泰friend清邁四人遊 - Day 6 (Intrawarorot Road 路邊美食攤、Central Airport Plaza Chiang Mai)

今日book咗車番清邁，我地食完resort嘅豐富早餐就check out去坐車lu～～

Check out時佢俾咗個big surprise我地！我地Check in嗰時問我地可唔可以影張相，原來佢係用黎幫我地畫幅人像畫留念！雖然唔係好似 ^^"但真係好有驚喜！

呢間resort，除咗佢唔知做咩無啦啦冇熱水同夜晚係搵唔到人support之外，其實都OK嘅！

之後出番town就上車喇，架車都唔算好full，但我地同坐飛機黎嗰時同一個命運，就係遲咗上車要坐到最尾！

我都淆淆地驚762個髮夾灣我會連早餐都嘔埋出黎。點知出奇地又OK wo！坐咗個幾兩個鐘，有個中途站休息。

之前trip advisor講到呢個Aya service嘅車好差，D司機又唔好 bla bla bla～～但我又覺得OK wo！個司機仲好有禮貌！

可能因為我坐最尾，頭搖又尾擺，喺山上嘅路程完全訓唔到，中途站上番車就訓到喇！一醒嗰一下就話到站，搞到好狼狽即刻落車！

我地call咗第一日車我地番酒店個司機，包幾個鐘頭車，咁就唔駛拎住D行李周圍走喇！第一站去食lunch先！去咗Intrawarorot Road 路邊美食攤，話有幾間都好出名！

首先食咗魚蛋粉先！

好熱嘅環境，都OK嘅，不過都係早幾日無意中食到嘅肉丸有驚喜D^^"

再食雞飯！

性價比好高！！

之後食椰子雪糕！

真係好好好熱～～～上番車諗住叫司機帶我地去D Market買手信，佢就帶咗我地去Central Airport Plaza Chiang Mai。一去到商場，我地就行過不停。買完又食下，食完又買下，咁就買到夠鐘去機場lu～～個司機仲同我地講話佢喺曼谷郊區有個椰子園，話佢想賣D椰子去香港，叫我地如果知道邊度有人買話俾佢知添，哈哈！

6日5夜嘅行程咁就完結喇～～希望第時仲有機會同D好姊妹去旅行啦！

泰friend清邁四人遊 - Day 5 (PAI Hotspring Spa Resort, Pai Walking Street)

今日一早真係超hea咁食個早餐先，個早餐真係勁豐富，個餐廳喺個河畔，好relax～～～

我地食咗個幾鐘先捨得走，之後都係番咗房。今日諗住好Hea咁做下spa，呢間resort又無spa服務，咁諗住搵出面其他地方啦，我地上網搵咗好耐見到有間都OK嘅，就係我地尋日都有去過一下嘅樹屋酒店，之後打電話去諗住reserve咗先，點知佢話裝修緊。。。噢。。。再搵過。。。

見到有間Pai Hotspring Spa Resort，都還可以，咁就打電話去啦，點知佢又唔俾我地book位，上網又睇唔到package，係咁叫我地去到再睇。。。咁喺無其他選擇嘅情況下，唯有諗住去到先啦。之後我地resort架車又唔可以車我地去，因為唔係喺town。。。唯有叫佢幫我地call車啦。

終於去到，個姐姐應該好開心，無啦啦有四條水魚自動送上門，仲要唔駛up sell我地就自動揀咗勁多個package！哈哈，我地加埋加埋，總共會按四個鐘＠＠！！

興致勃勃咁揀緊plan～～

原來佢D按摩姐姐都係喺Relax Massage度call黎，咁我地等佢地黎嗰時就去咗浸溫泉先。。。佢有幾個唔同嘅溫泉，我地行咗一個圈睇下浸邊個先。

可能係平日，成個resort都無咩人，好多個都無開，我地揀咗個最大嘅，亦係喺個Spa Room隔離。

但真係好熱，所以浸咗半個鐘左右已經夠晒皮！上番黎就等佢地黎。

之後就入房喇，間房望上去個格局係OK嘅，但個感覺似好耐都無人用過咁。。。

一開始按面同頸都OK嘅，但之後個milk bath就。。。。。。

首先個浴缸好似好耐都無人用過，而我亦唔覺佢有洗乾淨，而所謂嘅milk bath係加樽唔知咩透明嘅野落去就變咗白色，之後仲要係我同個朋友要一齊浸同一缸水。。。最重點係，我一路浸住，一路就見到有D小昆蟲嘅屍體浮上黎。。。。SO SHITTTT!!! 佢仲叫我地浸成45分鐘？！呢缸咁嘅野其實浸多一分鐘都嫌多，我地盡量投入個氣氛，但浸咗15分鐘真係頂唔順！我地自己上番水。。。最後。。。想講嘅係，同一缸水，佢叫咗我地第三個朋友入黎浸。。。。(汗)

