行番啱之後好快就去到，我地叫咗碗麵同餃子
兩樣都好好味，D泡菜都好好味，仲值得食過尋晚嗰餐烤牛！本身諗住阿仔都應該好啱食，但少爺一早起身無胃口又唔多願食。。。
食完之後就出發喇，本身都諗緊去唔去景福宮行下，雖然其實幾年前我地自己都好過，不過又想帶阿仔去影下相。但上咗車之後，又唔想趕頭趕命，所以最終都係選擇直接去纛島漢江公園。
我地坐地鐵去到纛島遊園地呢個站，出咗站就見到條J型天橋，之前喺旅遊節目都見過，即係無行錯路啦！
話說係之前無意中見到個post話呢度有個粉紅色花海，其實個post又無寫明確實位置，但後期又見有人post話呢度冬天時有得玩雪兜，夏天又可以野餐坐鴨仔船，仲有一個旅遊節目都有黎過，所以諗住就算無花海應該都有野玩掛？
可能今日係平日，成個站都無咩人，出咗站之後都係人影都唔係好見。我地沿住條天橋行，經過咗一個貌似圖書館嘅地方，好靜，但勤勤勁hyper咁大叫！行到尾，見到有個換片室，換完片我地就落地下嗰層，喺地面過邊行過去。成個公園都無咩人，粉紅花海就見唔到，但就有條好長嘅單車徑。諗住試下再search下睇下搵唔搵到花海位置嘅同時，就帶咗勤勤喺公園度玩陣先，成個公園都係我地包場。
Search完發現聲稱有粉紅花海個位置都幾遠下，步行基本上都好難去到，又唔知又係咪真係有，所以決定放棄，改去玩鴨仔船。我地去咗間租單車店度問，知道個方向之後就行過去喇。
行到一半阿仔不停唔肯行，原來痾咗booboo，隨便行埋一邊喺BB車度換完片繼續出發。
可能今日係閒日，四野無人，本住黎到點都要搵D野玩下，就照玩個鴨仔船啦。
本身諗住玩用腳踩嗰款，但個阿叔係咁好用力咁叫我地玩電動嗰款，我地又唔明佢講咩，但佢就繼續好用力咁講，一開始我地都堅持玩腳踩嗰款，因為覺得會好玩D。我地著好晒救生衣就等上船。
阿叔去抹完腳踩嗰款之後都仍然好用力咁叫我地玩電動嗰款，我估可能係話我抱住阿仔踩唔到之類，我地見佢咁大力堅持，於是就範改玩電動嗰款，去補完錢就準備上船喇。其實都唔平，25000won玩45鐘。
電動呢款就係踩住個腳踏就轉個軚盤，阿仔又爭住話要控制。
成個場得我地一隻船，所以無咩氣氛。兜咗幾個圈又有D風吹埋黎，都幾想瞓覺。
玩完之後就出發去食飯喇。下一站馬場洞食韓牛！
上咗車阿仔瞓咗覺
網上介紹呢間餐廳喺馬場洞附近，呢個站終於有lift直上唔駛搬樓梯。一出站轉個彎就見到喇！
阿豬媽一開始就毫不吝惜咁拎咗一大盤肉出黎，影定相方便一陣同阿豬媽再encore。
但原來放咗D肉落去之後都分唔到邊舊打邊款，哈！
唔知係咪阿豬媽見到勤勤喺度，有客韓式蒸蛋，阿仔醒咗就有野食喇，yeah！
總括黎講，都性價比高嘅，不過我同Daddy都係鐘意有油花嘅日本和牛多D。
食完之後我地就出發去Pororo Park喇！Pororo 喺韓國好出名，周圍都見到。我本身一直以為佢係隻鴨，原來佢係一隻企鵝。
Pororo Park係喺樂天世界出面，所以我地跟住去樂天世界嘅路線去搵，但原來個站好大，所以都搵咗一段時間。
終於都到喇！阿仔雙眼發光！
韓國嘅Playhouse同香港嘅唔同，唔駛著襪都可以入得。
波波池呀！！！
