沖繩狂玩勁食喪走之旅 - Day 1 (第一牧志公設市場、國際通、小祿Aeon、通堂)

日本yen而家咁平，之前一直都plan住九月去東京，旅遊書都買埋。。。之後積轉左工，未有大假去唔到，唯有暫時hold住。。點知，有一日忽然收到香港航空send黎既edm，話有個衝上雲霄優惠，用工商銀行信用咭既飛行里數可以半價換到指定地點既機票！即係話16000里就可以換到沖繩既來回機票！早幾個月先打去鬧爆工行，事關我地上次想換台中來回又話full左，之後無啦啦又加高左個里數，搞到變左換得單程！！本身對呢張咭已經終極失望，點知佢忽然又有呢個offer，算佢啦！不過順帶一提，佢地換領個程序都好不便！要你喺打左去留位之後，三日內喺辦公時間內親身去佢灣仔個office度換，搵人代辦都唔得，唔通個個都請假去咩？分明就係唔想俾你換到！所以換晒呢次既里數，都唔會再用呢張咭！！ 期待左幾個月，終於都出發喇！難得又係搭香港航空，梗係要去佢一年可以免費去5次既VIP lounge 食個早餐先啦！ 食完個勁豐富既早餐之後就出發喇！本身班機係11點，點知佢前一日打黎話唔可以如期出發，要改去11:10 （遲十分鐘喳，嚇死人咩？)因為我今朝一早就傷風，所以食左粒藥先上機，一上到機就瞓死左。。。之後醒左，睇左半套<毒戰>就落機喇。一落機就見到好好天既藍天白雲，心情即刻覺得好舒暢！ 沖繩個國際線機場好細，所以過完關之後好快就拎到行李就可以出發喇！ 首先喺佢個tourist information counter 拎左幾本旅遊書，之前見上網見到話有好多coupon，咁梗係唔執輸拎左先算啦！之後行過去搭單軌列車喇，去搭yui rail 要經過國內線機場，呢個機場大好多，有好多手信店同餐廳，呢度當然留番最後一日先行啦！ 之後去到車站諗住買個2 days pass，本身諗住喺部售票機買既，但部機又無英文，搞黎搞去淨係揀到買1 day ，結果去左個counter買。雞同鴨講左一輪，終於買到張2 days pass, 價值1200yen一張，個職員即使唔識講英文都好落力話俾我地知用呢張pass買某d入場券有discount。 坐晒成條線都係需要27分鐘，我地第一站坐去牧志站行去酒店check in ，都只係坐左十幾分鐘。我地住既係JAL City Naha, 佢位於國際通中間，佢係中間到我地無論喺縣廳前站，牧志站定美榮橋站出，個路程都係一樣！我地沿住國際通一直勁行，沿路好快見到晒我地之前喺地圖同旅遊書見到既店舖同餐廳，即係話國際通都唔係好大。。。行左10分鐘左右就到左酒店喇。 酒店職員可以用英文溝通，check in 左之後我地就上房放低行李喇！房間同之前上網見到一樣，真係都幾細，不過都可以接受，除此以外，其他都好滿意。放低行李就梗係立刻出發啦！我地第一站就梗係去食我最愛既sashimi啦！！我地沿住頭先行過黎嗰段國際通。 極速就見到我期待以久既第一牧志公設市場喇！ 佢個格局其實只係一個普通既街市！ 同我地早兩年去過首爾既鷺梁津漁市場真係完全無得比！不過講緊既都係視覺上既感覺，我黎既主要目的地係食野，梗係以好味同平為主啦！！刺身一盤都只係500yen，我地仲叫左龍蝦，夜光貝，海膽同海葡萄！喺街市買完，如果唔駛加工，可以就咁喺佢角落有個刺身區度食。我地因為要加工，所以跟佢上左一樓。 餐廳店員係台灣人，所以識講國語。本身以為食呢d係貴夾唔飽，點知原來係好飽架！好彩本身諗住留肚叫少d，所以先食得晒！ 之後喺平和通行番出去國際通，仲見到旅遊書有介紹嘅塩屋，係牛奶味雪糕俾你自己加唔同口味嘅鹽。係幾得意，但又咸又甜嘅口味......貪得意試下都ok嘅！ 食飽飽之後，我地梗係要盡用yui rail張2 days pass 啦！我地搭左去小祿站度行100yen店同行Aeon，而家d yen 咁平，真係忍唔住會狂掃！ 買到成個袋滿晒之後已經成11點，我地把握時間去通堂食多碗拉麵先番酒店！我平時不嬲都唔食宵夜，但去旅行梗係要放肆d啦！ 佢係自己禁機買飛既，不過就唔係我最憎既自修室枱，正！我地叫左一碗男味一碗女味，日本拉麵真係唔同d，本身見個女味好似好清咁，原來都好好食！食到勁飽之後就真係番酒店喇，差d要坐尾班車。。。我地次次去旅行都要玩到勁盡先安樂！番到去仲有宵夜之後既宵夜....巨峰提子！Yummy ~~~