之後我地去咗買好出名嘅玉珍香手工蛋捲，自上一次喺檳城買咗好多餅番黎，食到過期都未食晒之後，我地都唔係好敢買呢類型食物。尤其係積，一黎已經大大聲話佢唔要！哈哈！但反而我就有D興趣，積好穩陣地話買一包開黎試下好唔好食先。我地買咗包芝士味，噫？正wo！(之後我地發現原來佢有得試食。。。。)
買完之後我地就行去海角七號嘅拍攝地點，阿嘉的家同阿嘉上班嘅地方喇！司機姐姐又攝影師上身，幫我地影咗好多張靚相！
影完之後，我地就去咗玩草地飛球喇！呢個之前喺關島同新加坡都有得玩，但因為太貴，一心都諗住黎到台灣先玩，所以一黎就好有決心要黎試下喇！
一黎就俾人綁咗入個波度
原來佢入面係有支咪，我地碌落去嘅時候，慘烈嘅大叫聲上面嘅人都會聽到晒！哈哈！
不過好似得我一個人叫，積個樣係呆咗，哈哈！不過真係撞到頭都暈，見到滿天星斗，哈哈！
之後就去咗隔離度睇梅花鹿喇。入到去個哥哥就同我地介紹佢D鹿，原來睇梅花鹿係有分季節架 > <
我地而家係冬天去，D鹿係無梅花圖案，又無角，望上去成隻狗咁 (哭) 同小鹿斑比完全無關係。。。。不過我地都照有入去餵鹿
大叔與鹿在散步
呢度原來都睇咗好耐，之後到差唔多日落嘅時候，司機姐姐介紹我地可以去紅柴坑睇日落，佢話關山而家反而無咁好睇，仲話嗰度可以坐半潛艇。我本身就睇過後壁湖可以坐嘅，咁見佢話呢度都有就試下啦。
去到一個人都無，得一班大叔喺度，原來佢地係D船員等開工。可能佢見得我地兩個人，諗住等多D人先開船，點知等咗成十幾分鐘都冇人黎，咁就得我地兩個人包船。
落到去就知。。。中。。。伏。。。了。。一開船已經覺得D水好似好濁咁，再開咗船都差唔多5分鐘，點解無野睇嘅。。。因為我地之前去過宿霧同沖繩玩過類似呢D，明明唔係咁架wo。。。再等，間中有少少魚，見到一隻海龜。。。但真係好濛law。。。。
架船D冷氣好夠涼，加上又浮下浮下，坐到開始恰眼訓。。。咁就睇完喇。。。
哈哈，唔知係我地唔好彩定咩，但真係無野睇囉。。。
我地上番車，回程途中就見到好迷人嘅日落，
司機姐姐叫我地落車，幫我地影咗好多靚相呀！
最後一站，亦係最重要，就係去後壁湖食生魚片喇，YUMMY～～～
之前睇介紹都係介紹輝哥生魚片，但司機姐姐竟然話除咗輝哥之外，其他都可以揀！佢話因為輝哥出咗名之後，D質素就差咗好多，最後我地就揀咗佢介紹嘅邱家。
好好味呀！仲好抵食添呀！
超豐富嘅一日行程，番民宿lu～～回程嘅時候我問司機姐姐墾丁大街邊度有得買生日蛋糕，佢話恆春先有呀 > < 之後話starbucks可能會有，咁一於行過去睇下買唔買到生日蛋糕同積慶祝生日啦！
Starbucks喺墾丁大街嘅街尾，係最最最尾，我地尋日都無行到咁遠就折返喇，今日就梗係要行過去啦！
差唔多到嘅時候，我地經過福華渡假飯店同冒煙的喬旅店，見到入面有好多學生喺度開Party，應該係學校旅行，行入去八卦下，見到D學生玩得勁high，同我以前讀書嘅時候好唔同！
終於都到咗starbucks喇！Yeah～
Happy Birthday to you！件蛋糕仲好好味添！
個司機姐姐話小灣沙灘呢邊夜晚有D酒吧，又會有D人玩煙火，之後我地行咗落去睇下！酒吧係有嘅，但就真係唔見有人玩煙火，仲有告示話唔比玩。。。咁所以行一陣就走喇，呢度睇D星星特別多特別閃架！
之後我地行番轉頭，又未係好肚餓，見到呢個手工窯烤披薩好特別，真係全部都即場烤，香噴噴就梗係要試下啦！
真係熱辣辣好好味！
成條墾丁大街都好多學生，D攤位遊戲檔真係發達喇！而我地都俾個氣氛感染到，又一齊玩埋一份！
最後我地再食咗少少小食，又買D水果番民宿lu～～
沒有留言:
張貼留言