我地尋日買嗰張巴士day pass就大派用場喇！
由那霸市去北谷嘅路程唔算遠，坐咗大概35分鐘就到喇，我地喺軍病院前站落車。巴士上每個站都有指示，所以唔怕落唔到車。
落咗車行去酒店本身大概只有10分鐘路程，但因為我地拎住一件二件行李，所以行咗成二十分鐘先到．．(攰)
我地住間酒店係Vessel Hotel Campana Okinawa，喺美國村隔離，一落樓就係Sunset Beach，個view靚得黎，行街食野都方便。因為酒店房咁早未拎得，我地放低行李之後就準備出發去海中展望塔喇。Check咗巴士個班次未夠鐘，所以我地沿路可以慢慢影陣相先。
反正時間仲早，我地決定食埋早餐先再出發，出到大路，不遠處就見到連鎖美國漢堡店AW。
食個豐富早餐先！
食飽之後，我地就行番出去巴士站等車喇。我地行番出去時發現桑江站其實仲近美國村，就喺間AW出面。可能距離頭站遠，時間好難好準確，架車比站上面寫嘅時間遲咗成十幾分鐘先到！曬到個頭出煙．．．
終於都等到車！張day pass又用得著喇！我地上到車，有個男人用普通話問我地係香港人定台灣人，佢話佢自己係台灣人，黎呢度公幹。可以黎到咁靚嘅地方公幹真係開心！(心心眼)佢問我地去邊，之後佢話都幾遠路程。我地之前search過，都要坐成一個鐘，同佢個講法都吻合。
呢個景點遠就真係遠咗d，但我地睇過d相又真係好靚，積對呢個景點更加係一見鍾情 (笑)！所以就算遠d都要去！其實呢架巴士係沿住北面行，所以沿路我地都見番尋日去過嘅地方，好似琉球村，萬座毛等等。所以如果唔join day trip，自己坐巴士都係去到。不過因為巴士班次都算梳，所以day trip都會係一個好選擇。
我地要係ブセナテラス前 (「BUSENA RESORT前」)站落車，坐咗成個鐘終於都到喇！
我地沿住指示向海中展望塔行過去。我地行入去，都未睇清楚d飛點買，個職員就同我地講架shuttle bus就快開，叫我地快d上車！所以我地未知乜頭乜路就上咗車先！
落到車就見到有個時間表，見到架玻璃底船就快開，我地就即刻去買咗飛先。我地買咗玻璃底船同海中展望塔嘅套票，好在我之前睇過喺機場拎嗰本旅遊書，有張8折coupon，我地又慳一筆喇！(沾沾自喜)
之後我地就去上呢架黑鯊造型嘅玻璃底船喇！
上到船，個個都向彎低晒腰向下望！上面仲遇到兩group香港人，估唔到遠離市區咁多都仲仍然見到香港人．．．
真係有好多魚，同我地上次去宿霧浮潛見到嘅差唔多咁靚。但唔同嘅係，我地今次係唔駛濕身都睇到，對於唔識游水嘅我地黎講，都係一個幾唔錯嘅選擇！記得上次第一次浮潛，我同積驚到死捉住個教練，認真失禮！(汗)
上番岸之後，梗係要同番隻船影相留念啦！
我地實在覺得個view太正！我地未行到去個展望塔，已經影咗成半個鐘！哈哈哈 XDDD
勁影完之後，我地終於捨得行去個展望塔喇！
沿途繼續影影影！！！
終於都入去喇！
喺D窗望出去，真係見到好多魚，仲有小丑魚nemo添！好得意呀！我地都睇到唔捨得走！
喺成個海中展望塔，我地都玩咗成兩個鐘，之後就行番出去搭車番去美國村喇！我地好好彩，一行出去就即刻有車！又再坐咗一個鐘頭車，我地又番番去桑江站落車喇。我地本身就諗住番去食壽司，出黎之前喺美國村隔離見到有間迴轉壽司店，本身都諗住去嗰間度食。點知，我地準備落車之際，見到路邊有間迴轉壽司店，我地就行去睇下喇！
