之後就出發喇！呢個司機嘅英文麻麻地，所以佢都唔係好想同我地講野。。。
我地之前上網睇過，去清萊嘅路上會先經過hot spring，司機大哥知道我地都想去hot spring，就直接開車出發，又無再同我地傾今日嘅行程。咁我地打算同佢傾下我地嘅行程啦，點知佢可能真係太專心揸車，一同佢講野仲嚇親佢。。。之後佢仲要特登停低架車同我地講野 -_-
我又真係冇見過司機，仲要係搵食司機唔可以一路開車一路講野。。。不過佢地話如果同佢講泰文就應該會OK，咁又有道理wo！哈哈！見佢特登停車，我地都係講咗幾句大概想去邊就繼續出發喇！GOGOGO～～～
正常人咁早出發都係會喺車上面訓覺，我地幾個女人一個墟，由上車不斷吹水吹到落車！個司機可能俾我地嘈到耳都嗡埋！哈哈！不知不覺，原來已經吹咗個幾兩個鐘，實在係耐力驚人！
到咗第一站Hot Spring喇！
有個大姐喺度賣雞蛋整溫泉蛋，雖然好飽，都幫襯下先！
本身仲驚我地作狀影相冇放到隻蛋落去會唔熟，點知打開係熟到實晒，佢應該係本身已經熟咗先俾我地！(我地食晒先記得佢有俾包汁我地。。嗚嗚)
之後唔知係有旅行團定咩，越黎越多人！諗住泡下對腳，熱到爆炸，唔知D大姐點解可以浸得咁寫意！
我地一鼓作氣放對腳落去影相，見到一條條血管漲晒！
見到隔離有個建築物幾特別，我地又行咗過去影下相！
點知原來呢個本身諗住順路停一停嘅景點，我地都玩咗成個鐘！上車出發去白廟lu～～～
途中我地架車喺個road block度俾個警察截停咗，我地就梗係唔知佢地講咩啦！之後個司機落車同個警察講咗好耐，之後拎番我地填咗份form俾佢睇。適逢我剛剛睇咗阿SA做嗰度「雛妓」，套戲都係以清邁做背景。我就話唔通佢要check下個司機係咪車我地去開工? 哈哈，之後佢睇完份form，再講咗一堆我地唔知佢講咩嘅泰文，就走得lu～我地問番個司機發生咩事，唔係好講到英文嘅佢淨係話我地填咗份form，就冇問題wo～～咁就繼續出發啦！
嘩！真係又白又閃，我對眼呀！！(雙手遮眼) 呢個就係傳說中嘅白廟喇！
戴住個太陽眼鏡就睇唔到佢超潔白超閃嘅一面，我堅持唔戴！真係好宏偉呀！
熱情嘅太陽伯伯照上去白廟閃令令嘅表面，令我地好難張開眼！真係無誇張！
我嗰件算係短裙，所以要包條圍巾先入得！
每一部份嘅雕功都非常精巧！
入到去仲更加感受到輝煌嘅感覺！
參觀完主廟，不能不去就係隔離金碧輝煌。。。。。我以為係仲有一座叫金廟嘅。。。。廁所！
廁所都不忘要自拍呀！
旁邊有D小店，點知俾我地意外發掘到呢個隱世美食豬肉丸！真係好味到爆炸！！！呢個味道好食到直情叫我特登去搵黎食都值得！(而家諗起都想食)我地食完又食，不斷encore！個店主可能都覺得我地好好笑！
食完又飲完，我地就上車去食飯喇！
司機帶咗我地去呢間喺河邊嘅餐廳，好寫意喔～～～
個店員不停推介呢個炸豬手，真係推咗幾次，明明幅相係好唔吸引，見佢咁熱誠就即管試下啦！點知原來好好食架，我強烈建議佢要轉下張product shot！
黑廟又叫黑屋博物館，通常都會白廟同黑廟一齊去，白廟比喻為天堂，而黑廟就比喻為地獄，所以見佢入面嘅展品，殺氣都比較重！
之後我地再出發去長頸族，我地之前上網睇過D人話長頸族變得好商業化，又好昆水，但我地又覺得一場黎到清萊，又無理由唔去丫，所以有住心理準備都要去～～我地同個司機講嘅時候，因為個司機英文唔係咁好，所以我地係咁講long leg long leg，其實我地應該係去long neck！我話一陣原來真係有個long leg族，佢帶咗我地去就笑死！（笑）
