我地今日決定同阿仔梳洗完，俾佢一邊坐車，一邊飲奶，慳番D時間！
我地坐車去到大阪港，今日好好天呀！
又有摩天輪喇！大阪真係周圍都有摩天輪！
之後我地先去legoland，因為之前爬文話太多人會唔俾入，所以第一站去咗呢個悠遊咭回本景點先！
原來個商場都未開，但去legoland就可以入去先。
到咗喇，可能唔係假期，所以又無咩人喎！
阿仔入到去開始warm up下先！
有機動遊戲，不過勤勤唔玩得.......
有個遊戲區，但只可以小朋友自己入去，即係勤勤又唔玩得。
有滑梯！
有大大小小既lego可以砌！
佢自己一個人都要繼續砌 XDDD
幫佢影低佢份作品先
有得寫信，望上去好似有文有路咁，哈哈
玩咗都有成個幾兩個鐘，之後原來另一邊有個坐車射槍遊戲勤勤都玩得架！
仲要無人排隊！
玩咗第一次，原來有得買相，加少少錢可以買多一張，但我地玩緊game嗰時唔知有得影相，所以個樣勁奇怪。反正無人排隊，所以玩多次！
我地記住晒邊個位會影相，點知準備得太好，擺晒個pose之後，Daddy個chok pose完完全全地遮晒阿仔成個人！！
唯有買番頭先呢張........
仲有一邊係D大螢幕喺度，都唔係好知玩咩，勤勤喺度亂撳都玩一餐。
之後見到時間表就黎有4D影院，所以再玩多陣等到夠鐘！
入到去，一開始勤勤都肯自己坐，仲戴埋副3D眼鏡似模似樣，之後睇咗幾分鐘就嚇親，好彩我抱住就無喊，如果唔係就要中途離場喇。我抱住佢，間中驚又要裝下個銀幕。不過其實套動畫係講日文，我地都唔知佢講咩。當俾勤勤有個4D戲院體驗啦！
原來都玩咗成兩三個鐘喇！
搵地方食lunch先，一行出去就見到有間食串燒放題嘅餐廳，價錢又唔太貴，懶得搵就直接入去啦！
每張枱有個小油炸爐，拎左嘅食物自己沾D粉漿加點D炸粉放落去炸！從來都未試過呢個食法，試下都幾得意嘅，但都真係幾熱氣！
去到尾阿仔開始搗亂，掉咗張濕紙巾落個爐度，D油即刻彈晒出黎！好彩無整親喳！
食完出番去，legoland都係冇咩人
食完之後個時間剛剛好可以坐到架聖瑪利亞號
因為係悠遊咭嘅免費項目，所以都幾多人搭，等緊上船嗰時D走難feel，哈哈，睇電影太多！
呢個時候我地收到香港Agent嘅whatsapp，話新請個工人姐姐去到training centre報到喊到眼都腫晒，話唔係普通home sick，一問之下話係佢個仔病得好嚴重........本身個姐姐應該係過兩日要上機，當下我地已經諗如果佢唔黎咁點算呢？當刻個agent仲實牙實齒地話佢一直都好想黎，一定會黎，只係擔心佢嘅情緒問題！而家就到我地情緒有問題喇......好地地去去下旅行俾人嚴重影響心情！
講講下就上船喇。
一上到船無耐勤勤就瞓著咗喇！我抱住佢都幾有屈蛇feel，哈哈！大小人蛇
成程船係遊覽成個大阪港，去到見到環球影城又番轉頭，都要坐成大半個鐘，當坐下休息下，俾勤勤瞓下晏覺都幾好嘅。
成個船程我地基本就係討論如果個工人姐姐唔黎有咩方案，其實所有方案都好似行唔通。。。都係再聽天由命罷啦！
落船勤勤都未瞓醒，仲見到成架船有好多小朋友都瞓晒！真係小朋友午睡之選呀！
之後我地就準備去海游館喇！
喺門口另一邊有人表演雜技
呢個係付費項目喇，悠遊咭只係有少少折扣
帶勤勤呢排最鐘意睇嘅baby shark真實版
成個海游館都幾大下，行到腳都軟，去到後面開始都有D凳俾人坐。
最後呢part可以用手摸下D baby shark，個質地滑潺潺好似石斑咁，有洗過魚嘅應該都覺得無咩特別。
當然阿仔係唔夠膽摸啦。(救我呀!!!)
師奶仔如我，當然唔會放過悠遊咭嘅免費項目啦，又坐摩天輪喇！
呢個係天保山摩天輪，佢有一款係水晶車廂，幾卡車先有一卡係，所以要排隊，普通版就唔駛等！但一樣係唔駛錢，所以我地決定等！
個夜景係好靚嘅，但我覺得水晶車廂同普通應該差無幾，如果趕時間的話我覺得無需要等。
阿仔食柑食上癮！仲要好有條理咁搣落個膠袋度，搣完仲餵埋我地食
坐完之後我地就出發去阿陪野個Q's mall喇！
身為媽媽，去到日本點都要去akachan朝聖喇！好大間呀！上次東京嗰轉買咗好多，黎大阪呢轉之前爹哋又去咗東京做野又買多咗轉，所以其實唔算好瘋狂。但都入手咗好多對鞋啦，番學嘅白鞋仔都買定埋！又買咗好多幼兒調味料！去到呢D位又會諗起舊工人姐姐，再諗起新嗰個都唔知搞成點又有D忐忑不安。。。。
買完之後我地就去咗迴轉壽司攞位，點知成9點都仲勁多人等！
等等下我帶咗阿仔去落一層嘅兒童遊樂場玩，完全無人，我地包場！Q's mall好主打係兒童主題，所以好多兒童設施。以唔駛錢黎講真係好好玩！玩到阿仔唔肯走！俾我半呃半氹終於肯走！
上到去剛剛有位！阿仔食烏冬食得好開心！
食完已經成10點，咁又完咗一日喇！阿仔仲勁有精力自己行去坐車！
沒有留言:
張貼留言