Janis & Jack～～＊幸福點滴～～: 高雄墾丁生日之旅2015

今日晏晝會坐車去墾丁，把握時間朝早去多個地方。今日再次揀咗一份中式一份西式嘅早餐，食完之後我地就pack好行李放喺reception，就叫的士去夢時代廣場喇！

今日係星期一，同早幾日完全相反，周圍都得好少人。既然無咩人就影下相先啦！

夢時代廣場好大，隔離連住仲有另一個商場，但因為我地時間有限，所以就先上去頂層有摩天輪嗰度睇下先。

超大嘅太陽，本身冬天黎無意識帶太陽眼鏡，原來都係要有太陽眼鏡先有渡假feel，忍唔住尋日喺夜市買咗副cheap野頂住先!

太多人又嫌太迫，無人又覺得無氣氛.....今日一黎係星期一，二黎又太早，差唔多成個樂園都係得D工作人員......周圍D攤位遊戲都無人玩，咁得兩個人玩好無mood架嘛......所以都係打咗個白鴿轉，如果坐摩天輪的話，幾乎可以包場，不過本身無咩喜好，所以唔坐lu～～～

最後，我地都玩咗呢個7D影院，想搵個職員買飛都搞好耐，因為冇客人，大家都唔係處於工作mode.....雖然唔貴，但真係好流，畫面質素太差，感覺上係而家拎番部PS1出黎打機咁 XDDDD

玩完之後我地就行番入商場喇，太陽真係太大喇！落一層又有另一個室內遊樂場，又有好多夾公仔機，忍手唔好再夾喇！！

之後就去食野喇，早餐都未落格，但因為約咗2:30pm要出發去墾丁，所以都要食咗野先喇。我地去咗food court，揀咗食牛肉麵同煎餃子，味道都唔錯，Yummy～～

食完之後我地再去商場行一陣就坐的士番去motel喇！

番到去Motel見到有個男人企喺度望黎望去，估佢應該係個司機早咗到，原來佢係Motel既職員，佢幫個司機望下我地喺邊，架車已經到咗停咗喺對面。

車係搵墾丁愛情海民宿Book既，本身我地係book共乘車，點知佢淨係車咗我地兩個就直接去墾丁，話今日無其他人上，YOHO~~HO~~坐得好舒服！個司機仲好好人，又傾到幾句計，咁諗住睇下佢有冇興趣做包車啦，反正我地已經放棄咗電動車諗住聽日都要包車架喇！點知我開到口問，佢介紹完竟然都叫我地問番民宿，我問埋幾多錢，佢都只係講咗個大概嘅價錢，再叫我搵民宿幫手，呢個司機好似唔憂做咁。得兩個人都唔兜多幾個客就出車～～有包車又冇興趣做

兩個鐘左右我地就去到墾丁愛情海民宿喇，一入到去就覺得個感覺好舒服，真係好有渡假feel～

掌櫃小姐勁親切，勁友善！超級詳細咁介紹墾丁嘅特色，真係詳細得好緊要！佢從當地文化，遊玩路線，交通情況，推介美食等等都介紹得好詳盡，仲用螢光筆同我地highlight晒D重點！令我地短短十幾分鐘已經好清楚了解墾丁嘅玩法！

之後我地見佢有得join one day tour，就平過包車少少。

咁佢介紹完個詳情之後就問我地會唔會好抗拒中國嘅遊客，佢話因為真係大多數join呢個團嘅都係強國人。咁我向來都覺得所有地方嘅人都有好有唔好，但佢咁問我，我就覺得我地向來好憎跟團嘅情況又可能真係會出現，所以我地最後都係決定包車，想去邊就去邊，留幾耐就幾耐！

清楚介紹完之後佢仲帶我地上房，介紹埋房入面嘅設施。我地呢晚揀嘅房係小Villa，個浴室係半露天，其實個浴室係喺個露台度，不過就有一排排嘅竹簾遮住，喺入面可以若隱若現望到出面，但出面就望唔到入黎。感覺真係超正！！不過連去廁所個感覺都好Raw，我就覺得超正！

我地休息咗一陣就出發去墾丁大街喇，本身我地就諗住今晚喺墾丁大街度掃街做晚餐嘅，但因為見到好多人介紹要食嘅南洋菜迪迪小吃聽日休息，即係我地要夜晚食就得番今日，所以就諗住去食少少，留肚再食其他野。我地由街頭行到去街尾，再行番去街中間，沿途都食咗d小食。

我地跟住個地圖方向搵到去迪迪小吃嘅路，佢唔係喺墾丁大街度，同埋因為已經係夜晚，天色好黑，條路又冇咩人.....而我地搵到條路，沿途都唔見有指示牌，仲諗唔通真係出名到無招牌人地都會去？(後期發現原來有另一條路都可以去到，人地係有指示牌架^^")

因為諗住要留肚一陣再食野，所以叫咗少少野淺嘗就算。但唔知南洋菜唔啱口味定咩? 我地覺得都係好一般，無講到咁好食，但都唔差嘅。

之後我地行番出大街，諗起黎到墾丁都未食過生魚片，本黎諗住黎到要勁食架嘛。之後就去行下邊度有得食。行過一間叫大玉食堂嘅熱炒店，見到民宿都有highlight推介，又有生魚片食，但其實都完全未落格，唔理啦，生魚片有得幾多俾你食丫 XDDD

入到去無理由兩個人淨係叫碟生魚片架?! 於是爭就叫多咗個炒菜，之後積話要叫一個叫唔知咩翅嘅野，唔知點解佢會覺得係好似碗仔翅個fd，黎到係一碟小炒，仲要係唔好味嘅小炒。。。。但睇番個餐牌，我先見到呢碟野係喺熱炒料，咁點會係湯呢？！

之後上咗兩碟野都未見個生魚片，明明生嘅應該係好快，勁驚佢行埋黎話無貨，明明係為咗碟生魚片入黎，迫住先叫其他，如果而家先話無真係殺人呀！

終於都拎咗過黎，不過質素就好一般。期待聽日去魚市場嘅生魚片啦！