迷你籃球機，呢D要再入錢。。
每一架飛機勤勤都叫媽媽一齊坐，係呼喝我。。"媽媽一齊坐啦！！"
去到呢個粒粒池就不得了喇！！玩到唔肯走！
呢個池行入去銀到勁痛。。。。我可唔可以唔入去。。。。
之後再進攻隔離有AR嘅波波池。
勤勤好忙，好忙咁喺個波波池度執番D木粒出黎，就連垃圾都執埋，如果請part time清潔可以預埋佢！
之後見到旋轉木馬開始有得玩，即刻落去
原來已經有好多小朋友等緊呢個唔知係rabbit定fox嘅角色。之後Pororo都出埋黎喇，小朋友們都好興奮
勤勤例牌又係驚驚啦。。。Daddy仍然好積極咁帶勤勤上前，哈哈！
之後再玩晒每一個角落
呢個迷你摩天輪，只係可以兩個人坐，所以Daddy喺度等我地，勤勤一路坐一路大叫"我唔記咗Daddy呀"，哈哈
之後見到呢個小火車，我本身以為又係可以一齊坐，點知原來大人係唔坐得，勤勤自己一個人包起架火車。
我仲有擔心勤勤會喊，點知佢好老定咁坐喺度，仲坐咗幾個圈，呢一刻真係覺得勤勤大個仔喇！
之後勤勤仍然心繫嗰個勁銀腳嘅粒粒池，本身諗住一齊等個劇場開始，但佢音波功咁不停話要去玩"沙"，所以我快快同佢玩多次，daddy就喺劇場度等我地，最後我半呃半氹先帶到佢去番個劇場。。。。
雖然成個劇場都係講韓文，但睇完之後就不得了喇！阿仔從此迷上咗Pororo。。。成日都話我要睇Pororo呀！
玩完玩盡之後，我地終於撤退喇！點先呢個時候發現個wifi機無電，於是我地搵個地方快充電。
充電期間周圍行下，但又唔可以行得太遠，因為要拎番個wifi機。。。去超市買咗支帶漏咗嘅洗潔精，阿仔又斷電。。。
之後我地決定坐的士去貝殼倉庫！之前多數人介紹去往十里間分店，但因為佢真係喺個倉庫度，所以通風好差，唔適合帶阿仔去，於是我就揀咗黎蠶室呢間分店。
落車跟住google map搵咗一陣就到喇！上到去無咩人，店員見到勤勤問佢幾多歲，佢指住個寫韓文嘅牌話兩歲係要收10000won，我地都唔知寫咩，咁都無辦法啦。
基本上呢餐主要係滿足我，因為我係貝殼海產lover，所以就由我一馬當先出去拎野食，見到咁多海產自己任拎都真係幾興奮！
呢度無BB凳，只係有張有靠背嘅凳俾勤勤。
有好多唔同種類，燒海產其實都幾難控制個火候，又驚唔熟，但太熟又唔好食。燒燒下，可能個店員見我唔係好識，所以過黎幫拖。同埋燒熱咗D殼，有時會彈出黎，其實都幾危險。
味道其實就一般，因為唔係每一款都好食，得其中一兩款好食，同埋個味道比較單一，其他食物選擇唔太多，所以勤勤同Daddy都唔係食咗好多。
佢地食完就睇住頭先錄咗既Pororo等我，哈哈！
但佢嘅飲品選擇就好多元化，有好多種類，仲有手工啤酒，當我地仲稱讚呢樣野嘅時候，到埋單嘅時候就知出事喇。。。。原來唔係食開嘅任飲任食，野飲係逐支收費架！！！但佢個setting係平時食放題嗰D自己打開雪櫃拎嗰隻！！頭先阿仔拎住黎玩嗰個寫晒韓文嘅牌。。。。。唔通係drink list。。。。。仲飲咗勁多支，最後，飲野錢仲貴過餐飯。。。。唔飲都飲咗，都要俾啦。。。本身都一般好食，最後直情不爽。。。之後就行番去坐地鐵番酒店lu，好攰又充實的一天！
沒有留言:
張貼留言