本身我同爹地積就好鐘意去旅行，自大肚到阿仔出世之後，去旅行嘅機會已經買少見少。上次掉低未夠半歲嘅阿仔出走東京，全程都心掛掛，已經立心下一次再去旅行時一定要帶埋阿仔去！但帶一個BB去旅行真係要鼓起好大嘅勇氣！搞得唔好，大人盞搞之餘，BB自己都辛苦！
直至到阿仔一歲嘅時候，終於踏出第一步幫佢申請護照，等遇啱平機票隨時可以入手！綜合朋友嘅意見，第一次帶BB去旅行，揀機程短嘅地點就係王道！因為就算佢喺飛機上失控，都係個零鐘頭嘅事！所以一直都打算第一次帶阿仔出走嘅地點就係台灣！終於就俾我遇到HKexpress嘅花蓮機票優惠 (明明撳嗰時係好平，但唔知點解加晒行李，又加錢揀指定座位之後，兩個大人一個BB都要成3千蚊，都唔知可唔可以叫平機票?!)
帶埋BB去旅行要準備嘅野當然比平時多，第一樣好重要嘅就係一架可以平躺又容易接合嘅BB車！呢個真係好重要！好重要！好重要！可以平躺嘅BB車，令阿仔成個旅程瞓覺都會舒服好多，仲可以隨時隨地喺車上換片，因為去到D旅遊景點真係唔會冇啦啦有個換片台出現喺你面前！坊間出好多聲稱可以接得埋上飛機嘅BB車其實真係冇需要，因為你帶BB車上飛機，係可以去到閘口先俾架車地勤人員幫你寄倉，到拎行李嘅時候就可以拎番，係完全冇需要自己接埋拎上機！
我地幾餐飯都可以咁舒暢咁撐枱腳都係靠佢！
第二樣就係行李喼喇，以前就話你一個我一個喼，自己推自己嘅。而家帶住阿仔，一個人要推BB車，另一個人就要拎行李，一個人推兩個喼都幾輪盡，於是我地就買咗一個大喼，一次過裝晒一家三口嘅行裝！但後來發現，一個29吋嘅喼，裝夏天衫就啱啱好，如果冬天可能都窄窄地！因為淨係阿仔嘅尿片同食糧都佔咗半個喼.......不過好在呢D都係消耗品，即係話我地回程嘅時候就會有呢D位裝手信喇！
我地係坐下午兩點幾機，即係十一點零鐘就要出發喇，所以前一晚我地已經要執定晒D行李，第二日十點零鐘我地就帶埋勤勤去樓下食個老麥早餐先！好似第一次同勤勤去老麥堂食，原來張BB凳都幾好坐，之後去買定袋包包俾佢就出發喇！
今日係七一，我地去機場嘅途中原來遇正習主席坐飛機番祖國，沿路都勁多警車，又封路，搞到勁塞車，我地坐咗成兩個鐘巴士.......
