之後我地就喺出面個花園等車黎喇，呢度個環境真係好靚，坐喺度真係好舒服。
等咗一陣，我地就見到有架好可愛嘅車仔駛過黎！呢架車咪係我地結婚租嗰架花車？(心心眼) 我同積一心都諗住佢只係經過，點知佢停喺我地間民宿前面，仲有一個好後生嘅靚女落車，
原來。。。佢就係今日我地包車嘅車同司機？
原來。。。佢就係今日我地包車嘅車同司機？
我地都覺得難以置信，我地即時覺得好抵！即係坐架咁靚嘅車都抵晒！之後上車靚女司機介紹自己之後就略略介紹我地今日嘅路線，再問我地有D咩地方特別想去。聽兩句就知佢好專業，仲好好傾！我亦都好佩服女仔人家可以揸到咁大架車仲揸得咁好！靚女司機叫文屏，佢望上去真係好後生，後黎我先知道，佢同我同年，但已經有兩個小朋友，一個8歲一個5歲！天啊～～～真係點睇都唔似！
我地第一站就去咗船帆石，其實呢個景點同黎緊幾個景點都一樣，都係喺個海邊望向遠處舊石頭。雖然我講到咁，但其實個風景係好靚。
之後靚女司機話幫我地影相，仲教我地企邊個位會影得靚。我第一下就諗起上兩年我地去台中包車嗰個女司機事件。。。。之後佢幫我地影咗幾張！
之後靚女司機話幫我地影相，仲教我地企邊個位會影得靚。我第一下就諗起上兩年我地去台中包車嗰個女司機事件。。。。之後佢幫我地影咗幾張！
嘩！真係好靚wo！
之後佢直情好似婚照攝影師咁教我地擺pose，但影出黎又真係靚架wo！仲要我地平日如果要有合照嘅話，我地set腳架都有排set，所以真係慳番好多時間！今次包車真係物超所值呀！
下一站就係砂島，司機姐姐話因為要保護個環境，而家都會封住唔俾人落去。所以我地都仲見到D咁清澈嘅海水同咁幼白嘅沙啦，咁我地都係喺度影幾張相就走人lu～
靚女司機又教我地擺pose影相喇！
之後我地就去鵝鑾鼻公園喇，呢個景點比較大，所以預咗差唔多成個鐘頭去參觀。司機姐姐帶我地去買咗飛之後，就叫我地去到燈塔嘅時候就打俾佢，咁佢就會去出口嗰度接我地。
我地沿住個地圖指示一路行，今日仲諗過好唔好著拖鞋，好彩最後都著咗波鞋，原來好似遠足咁架！
沿住D小徑行會見到好多呢D山洞
呢個步道望到成個海，好靚
呢舊叫親吻石，真係好似兩舊石親吻呀
最後就去埋呢個燈塔公園，墾丁嘅標記，點都要黎啦！
之後我地就上番車去下一站喇！
因為之前我地同司機姐姐講我地想去鹿境餵鹿，咁佢就話有個地方有機會可以睇到野生鹿，就係要坐沙灘車入去，咁佢問我地想唔想坐沙灘車入去睇，我明明記得之前搵資料見過沙灘車係喺哈你波特飛球隔離架，咁既然呢度有就玩咗先啦～～
我同積一架車，有個師傅會帶住我地行。我地開咗一陣，個師傅一支箭就開到好遠，咁剛剛上車，我就梗係叫"汽車殺手"開慢D啦！開到中段，真係見到有一埋梅花鹿喺遠處跑過，不過其實咁遠，係咩跑過都唔知^^" 咁個師傅話係梅花鹿就信架喇！
一開始時，出面收錢D大嫂話如果我地要影相，同個師傅講佢會幫我地影。但佢真係一支箭開到好快，大叫佢都唔會聽到，所以再開多陣，見周圍都冇人又冇車，我就話我地停低自己影，佢見我地停咗就一定會等我地啦！哈哈！
一望無際嘅草原，真係亂影都好靚！
不過影完之後，唔知係我地唔小心熄咗匙定係佢太耐唔郁會自動熄匙，架車著唔番，要個師傅老遠行過黎幫我地著番車，哈哈！邊個叫佢開到咁遠！
去到有個沙地，見到有幾架車係度兜圈，個師傅帶我地兜咗一兩個圈，就話俾我地知呢度我地都可以兜，積兜咗一陣就換我兜，兜咗都有成十個圈，師傅就叫我地回程喇！
之後我地上番車就去下一站風吹砂，呢度同樣都係喺個岸邊望過去，都係影幾張相就走喇！
再下一站就去咗佳樂水，本身話係去食飯既，但唔知點解原來要買入場券。司機姐姐幫我地買咗兩張學生票，佢話呢度唔會check，見我地兩個個樣都好年輕，所以可以買半票，呵呵！
我地去到見到有幾間海鮮店，我地叫咗龍蝦，海膽，燒生蠔，炒菜，炒飯，海鮮湯。。。龍蝦真係好好味，但個海膽就真係失望D喇。。。同埋呢度原來無生魚片架 > < 咁點都要去一躺後壁湖就得喇！無生魚片嘅墾丁點叫墾丁！？
我地本身唔知點解會背住個海景坐，之後司機姐姐過黎問我地點解唔向住個海，我地都覺得自己傻仔，望住個海好味好多！哈哈！
食完之後，司機姐姐帶我地入去佳樂水入面參觀，原來頭先張飛係用黎入去入面參觀嘅。原來係坐住架旅遊車喺入面遠觀D不同嘅石頭。
雖然咁啱遇到一大群強國大媽，要迫入同一架車，不過呢個觀石嘅參觀要自己俾D幻想力去睇一舊舊石都幾得意丫！
唔講其實睇唔睇到似咩呢？！
最唔駛幻想係呢塊鬼面石@@
之後我地就坐番出去，仲買咗好多一包包嘅零食手信，講好唔好買咁多野，買下買下又愈買愈多，不過都係買俾人為主啦！
下一站我地就去咗出火，本黎呢個景點應該係夜晚黎先好，不過時間夾唔啱就冇辦法啦！但其實日光日白黎都好似幾無聊，就咁見到地下無啦啦會有D火走出黎，就成班人圍住喺度唔知睇咩咁，哈哈。
因為之前睇景點介紹，係夜晚見到D火光，同埋會見D人會喺度玩煙火仙女棒，咁成個畫面會好唔同。同埋之前睇介紹話D人會喺度燒爆谷，但我見D指示話而家已經唔俾咁做。所以呢個景點真係望一望就走lu～～～
因為之前睇景點介紹，係夜晚見到D火光，同埋會見D人會喺度玩煙火仙女棒，咁成個畫面會好唔同。同埋之前睇介紹話D人會喺度燒爆谷，但我見D指示話而家已經唔俾咁做。所以呢個景點真係望一望就走lu～～～
沒有留言:
張貼留言