呢間壽司店，喺門外鬼影都無隻，我地仲諗緊係咪無開．．．點知一入到去．．．勁多人！應該大部份人都係揸車黎，佢地喺停車場一落車就行入去，所以我地喺大路度就見唔到有人！因為佢近美國村，所以好多外國人黎食。
好彩佢個流量好快，我地拎咗飛就坐喺度等咗幾個字就到喇！
我地入到去本身都唔知幾多錢，見到寫住105yen，仲以為係105yen一件，都諗住ok啦！到我地入座之後問個侍應，佢話係105yen一碟，即係兩件，仲話平日係90yen一蝶，今日係星期六，所以105yen。我地心諗105yen已經平得好緊要！平日仲要係90yen！？(驚訝)
之後我仲問埋個侍應點落order，我地真係大鄉里出城！對面呢個全自助嘅點餐系統，真係覺得新奇又有趣！佢話迴轉帶上面如果有隻"船"裝住嘅，就即係有人落咗order，唔可以拎既。如果就咁係一隻碟就可以自己拎。
落order就係喺每個座位前面嘅touch screen度揀，揀完嗰款壽司之後，就揀要幾多碟，要唔要wasabi。最興奮嘅係，送上order嘅唔係侍應，你嘅order都係會從迴轉帶送出黎，就係頭先講嘅有隻"船"裝住。當你嘅order差不多去到你個位，前方嘅mon就會響起音樂，仲會有動畫提示你拎你order咗嗰碟壽司！酷愛壽司嘅我見到呢個點餐系統，加上價錢又咁平，興奮到係咁揀係咁揀！仲要好好味添呀！(心心眼)
仲有一樣要讚嘅，就連醬油都有5款俾你揀！
呢餐真係大滿足呀！！！
食飽飽之後，我地就快快行番去酒店度拎房喇！因為冬季好早就日落，所以我地要快快去Sunset Beach度欣賞日落！
間房有個大露台，可以望晒個沙灘！
酒店有條樓梯，可以穿過停車場直接去到沙灘，我地去到個石灘旁邊欣賞日落，享受一刻嘅平靜。
之後我地再慢步一陣個沙灘．．．
一眨眼就天黑喇．．．
之後我地休息咗一陣就出發去美國村行街食飯喇。
11月尾已經成個美國村都係聖誕裝飾，如果係臨近聖誕黎，一定仲有氣氛！
同酒店張咭去Blue Seal雪糕送多一球，一落去就食杯雪糕先！行完大半個美國村，都冇咩心水想食D咩。行埋去Aeon睇下有冇其他選擇，去到food court，見到個薯餅好似好正，又再食！但都係揀唔到晚餐食咩，因為係咁食嘅關係，根本都未肚餓。積話想食shabu shabu放題，本身都諗住去架喇，點知full晒無位．．．最後去咗食拉麵
本身以為日本間間拉麵都一定會好食啦！點知原來真係唔係架．．．．(失望) 又加上可能我都唔肚餓啦，但真係唔好食囉．．．
食飽飽之後，最後衝刺去咗Aeon行多次supermarket，再買多pack sashimi同廣島蠔，留番聽日做早餐！！(真誇張)
番到酒店，佢有個公眾澡堂，佢分開男湯同女湯，即係我同積都要自己浸！仲要係裸浸，我都諗咗好耐去唔去好！但既然一場黎到，又難得酒店有呢樣野！點都試下啦！本身以為深夜11點幾12點會無咩人啦！點知，成個女湯Full晒！(汗) 一個唔係好大嘅女湯入面有成十幾二十個人，仲要大部分都係一班人一齊，好熱鬧！而我就一個人呆坐一邊．．．但我都堅持浸咗半個鐘先走！ 番到房，積話佢男湯得兩三個人．．．又未免相差太遠掛？！
又係緊湊嘅一天，番到房都仲要睇多陣電影先捨得訓．．．真誇張！
