懷孕期點滴 (week 1-12 - 膽戰心驚的初孕期)

中獎嗰個cycle，咁啱勤勤好唔好彩地中咗副流感🤦‍♀️未知bingo嗰時，我仲喺醫院同佢陪瞓......結果佢好番之後就到我中咗招。

一直咳到甩肺，第一次去睇醫生，求其去咗沙田間診所，仲要遇著個新手替假醫生，我同佢講我剛剛check到有BB，就淨係開咗D喉糖同panadol d friend ，完全無用。之後突登去搵番馬鞍山嚴洪皓睇，睇咗一次，食咗普通嘅藥都無效，鼻涕又黃又綠咁🤦‍♀️個人簡直沮喪到谷底。有番第一胎就黎生嗰時病到我死死下嗰個無助感。上次就臨尾香，今次個頭開得咁差🙈最後醫生開咗抗生素俾我，話對BB無咩影響，再拖個病情可能仲衰，食咗之後終於都有番D好轉！人生有番希望！

點知喺我人生有番少少希望之際，我又見紅喇🤦‍♀️

我又難逃作小產嘅命運，本身都無諗住咁早講俾公司聽我有咗，就連去shooting我都照去足全日，可能就因為太忙嘅關係，番番下工覺得好唔舒服，去到廁所就見到出事！迫住就同阿姐講咗我個情況，即刻拎埋個電腦就坐的士番咗屋企。

隨即就book咗仁安做個產檢，經歷上一胎作小產去到政府醫院嘅可怕經歷，今次去私家穩陣得多！應該係因為話見紅嘅關係，即日就安排到見張啟斌醫生。因為已經有經驗，所以無上次咁嚇到喊晒口，但都一樣會有去廁所恐懼症，即係一去到廁所就好驚見到有血🙈。

入到去醫生安排照個肚超，已經照到心跳，話可能係有個子宮肌瘤影響到見紅，亦都係作小產。醫生開咗假紙同小白球俾我就叫我好好休息唔好周圍去。由呢日起，就展開咗個一個月home office 嘅生活。

以前我地習慣去邊都一家三口出動，開始要試下淨係爹地帶勤勤去玩喇。記得有次佢地臨出門口，勤勤仲同我講，媽咪你要小心唔好俾壞人捉咗去呀😆

呢段時間斷斷續續都有不同程度嘅見紅流啡，之後一直去番吳崇傑醫生度檢查，佢持續開假紙俾我，我就一直home office 。抽血驗咗nifty，等結果嗰幾日又心急又忐忑，心入面又覺得一仔一女好D，問哥哥又二話不說想要細佬，心入面自己已經有兩套說法，如果係仔有咩好，係女又有咩好😅結果出咗，我地屋企都係持續陽氣太盛，係哥哥想要嘅細佬🤪

經過膽戰心驚嘅初孕階段，即將踏入第三個月就穩定番喇。因為公司搬咗去黃竹坑太遠，所以我去到真係穩定好多先番番公司。因為未夠三個月，好多同事未知我係大肚，番到公司有D同事仲以為我辭咗職😅好不容易終於捱過咗頭三個月喇！

懷孕期點滴 (week 1-5 - BB來了)

一直都諗住生第二胎，但因為要番工嘅關係，都係要工人姐姐幫手照顧，所以諗住等勤勤大個少少易湊D先。終於等到勤勤報到全日班K1，又轉咗份相對穩定嘅工，感覺時機到喇！

之前生勤勤嘅時候都調理咗好耐身體，本身生完之後都好似正常番。點知到計劃再想生嘅時候，D經期又開始亂晒，每日量體溫去計算排卵期見到完全唔係嗰回事，食咗成半年supplement都未有明顯改善，最終的起心肝join咗physical去做運動，做咗兩個月左右，身體好咗，經期都正常番晒🤩 一開始個造人大計，第一個週期就中咗！

因為每日都有量體溫嘅關係，所以一bingo係好快發現。見到有連續16-17日嘅高溫已經覺得似中獎喇！仲記得懷疑自己中獎當日仲係公司annual dinner，我即刻唔夠膽飲酒😅 連續幾日用紅D都深紅，綠D由幻覺控變成實線，BB要來嘅感覺越黎越強烈喇！

等到due day嘅日子，去買咗支clear blue，真係中獎喇！😝

過多兩日再double check，係中獎無誤！🥰

上一胎我個流程係先去普通診所驗孕，之後出懷孕證明先再去睇婦產科同去政府排期，但諗諗下，普通診所都係用驗孕棒，而且都係要俾診金，倒不如直接去婦產科，可以慳番一個步驟。

經過上一胎喺聯合生嘅恐怖經歷，毫不猶豫地我今次係會去仁安醫院生。問咗周邊嘅人搵咩醫生，最後揀咗家姐用過嘅吳崇傑，佢診所喺沙田好方便，診金每次700蚊算正常價錢，相比起其他醫生又唔算難book。

大概Week 5嗰時就去咗吳崇傑嘅診所度做產檢，第一次照就見到個胎囊，吳醫生話只係照到佢間屋，但就未照到心跳，不過都預咗咁早期係未照到心跳架喇，但confirm咗唔會係宮外孕，或者係食詐糊先😅

剛知道bingo呢段時間，係勤勤三歲生日嘅日子，有一連串嘅慶祝活動😜

呢個係同同年同月同日生嘅小朋友去親子餐廳慶祝，當時未知自己bingo，我仲周圍爬來爬去，仲玩咗幾次又快又凳嘅滑梯🙊好彩BB痴到我實一實😁

第一次同勤勤喺麥當勞搞生日會

仲第一次帶勤勤去咗親子戲院睇戲

過咗一個慶生嘅weekend，過多咗兩日，都難逃第一胎作小產嘅命運......番番下工，又見紅喇🙈