如果當係泳池咁，大家一齊浸都還可以嘅，但。。。真係唔會enjoy囉。。。

之後到做Spa，好不幸我個阿姐個手勢麻麻地。。。加上。。。其實我入去無耐已經見到個牆上有我最最最怕嘅四腳爬爬，所以成個過程我都唔係太feel free。。。。

體驗下闊太嘅生活，原來時間都好易過，咁就做咗4個鐘，加埋一開始浸溫泉嘅時間，搞咗成5, 6個鐘，由天光做到天黑！我地打番電話俾車我地黎嘅司機接番我地番去，佢聽到我地個電話好似都好愕然，佢應該以為我地已經唔需要佢嘅回程服務。。。咁多個鐘，佢一定好奇怪我地唔知喺度搞咩黎！

好肚餓。。。我地原來由一早食咗個早餐就到而家！

是但搵咗間唔知食泰菜定中菜嘅餐廳入咗去！

食完之後，我地再行一陣個walking street就番去喇。番去嗰時又好大雨，今次好彩有帶遮，不過就無車。。。我地等到細雨D就行番去lu。

番到去之後，又因為已經過咗office hour。。。尋日講到話原來無staff service係會好唔方便，今晚就最體驗到喇 ＞︿＜ 因為佢唔知點解無～熱～水～！！！雖然天氣好熱，但我始終都唔慣沖凍水涼！ 試咗好多方法都真係搵唔到staff！唯有硬住頭皮上！嗚嗚嗚～～～～

泰friend清邁四人遊 - Day 4 (PAI 拜縣一天遊 - 倒立小屋、粉紅小屋、coffee in love、大峽谷)

今日我地就出發去拜縣 Pai喇！來往清邁同Pai主要有兩個途徑，第一個係坐飛機，第二係坐Aya service嘅巴士。因為飛機係得星期五、六、日先有機，所以我地只有去程坐飛機，回程坐巴士，咁就可以兩種方法都體驗到喇！坐飛機單程TB1400左右，只係需要坐20分鐘，而坐車就要成三個鐘，價錢只係需要大概TB150。

我地坐嘅係Kanair，佢係小型飛機，一架機得12個位，所以我地早早就喺網上買咗機票喇！一日得一班機去，我地食完早餐就坐的士去機場喇！有得check in luggage，我地寄咗行李就等上機喇！佢班機好古怪，班機個boarding time係咁不停自己轉，本身見到有好多時間淨，我地走咗去按腳諗住按30分鐘，點知按按下，突然間又提前咗個時間，搞到我地按咗一半拿拿臨要走，錢又無得退，真係激氣！

我地初頭仲以為自己好早check in可以坐前D，點知坐到最後 -_-

冇得近距離睇機師揸飛機。。。

小型飛機係有D浮，不過就無之前去關島跳Sky Dive咁聞到有機油味。

欣賞下風景先。

轉下眼就到喇，我地梗係把握機會同架飛機影相啦！基本上一半嘅票價都係為咗影相！

個機場無人又無機，基本上係咁影都冇人會理你！

見到個機師我地梗係唔放過啦！

哈哈，搞到型仔機師好似Mascot咁都有少少唔好意思。。。

之後我地去到大堂，都只係見到頭先落機嘅乘客，又唔見有的士。我地見到D職員都係幫D乘客聯絡酒店黎pick up佢地，咁我地都叫職員幫我地聯絡我地間Pai Island Resort，叫佢搵車黎接我地啦。

話咁快我地架車就到咗喇，仲好有風味添！

間resort其實距離機場只有10分鐘路程，所以我地一上車，話咁快就到喇！我地未夠鐘check in，個staff安排咗我地坐喺餐廳度做check in。仲有杯好清新嘅welcome drink！

