我地一早出發去到難波站坐一早已經買咗飛嘅阪神電車一日券。早餐都未食，我地去到先買咗D麵包上車食。D麵包全部都好靚！花多眼亂呀！(其實我地唔知電車上面係可唔可以食野，所以一路食一路好似做賊咁)
我地上嗰架應該係特快，但因為個路途都遠，所以就算特快都要段時間先去到。
去到神户三宮站都已經十一點幾喇。原先計劃係去咗神户動物王國先，之後再番去神户三宮站食steakland，但諗諗下又驚喺動物園玩晏咗會唔夠時間食，所以臨時轉陣，決定食完先去動物園!
食野之前我地去咗買portliner嘅動物王國套票先，一早扒晒文知道喺邊度買，又知道買套票抵D，所以搵咗一陣就搵到個ticket office喇！
買完飛我地就去咗steakland先！一心諗住十一點零黎到，剛剛先開門，應該無咩人啦。。。。點知。。。。已經大排長龍！！！
已經行到黎都無辦法，唯有焗住等啦。。。佢仲要衰到係要排隊而唔係拎飛嗰隻！唉，鬼叫我地想食好西咩！
排咗一陣，阿仔又搞搞震，我又唔想浪費光陰，所以抱咗阿仔去行下藥妝店。點知行咗一陣，錢都未俾就聞到佢痾咗poopoo。。。快快俾完錢行番去已經唔見到爹哋，原來已經有位喇！時間剛剛好！但我就仲要同阿仔迫咗入一個無換片台同勁細個嘅廁格度換屎片。。。。好狼狽但都任務完成！出黎嘅時候爹哋已經叫咗野食喇。因為散叫仲貴過叫lunch set嘅關係，所以叫咗一份餐俾勤勤。
勤勤人仔細細就有自己一個位一份餐，個畫面好搞笑。
但之後誤會就大喇 (哭) 話說個師傅問我地要幾成熟，之後我地話要medium，叫完之後諗諗下，有一份係俾勤勤食，之後指住勤勤嗰塊話要medium well，唔知係咪個師傅以為三份都係medium well。。。煮到出黎，三份都變咗Well Done..........好柴皮.......平時喺吉之島買嗰D仲好食過佢.....我地已經係叫最貴嘅lunch set.......好失望！我地本身諗緊係咪本身件事唔好食，但我地裝過去人地嗰D，真係medium嘅又好似唔錯。。。
食完失望嘅一餐之後。我地就坐portliner出發去神户動物王國喇！
一落車嗰一下真係以為落錯車，因為望過去只係見到一個好無裝飾有少少似溫室嘅蓬頂。
佢一出站就到，見到個招牌就知無去錯喇。
一入到去就見到都幾熱鬧下。由其係泊BB車嘅位置。
我地放低BB車就入咗去好受歡迎嘅接觸溫純小動物區，勤勤之前一直都只係識指住D dog dog叫dog dog，從來都未試過摸佢地，點知warm up咗一陣，佢就已經好放膽去摸佢地。
基本上呢度D小動物都真係好乖好純，係偶而一兩隻狗會大聲叫同追逐。不過入面有好多工作人員喺度，所以都唔會擔心D動物會傷到勤勤。
之後我地把握時間去參觀其他區域
呢個動物園嘅特色就係大部份嘅展區都係同D動物零距離接觸，唔係一般動物園咁會用個籠困住佢地，呢樣野真係好讚！
之後就出咗去室外
有袋鼠，佢地喺度曬太陽。
仲有馬，羊，駱駝，旁邊仲有D飼料機可以買飼料餵佢地。
我地之後就入番室內。
影完張相再仔細睇下D表演時間，見到有一場狗趕羊嘅表演仲夠時間睇。把握呢個空檔時間再俾阿仔去親親rabbit。
我地出到去已經表演咗一陣，都幾有氣氛，不過我地時間緊迫，所以睇咗一陣就走咗喇。
入番室內諗住準備撤退之際，又俾我地碰到一個雀鳥表演，我地企個位係D雀會飛過黎再濺住水花咁急停，個感覺都好震撼！
呢個動物園真係好好玩，如果我地唔係趕住去麵包超人館，真係可以再玩多兩個鐘！
我地緊接住就去下一個行程，去高速神户站行去麵包超人館喇！
好彩一早又扒咗文，因為原來都行好遠下，但根據D網友話只要跟住麵包超人呢磚行就會到喇！所以都算易搵，但都起碼行咗三四個字。。。
又好好彩，勤勤全程都瞓得好淋，如果佢清醒又唔肯坐車就大鑊！
行到去到室外，越黎越多麵包超人嘅公仔，仲越黎越大！就知不遠矣！
終於見到喇！！(又有摩天輪)
我地快快去買飛入場，唔知勤勤係咪聞到麵包超人嘅味道，我地一買完飛佢就自己坐咗起身仲要無扭計，不過原來勤勤未夠兩歲都要買飛架喇，叫做有份小禮物送番俾佢囉。
有個迷你廚房，玩得勁happy
D低B滑梯啱晒佢
有個生日backdrop，影定黎下個月生日用XDD
之後遇到人扮嘅細菌小子，差唔多全部小朋友都衝過去攬住佢，淆底勤勁淆底。。。。
大家好似追星咁追過去 XDDD
勤勤淆底到匿喺我後面，笑死我！！！
呢個拋波波玩到勁興奮！
之後細菌小子第二次出現，先誘導到勸勸同佢Hi Five。。。
之後應該係樓下商場有真人卡通表演，館內大部份嘅人都落晒去。我地自己喺度玩緊嗰時，有個姐姐老遠特登行過黎問我地要唔要整個頭飾。呢度嘅職員真係好有heart，比住平時喺香港，呢D臨近收工又無咩客嘅話都等收工，唔俾面色你睇迫你走都偷笑，仲點會咁主動過黎丫。。。
明明望上去好簡單易整。。。
整完出黎毀咗容。。。。。(遠睇唔覺)
之後我地玩多陣都落咗去個商場度，但已經係尾聲喇，不過一D都唔可惜，因為勤勤係驚到一個點。。。。。
點都唔肯望過去 XDD
之後我地行咗一陣個商場
去咗買個麵包超人包
慘不忍睹呀！
之後我地行番出去，阿仔唔肯坐車。。。爹哋抱住佢行，點知行行下太黑差錯腳，一chok阿仔跌咗個包落地，好彩我地朝早早餐個包未食晒可以頂住檔！
我地去到Birthday喇，一去到見到有D特價貨，shopping mode即刻開動！媽媽大開殺戒！對個銀包！D衫同鞋都好靚，大幾個碼嘅鞋都買定晒，哈哈哈！
大出血之後我地就撤退番去喇，本身諗住喺神户三宮度食埋先，但驚食完之後會無車番大阪市區，所以都係番咗去大阪先食安全D！
我地揀咗食溫野菜，無book位，好彩walk in都有位！
我地揀咗最貴個餐，個黑毛和牛真係堅正！！
我地一直堅持到呢一刻都無俾過電子奶咀阿仔，呢餐真係守唔住喇！一黎我地想舒服D慢慢品嚐，二黎我地又想傾下無咗個姐姐可以點算。。。於是我地用youtube開咗套superfun俾勤勤睇。。。。。
不過佢睇咗一陣竟然唔吼。。。又再繼續搗亂。。。
不過我地都食到飽到反艇！頂到上心口咁番去lu
沒有留言:
張貼留言