今日我地約咗中午坐共乘車番去高雄，所以諗住朝早去周圍行下，再去食個lunch就走喇。之前民宿個掌櫃小姐有介紹喺民宿行大概10分鐘左右有個牧場可以睇到牛，就諗住行過去睇下啦，行下行下都行咗成20分鐘都唔係好見，淨係見到有個寫住牧場嘅員工宿舍，但都見唔到。
唔知係仲未到定咩，但再向前行的話，要折返都幾係野，所以我地決定放棄，但見到呢條無咩車嘅公路，再加上D綠樹蔭好靚。慢慢喺度影下相先。。
坐喺度又影下
企喺度又影下
影下影下，都影咗好耐，要去食飯喇！
我地行番去墾丁大街，再買多咗少少手信，就去咗白沙灘泰國餐廳食飯。
尋日個司機姐姐話，因為墾丁天氣熱，所以D人都好鍾意食泰菜，酸酸辣辣夠醒胃，呢間都係佢推介嘅其中一間。
其實味道都唔差，不過可能香港嘅泰菜都做得好出色，所以番香港食都OK囉 ^^"
用悠遊墾丁個APP，有coupon可以有9折，又真係用到wo！正呀！
食完之後，最後衝刺買多round手信就番去lu～日光日白行墾丁大街，無晒夜晚D小食檔，感覺好唔同。
之後我地就番左去等車喇，本黎喺愛情海民宿代訂嘅野我全部都俾滿分，點知俾呢程車最後破壞咗！
話說我地又再book咗共乘車，點知等到過咗約定時間半個鐘都未有車黎，櫃台個姐姐有幫我地打電話去問，就話接緊其他客人，所以遲咗。。。終於架車都到，諗住都OK啦，好彩本身都預早咗。之後上咗車，見到架車上面根本就無其他乘客，個司機個樣又西晒咁，咁我地就估可能前一台客飛機啦。。。咁我諗我地黎嗰時，都係兩個人一架車，咁即係兩個人出去都不至於會蝕入肉丫。。。
點知個司機去到路口個車站，突然間叫我地落車，話呢架車去唔到，叫我地等一陣，轉過第二架車去＠＠我地無啦啦就俾人掉低咗喺條街。。。仲要轉過第二架車，個司機都轉埋，都唔知會唔會俾人賣豬仔＠＠本住覺得台灣都好安全嘅想法又再等啦，終於等到另一架車黎，我地上咗車，佢又兜咗去另一條街，接多咗個男人上車。搞下搞下，已經搞咗成個鐘都仲未出發，本黎預鬆好多都開始覺得緊張起黎。之後佢終於都肯出發，但佢不停沿路都勁兜搭D等緊公車嘅乘客上車，諗住賺多幾個人頭費。。。。
結果去到中段又俾佢兜到個女人，點知好衰唔衰，佢地用台語唔知講D咩政治野，大家個立場唔同，成程車成個幾兩個鐘佢地就不斷好似鬧交咁嘈！！個司機幾次仲激動到雙手都離開個呔盤！嚇死人咩＠＠
好在最後都有驚無險，準時到咗機場，Bye Taiwan～～
沒有留言:
張貼留言