我地之前上網做咗reservation，所以有個Naha Bus電話繩送 (笑)！
聰明豆積喺等緊嘅時候，見到佢有做巴士嘅day pass！因為我地第二日會諗住自己坐車再去北面，計過有jetso，即刻去買定先！今次積終於醒番次喇！哈哈哈！
等左一陣就可以上車喇！個團大概有十幾人左右，除咗我地兩個之外，仲有幾個uncle auntie都係香港人，仲有一個外國人自己一個人join團，其他全部都係日本人！我地個領隊姐姐好資深．．．從佢嘅年紀上面睇得出！Er．．．應該係領隊阿姨先啱！不過佢好落力，佢完全無視我地唔識聽日文，全程都不斷勁講，講到我地瞓著晒都仲講緊！相信如果我地識聽既話，應該都會了解到好多野！(笑)
我地第一站就去咗琉球村，呢個係自費入場，本身都無咩興趣，但一場黎到，唔入去又無咩野做，就即管入去打個圈啦。
呢個野明明係俾d小朋友影，積又走去叫人幫我地影，勁多人望住，好尷尬 (汗)
之後佢有個表演，我地坐低咗睇一陣，佢會邀請d現場觀眾出去參與。
我地行咗個圈都夠鐘喇，行番出去就上旅遊車喇。
我地下一站就係萬座毛，呢個係沖繩好著名嘅景點，就連明信片都會用呢個景點嘅相。
除咗睇舊石之外，嗰度藍天白雲望住個海好舒服！睇完萬座毛之後，我地就出發去御菓子御殿食午餐喇，呢個團包咗個午餐，雖然只係一個簡易嘅便當，但可以望住個咁靚嘅景色食野，都零舍好味d。
之後就出發去最重點嘅地方，海洋博公園喇！成個海洋博公園好大，落咗車之後都要行成10分鐘先去到個入口。
入到去有個觸摸池俾你摸下d海洋生物，有海星、海參等等
館入面有架lift可以上5樓，喺個池面望番落去，平時d工作人員就係喺呢度餵飼料落去，佢仲有個玻璃地面可以望落去。但呢個地方，一入到lift都未出去已經好大陣腥味，勁過平日去街市好多。
喺呢個角度望過去睇d鯨鯊，真係好震撼！ 相比下真係覺得自己好渺小。我地行番出去，本身諗住去第二個館再睇下，之後見到好多人都行去同一個方向，d工作人員又講日文，唔知佢講咩。直到遇到一個工作人員知道我地係香港人，用國語同我地講個海豚表演就黎開始，我地先知咩事！我地梗係即刻走過去睇啦！
去到已經開始咗一陣，去到嗰時聽到有d好輕快嘅音樂，d海豚同海豚訓練員跟住d音樂跳舞。 成個表演都好精彩！同海洋公園嘅真係無得比！好佩服d海豚訓練員！
之後就去埋最後一個景點，名護熱帶果園喇！呢個景點就真係麻麻地喇，成個果園都係d人造景點，場入面個導遊帶我地行得好快，唔知係咪想我地多d時間出去出面消費．．．快速行完一圈之後，有d菠蘿放喺度任食。我食咗第一舊，就覺得好酸，但積一食就話好正，我唔信邪，食多咗3舊都係酸嘅．．．
之後就索性去隔離個甜品餐廳買咗杯紅芋味blue seal雪糕。Yummy~~
去埋呢個景點，成個day trip就完lu～回程番市中心嘅時候，個領隊阿姨仲唱咗首歌歡送我地！我地揀咗喺國際通落車，準備去「守禮」食沖繩出名嘅石垣牛同Agu豬！
佢現場有人即場彈三味線，彈嗰兩個都係後生仔，佢地彈得好enjoy！
我地叫咗一份石垣牛做燒嘅，另一份係Agu豬，就係shabu shabu。但以呢個價錢黎講，個質素我覺得只係一般，因為佢都真係唔平。重點係佢個份量得好少，積食完話完全唔夠喉！
食完之後我地就去咗行多次國際通，首先去咗對面嗰間calbee買咗一份即整薯片。
之後就再行多咗陣街，去咗間藥妝店入面嘅100yen店度再掃多次貨。番到去，積再食多咗個杯麵做宵夜就休息，準備聽日嘅行程喇！
沒有留言:
張貼留言