沖繩狂玩勁食喪走之旅 - Day 2 (首里、安里、波上宮、國際通、Naha Main Place)

到左第二日，應該係成個旅程入面最唔駛早起身架喇，所以就放肆下賴下床。本身我地諗住去行完首里城再去嗰間話好多人排隊既沖繩麵既，間店開11點半，話賣晒就關門。既然我地晏左，把心一橫， 就索性11點半去到食左碗麵再行！我地懶洋洋咁慢慢出發，去到首里站按住地圖個方向搵間麵店。今日個天氣好好，望到個藍天白雲令人心曠神怡！

間店個位置係喺d民居入面，無大招牌，明明睇地圖見到自己已經喺附近，但都兜左成10分鐘先搵到！基本上唔係細心搵佢個店名，行過都唔知呢度係食肆。。。

 

我地自己推門入去，個格局真係好日式既民居，佢舖面唔多人。我地就自己行左入去，積正想走入去之際會我見到入面既食客全部都除左鞋！好彩我叫住積，如果唔係真係失禮！之後我地自己入左去自己搵位坐低，樓面唯一一個店員就俾左menu個地，我地叫左兩碗中size既首里麵加一客煮物。

原來中size都已經好大，又食到好飽！呢個麵個湯底好清，清得黎都好鮮甜，d 麵都幾有咬囗，味道比一般再好少少， 又唔會話唔試唔得嗰種，不過去到沖繩點都要試下沖繩麵既！但之後嗰幾餐我地再試左沖繩麵，原來呢間係最好食架喇！

食完之後我地就去出發行去首里城喇，行到身水身汗之後終於行到！日本人真係好友善，有個family見到我地喺度影緊相，佢抱住個BB都問我地要唔要幫手揸機。之後個爸爸仲幫我地影左張咁靚既相！

 

雖然我地之前買嗰張2 days pass買首里城既入場卷有discount，但我類似既景點我地都去過好多次，所以都係諗住去參觀下佢唔駛俾入場費既地方影下相就算。行下行下，原來唔使俾入場費既地方都唔細，我地行下又影下相都玩左好耐！

 之後沿住單軌車站行番出去搭車。

之後就搭左去安里站去個榮町市場．．．

 唔知係佢呢段時間休場定咩？人影都唔見到個，d 舖頭全部拍晒烏蠅！

 

積話上網見到有blog友介紹有間菓子店賣手做菓子好好食，我地兜左十個圈都唔見，跟住佢個地圖都搵唔到，都唔知間店仲喺唔喺度。。。見到有幾間旅遊書有介紹既店舖，都係頹到爆。。完全浪費左我半個鐘！不過張車飛係任搭就無所謂啦。。。(頹)

本身諗住喺榮町市場附近搵下有無野好食，就食埋午餐既，但發覺此地絕對不宜久留，所以搭左去縣廳前站先。本身諗住去嗰間樹屋餐廳食火鍋架，之後跟之前喺google map度搵既地圖，行黎行去都搵唔到。行行下見到呢班小朋友，好得意！

 

之後問個市役所 (類似係我地既市政大廈)職員， 佢帶左我地入去個詢問處，全部都無人識講英文。。。但佢拎左個地圖俾我地睇，指俾我地睇嗰間餐廳喺邊，好似話搭車都要20分鐘，定唔知佢想講行路要20分鐘？總之無論是但一樣我都唔諗住繼續搵！於是我地又行番去國際通度搵野食，呢段係國際通既另一端，我地尋日都無行過。一行入去本身諗住食壽司既，之後積話想睇多幾間先，最終佢話想試下沖繩料理。

食左個牛肉丼定食同苦瓜炒蛋定食，個牛肉飯勁普通，苦瓜炒蛋又無尋日牧志公設市場間餐廳整得咁好食，碗沖繩麵，一食就覺得今朝嗰碗真係好野！食完一個咁普通既午餐之後，我地就快快出發去波上宮喇！波上宮位於海邊，喺波之上海灘隔離，話係喺珊瑚礁上面。自我有印象以來我都無去過日本既寺廟，中國既寺廟我向來都唔去，但日本既。。。真係好想去下！(嘻！都話係崇日架啦) 我地喺縣廳前站行過去，行左20分鐘左右，終於都到咗波之上海灘，本身都唔諗住黎呢度，但既然經過都行一行影張相啦！

仲見到呢兩隻互相依偎嘅貓，好sweet呀！

之後就行過隔離嘅波上宮喇！黎到就梗係入鄉隨俗，跟佢個指示洗淨雙手先啦！

 

 之後我地仲買咗個許願牌許願添！

 沖繩人都會黎呢度祈福。

去完波上宮之後，我地就沿路行番去旭橋站，再坐單軌去縣廳前站。因為積受人所託有好多手信要買，佢為免之後唔夠時間買，所以諗住今晚就買左d先！所以我地打算再行一陣國際通先再坐單軌去新都心嗰邊行naha main place。

但為食嘅我．．．．實在太鍾意食sashimi喇！同埋真係又平又好食！所以決定要再去多一次！(奸笑) 今次我地淨係食sashimi，所以就喺個刺身區度食。 Yummy～～～

食完之後，我地買埋一袋二袋番酒店之後，又出發去新都心。去到都成9點，DFS都已經關左門，好彩Naha Main Place收好夜。鍾意買野嘅我地，一行又行咗幾個鐘！本身諗住去美榮橋站食串角，但因為去到成11點都未餓，所以決定喺supermarket買野番酒店食！又有美味嘅巨峰提子，仲有平靚正嘅廣島蠔，真係試過番尋味呀！勁豐富行程嘅一天！食飽飽瞓覺就準備聽日嘅day trip喇！Yeah！