泰friend清邁四人遊 - Day 3 (Thai Farm Cooking School、素帖山雙龍寺、周六市場)

今日一早就去學泰菜喇！一早食完早餐就有專車pick up我地喇！首先佢帶咗我地去街市認識D食材先，老師嘅英文好好，仲好風趣！佢帶我地去認識唔同嘅泰國米、咖哩醬、配料等等。

介紹完之後我地就有少少時間自由活動，食榴槤嘅同學們就紛紛走去食榴槤，我地唔食嘅就去買其他野。呢度個街市好乾淨好舒服 (撇除極高嘅溫度唔計)，佢乾貨同濕貨完全分開，所以我地行乾貨區係好舒服，重點係呢度買野平過出面買好多！

我買咗好多調味料同醬汁！

仲有D小食買，最衰啱啱食完早餐先出黎，如果唔係一定可以再試多D！

之後我地就上番車去學校喇！

每人一條圍裙，再加一頂草帽，即刻好有feel～哈哈！

老師仲沖咗d香茅茶俾我地飲，好香呀！

本身煮野食係唔駛戴草帽嘅，但因為我地會先參觀佢個農場先，真係勁曬！

老師同我地介紹每樣香料，話俾我地聽一陣煮咩會用得著，佢仲會即席摘落黎一陣用，好天然！

曬到燶咗再俾蚊咬到開花之後就開始煮野食喇！一人一個位先！

第一樣野係......教煮飯！係，真係白飯嗰隻飯！

得外國同學仔好留心，哈哈！

跟住就係教我地用個盅去盅D咖哩醬！剛剛開始個樣～～大家生氣勃勃！

優雅地盅～～～

但支棍勁重！老師不停叫我地要harder! faster! harder! faster!真係飲奶嘅力都出埋！

成身出晒汗，我堅feel到係有燃燒到脂肪！ 老師話以前鄉下嘅人要同個仔揀老婆，就喺門口聽D聲，邊家嘅聲又快又大力，即係話個女人好勤力娶得過！哈哈！如果俾我就喺以前應該嫁唔出喇，哈哈！我隻手盅到軟晒老師都話仲未得！我個位喺老師隔離，老師係咁忍唔住手幫我盅，哈哈！

終於！成功盅到呢一啖咖哩醬！成頭大汗嘅煮飯look已經開始出現喇～～～～～

盅咁耐就係為咗一陣煮一碗咖哩。。。。真係要慢慢品嚐先得呀！

之後我地就一齊煮個湯，我揀嘅係冬蔭功湯！

煮完我地就一齊飲碗湯先！

好味，不過飲完一路都勁口渴。。。。

之後我地就煮自己份午餐喇！除咗有咖哩，仲有一個小炒，我揀嘅係甜酸雞。

老師大顯身手！

之後就有兩餸一湯，開飯喇！

不過講真，天氣好熱，加上頭先自己係咁煮煮煮，其實都唔係咁開胃。。。不過味道真係好正宗！Yummy～～

食完之後，我地休息一下再煮埋餘下兩樣野！熱熱地又有D風吹埋黎，真係勁眼訓！之後我地周圍行咗個圈。

之後就番番去繼續煮，呢味我揀嘅係Pad Thai，佢做嘅係素Pad Thai。好得意，雖然人人都係用嗰D醬料，份量都有建議，但人人做出黎個味道都唔同！呢個真係飽到無可能食到喇，老師都叫我地打包走嘅。

再做埋個甜品，我揀嘅係芒果糯米飯。

食埋呢個真係好～～好～～好～～飽呀！！玩足成日！仲食到咁飽，呢個泰菜班真係好抵玩！仲有cook book送！等我地番去都記得點煮！

食埋呢餐，真係見到泰菜都冇咩胃口喇！哈哈～其實如果有得揀半日班，我覺得半日都已經好夠！

飲飽食醉之後我地就番番酒店喇！哈哈～為咗唔想個Pad Thai凍咗唔好食，我地番到酒店就KO埋佢，都真係幾好食架wo！YUMYUM～～

之後我地call咗架雙條車上雙龍寺，沿路見到有人踩單車上去，又有人跑上去，真係勁！

都差唔多關門，所以我地把握時間上咗去先！因為話要行唔知幾多百定幾多千級樓梯，唔知要行幾耐，所以預多d時間行上去！

行咗一段樓梯之後，就見到一條長直樓梯。

雖然都有行到喘晒氣，但又無想像中咁長，其實同大嶼山個天壇大佛差唔多。

今日都係著咗短裙，要用披風，呢度要俾錢租呢～

雙龍寺唔係好大，我地周圍行下～

喺山上望去睇清邁嘅景色。

之後我地就落番山lu～喺樓梯又影下相先！

之後落番去D舖頭都差唔多關晒，之後我地就等架雙條車番黎接我地。

司機播D好柔情嘅音樂，我地好寫意咁坐落山！

之後就去咗周六市場，個市場係超大！

我地就咁向前行，冇轉入D小巷度行都行咗兩三個鐘！仲要因為佢係一條街過，基本上行咗入黎就要一直行，好難中途放棄！

呢個壽司我都竟然夠膽挑戰！唔知好彩定咩，又真係冇痾wo！

行下食下買下之後終於行完，本身我地想去按摩，但喺附近都搵唔到按摩店，最後就番到酒店附近再按。。。因為無預約，按得一個鐘，但等都等咗大半個鐘。。。

按完就番去執行李，聽朝一早就去PAI lu～～