仲有一份menu俾我地揀定聽日嘅早餐，睇個menu已經覺得好豐富喇！！！

之後我地睇咗一陣個map，研究下一陣想去邊度遊覽，我地就出去town食lunch喇！Resort有車送我地出去。

Pai呢度好多外國人，所以成條街大半嘅餐廳都係西餐或者cafe。。但我地最終揀咗間食粉同燒肉嘅地痞粉麵店！

食食下突然間勁大雨，真係狗屎咁大！我地唯有繼續坐下先，費事淨坐，叫多個芒果糯米飯食下先！D芒果多到見唔到D飯呀～～

落落下又出下太陽咁，希望真係過雲雨啦！因為本身諗住今日係Pai一日遊，落雨就去唔到喇 > <

睇定個行程先。。。。我地book Aya service嘅回程車嘅時候順便搵埋今日嘅一日遊，佢帶我地去呢間旅行社，係華僑開嘅，所以D人都係講國語。佢list呢D行程係Pai嘅主要景點，我地可以揀邊D景點去同唔去。

停咗雨！Yeah～出發！第一站我地去倒立屋。其實係勁近個town，一上車轉個彎就到！

好快影完相就去下一站風車酒店，見到草地梗係要跳下先啦！我跳！

唔得再跳！！

再跳！！！

哈哈，草地太多蚊！撤退！行過隔離個風車又影下先！

Pai果然係俾人洗滌心靈嘅地方，一望無際嘅景色令人感覺好舒服！

之後就去咗呢個粉紅小屋！可愛公主限定？NONONO！邊個話我地唔得架？哈哈！

一樣有feel啦！

下一站去咗呢個大樹千秋，個景好有feel呀！

好寫意呢～～～

巨型棋盤～～

之後去咗Coffee in Love～～～

坐低嘆杯咖啡先！件蛋糕好好味呀！椰子芝士蛋糕第一次食，好特別！

個view勁靚呀～～～～

Hea完一輪再去下一站！大～～～峽～～～谷～～～！！

其實佢真係無遮無擋，真係可以跌咗落去，我地唔係著波鞋都真係唔夠膽行太出，呢個位置已經係極限喇！

途中見到有個男仔行到最出，對住個山大叫！其實都未必唔係一個好方法釋放壓力架！

Laughing Gor上身！

呢度個景真係靚到呢～～～晏晝先落大雨黎，而家就曬到燶頂！

咁靚景，梗係怒影啦！

Yo～～～去下一站二戰橋喇！

正常影！

發咗癲咁影！哈哈！！

扮演意外現場！

有大象路過～～

我地影到癲咗唔捨得走，個司機大佬可能以為我地跌咗落橋！哈哈！

最後佢忍唔住揮手叫我地走！佢話佢見到就黎落大雨，要快D去埋餘下地方wo！

到此一遊嘅溫泉，因為要俾入場費，而我地都冇預時間去慢慢浸。

之後都係到此一遊嘅樹屋酒店，因為一落車就真係有D雨，所以都係快快走人！

司機話落雨唔去得waterfall喇wo！話會俾水沖走～真的假的？不過時間都晏喇，所以都番歸喇！

番到去見到有彩虹wo！之後我地番去resort抖陣再出去食飯！我地book嘅係family suite，好大間呀！勁正！

之後我地坐resort嘅車出去town，沿住條步行街行下D舖頭，D舖頭賣D野都好精緻，幾好行。

跟住行行下又落下，我地行到街尾，揀咗間西餐廳食晚餐。

有自助salad吧，味道都唔錯，仲叫咗cocktail。

我地一坐低已經落勁大雨，我地又冇帶遮。。。到食完D雨都無停過又無細過。。。

繼續坐，繼續落，問過個侍應會唔會有遮借俾我地，但又無。。。

等到人地都收工，都仲未停，可能個侍應都唔想我地阻住佢收工，又唔忍心趕我地出去，所以好努力幫我地搵車。最終佢唔知喺邊call左個人黎車我地番去，車費都算合理，唔理啦，總之番到去要緊！

番到去resort，由門口行入去我地個suite都有一段好長嘅距離要淋雨！佢個front desk又唔係24小時，所以想借遮都無人理我地，好彩咁啱見到個security guard，如果唔係都唔知等到幾時！講真，一個resort唔係24小時有人服務都幾唔方便。。。聽晚發現呢個問題更加明顯！待續。。。。。。