可能年紀大左，通宵機完又玩足成日，攰到我地一瞓瞓到10點幾11點！我由做左奶媽之後未試過一覺瞓到咁晏，因為就算唔駛餵仔都要泵奶！間酒店塊窗簾都唔知點解可以咁遮光！日上三竿但間房仲係黑既！起身之後我就梗係要拿拿聲泵奶啦，積就去買早餐，我明明話想食甜野，講到明話係類似pancake, 鬆餅嗰d朋友，點解係買左呢D番黎。。。。。我一路食一路不斷講 “唉，你以前唔係咁架，我話想食嗰樣野，你周圍搵都買俾我食，而家完全漠視我。。。blablablaaaa” 食到一半都忍唔住影低佢留下証據。。。
之後積話廣島燒係甜既，下！？廣島燒喎！大板燒個friend點樣係甜呀？原來佢唔係無心，係個認知能力出現障礙。。。。。我啞了
之後我又問幾多錢。。。我又再啞了。。。。我俾呢個錢做咩唔去間靚靚餐廳坐低慢慢食呀。。。。佢話係喺酒店樓下呢D攤位度買。。。
我開始懷疑呢個人係特登！做到D野錯晒！等我下次唔再叫佢做！
搞完一大輪，終於可以出發喇！已經係點幾兩點，當然要臨時更改行程啦。。。本身諗住參觀完先去食蟹道樂，而家改為第一站就食左先啦！佢午餐平過晚餐好多，一定要午餐時間去！我地揀左去吾棲橋分店，方便之後去晴空塔。出左metro之後行大概5分鐘就到
見到喇！
呢間分店除左有蟹道樂仲有活魚專門店開喺隔離，佢帶左我地去食活魚嗰邊
都好食既，但不至於要番尋味嗰隻，喺香港都食到呢D味咁囉。
食完出到門口見到佢有賣海膽醬，之前積喺太阪買過番黎勁好食！又唔貴，一掃掃左四樽黎走！行番出去先見到個巨蟹招牌原來喺另一邊
都影番張相啦。
都影番張相啦。
之後向住晴空塔方向行，就喺頭先餐廳入口個位影過去可以影到成個塔。之後就沿路行過去喇。。。
終於都到喇，我地無打算上去，所以喺下面影相就算喇。。。
之後就去左隔離個商場行街喇，去左Sanrio專門店買日本限定hello kitty 手信
之後去搵lincoln既朋友鬆馳熊專門店睇下，sorry Lincoln, 媽咪無買野俾你，影張相俾你睇下啦！
之後我地就坐metro去錦系町站既Akachan血拼喇！自從做左媽媽之後，血拼既地方已經變成係嬰兒用品店！真心我喺香港係好少買野俾個仔，一係就有人俾，一係人地送，今次俾個機會我出下血啦！
呢間Akachan勁大，又有得退稅，購物意慾指數直升！不知不覺我諗行左超過兩個鐘！好彩我記得退稅個櫃台開到8點，我發現既時候剛剛搭正8點！9秒9衝過去！日本人真係好準時，剛剛好俾我地排埋條隊！下一分鐘有人行過去已經俾個職員彈鐘！好險 (一額汗)！
一車戰利品！Daddy 積排住隊，媽咪都仲作最後衝刺，不停加野落架購物車！再把握時間去埋泵奶。俾完錢人地都關門喇。。。轉戰去GU shopping ！D男裝好抵呀！積有好多戰利品，又買到人地關門。。。
拎住一袋袋戰利品番番去新宿先再搵食！比較咗好多間燒肉，位於新宿歌舞技町嘅炭火燒肉一町目唔算好多人介紹，但去過嘅都話性價比高，又見幾就腳就決定去呢間喇！雖然係日式燒肉，但佢係韓式嘅style，間餐廳好細，得十幾個位，可能我地都比較夜所以都唔駛等位。
我地叫咗個厚切set，因為餐牌得日文嘅關係，基本上都唔知自己叫咗咩肉，有一款食落好爽，好咗幾舊先知道自己食緊牛舌.......
哈哈！仲叫咗個馬肉刺身，有隻生雞蛋喺上面，積好接受唔到，其實個質感都有D奇怪，不過又真係好想試下，味道一般，志在試下，因為積完全接受唔到嘅關係，而我又食唔到咁多，後期夾硬煎熟佢黎食！
整體黎講都好食嘅，但唔算好難忘嗰隻，試一次就夠！
食完食身油煙味，餐廳門口放左支清新劑俾人噴落D初度除味，又真係好神奇，噴完真係去到D味！今日太晏先出發所以唔夠喉，放低D野喺酒店之後再出去激安之殿堂同藥妝店掃一輪貨先再休息！
沒有留言:
張貼留言