我地入去之前，問過個司機，如果要同D長頸族人影相要唔要俾小費，佢話淨係俾入場費就OK！咁我地步步為營咁入場喇！
佢話每人要5百幾銖！咁其實係真係好貴嘅，但因為已經有心理準備，都諗住照俾啦！之後我地話我地有4個人，佢無啦啦自行劈價！哈哈，可能佢都過唔到自己嗰關！
俾咗錢我地就入去喇，沿路嘅感覺真係好似番咗鄉下咁！勁有鄉村氣息，仲有好多家畜行黎行去！
行行下終於見到有2個遊客，即係成條村住得我地6個遊客。。。我地行到去見到一個個攤檔，D族人見到我地，即刻行出黎主持佢個檔攤！
咪住先？！說好的長頸呢？
之後我地就諗番起，睇D資料話係有好多唔同嘅部族，我地應該喺其他部族度！迷底就喺呢個婆婆身上解開！
佢一笑就見到黑牙，我地記起有個叫黑牙族！
雖然話唔駛俾錢佢地，但我地都好識做，幫襯咗佢地買野先要求同佢地合照！咁佢地都好欣然同我地影。
之後行到去呢個帳幕，有兩個族人係咁向我地招手示意我地坐低。本住好驚俾人昆水嘅情況下，我潛意式係想轉身走既，之後基於大家話人地誠意拳拳，都想坐低睇下，就即管坐低啦。。。兩個族人用佢手上條木有節奏地敲打個地面，之後四方八面有成廿個族人走晒出黎！
即係正宗嘅Call馬！
呢下如果俾人圍真係唔駛走。。。好彩有驚無險，佢地都只係表演完等我地俾小費。咁我地隨心俾左D，佢地由原先木口木面嘅表情即刻變得笑逐顏開！可能有人覺得佢地咁樣好現實，我又覺得俾少少錢見到佢地嘅變臉術都幾有趣丫！哈哈！
俾完小費當然都影下相先啦！
之後我地就繼續行，去尋找我地本身最想睇嘅長頸族喇！我地見到有個指示隔離係"Yao"族，我地行過去望下。
點知竟然見到一個識講廣東話嘅女族人，仲要講得好好，連D語氣都有埋，一定好過香港D賓賓印印姐姐！見佢咁熱情，本身都好想幫襯佢，但佢D產品又真係唔係好吸引我地，幫唔到佢lu～
再行下行下，我地去到個大耳洞族，幫襯咗呢個姐姐，佢又係交戲同我地影相啦！
之後我地終於去到長頸族喇！
呢個大姐條頸真係好長呀～～～～
之後我地有團友好融入族人嘅文化，問D族人借茅廁開大！團友仲compare唔同族人嘅茅廁情況！堅！
之後我地見到呢個妹妹，佢服務態度實在太好，仲識講少少英文，咁乖咁叻女，梗係要幫襯佢啦！
佢仲有一個得一半嘅頸圈，話俾遊客用黎影相，有埋props咁專業，真係抵讚！我地係咁輪流同佢影相，又係咁幫佢買野，我估佢應該做咗嗰日村入面嘅top sales！哈哈！
玩下玩下，原來我地已經留咗好耐！仲買咗好多野添！之後都差唔多黃昏時間lu，咁我地就折返去清邁市喇！
回程我地訓左一陣，俾個司機響按嘈醒左一下，我地又好嘈咁吹水，一吹就吹到番清邁，我諗個司機好後悔嘈醒咗我地！哈哈！
我地冇番酒店，直接去咗寧曼區，我地喺Maya Shopping Mall附近，黎到泰國當然要食粉仔先啦！味道都OK嘅，但個肉丸真係都唔夠晏晝嘅好食！
之後就去咗Mont Toast！
知道有芋頭味嘅toast我當然唔會放過啦！
再掃咗一陣街
之後就行埋去Maya Shopping Mall喇～
本身我想去Dhara Dhevi度買我最鍾意嘅馬卡龍架，話係前東方文華質素應該有保證，價錢仲好平添! 不過去到嘅時候已經收咗舖喇，嗚嗚嗚～～～ (哭)
之後我地去咗herb basic，買左少少手信，之後去咗間超級市場行咗個圈，之後就坐的士番酒店lu～
沒有留言:
張貼留言