去花蓮嘅機程都唔駛咁耐！好彩我地本身預早咗！但勤勤坐到一半已經瞓著左....本身諗住等佢上機先瞓...但佢自然熄機真係阻都阻唔到佢......！
check in完之後，我地就快快手去食個午餐先！本身好多時間淨，但塞一塞都有D趕！勤少又好有興致食呢個越車湯河，佢又快唔黎，搞到我都焦急上黎！
不過勤少食得勁happy！
過咗關之後，要坐好多架無人駕駛列車去個登機閘口
坐到一半嘅時候已經見到最後召集 (但後尾發現佢應該係一開始登機已經出現最後召集) 之後真係用跑嘅去到個登機閘口，唔好話想喺個登機牌前影張指定合照，就連幫阿仔換片嘅時間都冇！但我地去到原來都唔係最遲，因為真係要兜好多轉先黎到呢個登機閘口，所以好多人都滾水碌腳！上到架接駁車都仲要等埋D人上車 (好後悔無換埋條片)
終於上到架飛機，見到隔離張凳無人坐，即時以9秒9幫阿仔換埋條片，點知條友一換片又喊！心諗咁快失守？！之後一坐好就用奶奶攻勢！果然一吮奶奶就變番隻溫馴嘅小兔仔！
之前聽人講話吸吮嘅動作可以減低起飛時氣壓對BB耳仔嘅不適，所以我一直都諗住等起飛時俾勤勤吮住奶奶。點知等了又等，阿仔吮到瞓著晒甩晒咀都未排到我地架機飛.......仲好驚阿仔瞓飽晒中途就起身扭計，我再如熱鍋上嘅螞蟻好想快D起飛！好彩阿仔幾乎都瞓足全程。
喺最後15分鐘先起身，我地一齊唱下歌，玩下玩具，仲笑到卡卡聲，有驚無險就降落喇！真係一額汗！
到達之後個機場勁細，有個好臨時嘅counter賣電話咭
我地買好之後諗住call車去兆豐機場，點知張咭話要半個鐘頭之後先用得。我地行咗出去的士站問要幾多錢，佢話係睇錶，大概要TWD800-1000，但我之前上網見人介紹call國聲計程車，去遠D嘅地點可以定額收費，之後就去旅客中心問人借個電話黎call車，又真係俾我call到，仲話TWD550就OK，5分鐘後就有車！精明嘅媽媽又發功喇！慳番嘅錢足足夠我買張電話咭！呵呵呵～～～～
去到呢個時候，阿仔已經由香港嘅機場巴士，再到飛機上不停瞓，都心知佢坐的士唔會再瞓！於是就到餅餅攻勢！呢個人真係見到餅餅就開心到暈！
好輕鬆就去到兆豐農場喇！Check in 先！
去到嘅時候都已經差唔多7點，但講好唔趕行程嘅旅程，「本身」幾多點都係無所謂嘅，所以我地好悠閒咁去攞房，好他條咁俾阿仔喺間房度玩陣先
直至我地去到間餐廳........
一去到就見到黑嗎嗎冇人，點知原來已經關咗門！！！先八點就關門！！！？？？個職員話佢前枱有個販賣部，我地於是行去個販賣部，見到得D杯麵.....我地當然心有不甘咁去個reception度嘈佢頭先做咩唔提下我地8點餐廳就會關門blablablaaa…….之後個職員打咗幾個電話應該都係fail….之後話佢地呢邊比較偏僻，附近D餐廳都係收得好早！話佢地真係得番呢個販賣部有泡麵賣，我指住勤勤話「小孩怎麼吃泡麵呢？」之後再話我地頭先黎到都7點，我地都有問餐廳喺邊，應該要提一下我地etc......之後職員個舉動令我團火立刻熄滅......
佢竟然拎咗兩個飯盒出黎話係佢地兩個嘅晚餐，話我地唔介意可以俾我地食.....咁我地當然做唔出食咗人地個晚飯啦！之後再問之下，佢話坐10分鐘車程有個鳳林夜市，我地即刻上網search，見到都好似OK，咁即刻話叫佢call的士啦！本身件事都完滿解決！點知爹地積諗住番入房放低架BB車換做咩帶之際，個房門鎖竟然壞咗！佢熄滅咗團火又重新燃起！！之後唯有推番架BB車出黎去咗個夜市先算.......
呢個夜市係U字型嘅兩條街，一黎我又不停搵有咩啱阿仔食，之後就搵咗其中一檔坐低食，但熱到爆炸仲要抱住阿仔食，個情況都幾狼狽，不過阿仔竟然都冇扭計，仲好開心咁搞亂檔！但我就熱到一頭煙！
D野食就好一般，加上又好熱，所以食到唔餓就走人喇～行咗一陣去到個飛標攤位，玩咗一round冇獎
之後第二round老闆話我第一支中嘅話就送個汽球俾我地！阿仔拎住個汽球勁開心！
但最後一上到車就俾佢揸爆咗！個司機見到都話佢太厲害了！破壞力嗰方面........
好在我地番到去個門鎖已經整番好，之後爹地積同阿仔玩一輪帶小朋友去酒店必做嘅......跳彈床！
玩完就乖乖訓覺lu～
沒有留言:
張貼留言