之後佢就叫咗 "Tuna"，之後黎到就真係黎咗吞拿魚，但係瘦到不行。。。
其實我諗我地應該係叫 "Toro”先啱。。。。不過味道都唔差嘅。
而家個海膽黎到並唔係想像中多到要跌出黎，大概係得半板嘅份量。
係好好食嘅，但食緊嘅時候其實已經知道唔係1000yen，而係2500yen，因為隔離有對台灣情侶叫野食嘅時候又係雞同鴨講，之後見到師傅用計數機篤俾佢睇。之後再睇番出面個餐牌，佢又的確係寫住"Uni”係2500yen。照計通漲都冇理由漲得咁誇架？我估可能係唔同品種嘅海膽啦。。。總括黎講，佢個味道係OK嘅，但因為坐得唔係好舒服，我俾呢個價錢應該可以喺其他食店坐得舒舒服服咁食，所以如果佢之後都係2500yen的話，就唔建議喇！
好快食完之後，我地就繼續喺場外市場度行喇。黎到都未食過燒鰻魚，買一串當過下癮啦，不過其實鰻魚都應該係要送飯先啱feel。
之後我地見到「松露」玉子燒，今次叫咗海苔同辣味。
我地食緊嘅時候見到對面有一間賣玉子燒嘅排晒長龍，但連最鍾意食玉子燒嘅積都覺得夠皮喇！XDDD
之後見到隔離有一檔賣芒果，勁甜！佢切到靚靚咁一盒盒賣，好聰明，如果佢係成個成個咁賣，一定唔會有人幫襯！
之後我地行入去室內嘅市場，買咗盒拖羅刺身，本身間舖頭都冇人，我地一買完之後就勁多人行過黎買。
食完再行個圈，見到有好多隻燒帶子！好鮮甜！
本身想試埋生蠔，但淨係見到一兩檔有得賣，但又冇人幫襯，諗住再睇下有冇其他檔，之後都唔再見到有喇，所以就冇食到lu～但其實可能我地一行埋去買又引到好多人黎幫襯！
之後我地行埋過去場內市場，因為我地唔係朝早黎，所以拍賣嗰D場面已經唔會睇到喇！本身出面都冇咩人，就好似一個落咗場嘅街市咁
但一行到入去幾間長龍壽司店嘅門口，嗰D咩壽司大，大和壽司等等，門口打晒蛇餅！！
你問我，我就真係唔會排囉，排咁耐先食到，終於食野除咗講究個味道，心情都好影響，排咁耐都唔荒入到去個心情會好舒暢。。。可能係咁注定我食唔到好野啦！哈哈，不過真係唔可惜！
但其實，我真心覺得美登利壽司已經好食到不得了！又唔駛排長龍，相對地仲平過築地！如果有機會再黎東京，我諗已經唔需要再黎築地，encore幾次美登利就夠晒皮！
之後我地就出發去池袋喇，去池袋嘅目的都係食！今朝食完我最愛嘅魚生飯，跟住就到積最愛嘅拉麵喇！就係好多人推介嘅～～～～無敵家拉麵！
去到見到條龍都唔短，我就當然唔會浪費排隊嘅時間啦，即刻周圍搵下有冇地方可以去泵奶，行過隔離就見到有個商場，於是就留番積喺度排，我就拿拿臨去做野喇！當我番到黎嘅時候就到見啱啱好到，原來已經到咗幾個，因為我未番黎所以唔入住，都算係時間啱啱好啦！
我地叫咗「肉玉麵」同 No.5嗰款，話係加咗蟹黃，又真係有D特別嘅香味。佢塊紫菜都印咗名架！
叫咗之後發覺原來多麵係唔駛加錢，但叫替玉就要加錢，本身仲好後悔！不過好彩冇叫到，可能今朝都仲未落格，一碗都差D食唔晒！
講番味道，個湯頭係好濃嘅，麵質方面佢係粗身嗰款麵，我個人比較鍾意幼身嘅多D，所以反而我覺得我地第一日求其入去食嗰間博多拉麵仲好食！不過佢價錢又唔係貴，D食評又咁誇張好食，試下都無妨嘅。
食完之後，我地仲有少少時間，諗住最後衝刺去多次藥妝店。嗰日去上野去咗OS Drug，諗住番轉頭之後又懶得行，但記得佢D野係平D，所以上網睇下佢仲有冇其他分店，搵到新宿有兩間，反正我地都要番新宿拎行李，就坐車番新宿先行喇！坐車嗰時見到有D小朋友好可愛！
新宿呢間OS分店細D，貨唔算好齊全，不過又真係平D嘅，個格局似龍城藥房，而唔係好似其他藥妝咁似SASA卓悅。不過到俾錢嗰下先發現原來無得退稅......所以圍番起個價錢都唔係平咗好多！
住咗新宿咁多日，晚晚都去到好夜先番酒店，想去超市掃特價野食都冇機會。但新宿附近有好多間百貨公司，仲有少少時間，都想去佢個嬰兒部作最後衝刺！點知，新宿真係大到不得了，我地平時行嘅歌舞技町只係新宿嘅一個角落頭......
我地行咗勁耐先搵到小田急百貨，去到之後又搵唔到嬰兒/ 童裝部，點知原來係要去另一座，又行勁遠！其實行到呢到，我地已經差唔多時間要回程拎行李，只不過係唔甘心行咗咁耐都去唔到，死都要上去睇下！終於都去到！
"好彩”佢D野唔吸引，所以真係當係到此一遊就算喇！兜咗個圈就快快番酒店拎行李喇！
比起見到人地拎個大喼仲要手抽幾袋再用格肋底夾住對波鞋嘅人黎講，我地都算輕便。不過。。。。沿途去坐MRT再要行番去位於東京站既巴士站係勁勁勁多樓梯，真係手都斷。。。。都怪之前冇細心認真揀酒店。。。
最後用埋袋入面嘅錢，喺機場食咗成個旅程都未有機會食嘅章魚小丸子作結。。。。
下次嘅旅行應該就會叫做「帶埋阿仔去旅行」喇！
勤勤D戰利品呀～YOHO~~
