Janis & Jack～～＊幸福點滴～～: 高雄墾丁生日之旅2015 - Day 2 (橋頭糖廠、旗津漁港、瑞豐夜市)

尋晚check in嘅時候已經揀咗一份中式一份西式早餐，約定十點鐘送餐。點知晨早房入面個電話就響，話送咗早餐去門口，以為咁快就到十點？！積仲好似夢遊咁，好積極搬晒D早餐入房，我問佢而家幾多點，佢先話七點。。。。咁即係送錯啦！送錯仲咩仲搬入黎？！即刻叫佢打番去咩佢收番，十點再拎黎啦！！！

再入番我嘅夢鄉，今次就真係到十點喇！

我地悠悠閒閒咁喺房食份早餐，出奇地個中式早餐係好好味！

尋晚黑嗎嗎睇唔到，佢房入面係有個天井，可以透到光，總算光番少少。

因為我地要轉房，所以我地check out既時候要自己拎件行李去reception，今晚自己拎番去新嗰間房。之後我地就出發去橋頭糖廠喇！

本身其實都唔係好大興趣，但因為高雄真係冇咩地方係好想去，咁橋頭糖廠坐捷運就去到，咁方便就去下啦。

今日係假期，好多當地人尤其係一家大小都黎到呢到踩單車，我地本身諗住去到旗津都會踩，所以呢度我地就選擇步行。之前check過有五分火車可以坐，但因為我地今朝太悠閒，所以錯過咗D時間，咁就真係行下啦！

咩都未睇就開始食，食個肉包子先！

之後就行入去，都係食！食個紅豆冰先！

食完就真係參觀下啦，好多已經荒廢咗嘅火車，幾乎係台灣必影嘅野。

今日真係熱到爆炸，一個朝早已經熱到出煙，仲著晒長袖衫真係出事！入去室內抖抖先！

呢個就真係工廠範圍，以前就真係做糖嘅，而家就係俾人參觀啦。入面個環境好似D動作片，成龍大哥同D對手爬上爬落打架嘅場景！哈哈！

之後我地出番去，見到有個公園D花好靚，梗係唔會放過影靚相嘅機會啦！

影完之後，食咗少少野頂下肚就折返喇。

我地坐捷運去西子灣站準備去旗津漁港，本身我地就諗住踩單車，其實一出站已經有好多單車店，因為西子灣站都好多地方可以踩單車去遊覽。我費事拎住架單車上船，所以我地決定去到旗津先租。

行過去碼頭都唔駛10分鐘，見到有間話出名嘅黑輪，都唔知係咩，反正有D肚餓就買支食下啦。um.....係關東煮D friend，我唔好囉，仲要咁大支。。。

食完就去排隊上船喇，超級多嘅機車！個個嘅技術超好，咁迫都可以騎得咁好，真係佩服！

終於都上到船，好似坐渡海小輪咁，大概15分鐘左右就到。

一落咗船就諗住租單車啦，但話說我地一早諗住去到墾丁會租電動車，咁我地見呢度有兩用電動車，即係用電又得，用腳踩嘅又得，咁就諗住小試牛刀，如果順嘅去到墾丁就可以租電動車喇！

租兩個鐘要TWD300，普通單車就TWD100全日，但因為想試下，咁就租兩個鐘先啦！因為諗住係積載我，所以我地去咗個冇咁多人嘅地方俾佢熟練下先，試咗幾下，佢話OK我就上車喇。

上咗車就發現好似有D不安，無想像中咁易控制，因為快又覺得好危險，但慢就會平衡唔到。。。

因為之前睇過話燈塔五點鐘關門，所以我地第一站就決定去咗燈塔先。騎住架電動車，戰戰兢兢咁去到燈塔嘅路口，我地泊好架車就行上去。

條路又長又斜。。。好似遠足咁終於行到！

呢個燈塔講真就同澳門嗰個真係差唔多，不過可以喺咁高嘅位置望到高雄嘅景色都唔錯嘅。

參觀完我地就行番落去，路口嘅另一邊就已經係炮台，既然喺附近就當然要去睇下啦。

好似好多個冏字嘅設計

呢度望落去可以望晒成個旗津海水浴場。超大風吹到我D頭髮亂晒，成個傻婆咁。。。

之後我地落番去，上番架烈火電動車準備去星光隧道，呢段路應該係唯一亦係最後一段揸電動車最順嘅路喇。。。。哈哈

我地去到路口放低咗架車再陡步行入去，因為條路實在太窄喇，技術唔太好嘅我地都係用腳行穩陣D。行到過去，唔知係咪因為日頭嘅關係，星光隧道嘅星光都唔著燈嘅？！就咁我地只係行咗一條好暗黑嘅隧道。。。

穿過去之後就見到有個岸邊，又係好大風。。。

行番出去我地就拎番架電動車啦，當我地仲同架電動車影完合照之際。。。

意外就發生喇！！

因為電動車係轉個手把黎發動嘅，因為我地唔習慣，而部車開著咗都係無聲嘅。當積正想落車落到一半嘅時候，隻手就扭到個手把，成架車就向前衝，咁因為佢個人係未落晒車，所以俾架車帶到佢向前跌。。。雖然未見過人炒車係喺架車出面，但確實令佢受咗傷。。。真係陰公豬喇 > <

因為未夠鐘還車嘅關係，我地都仲有堅持揸多一陣嘅，但一去到海水浴場附近，就超級多人！根本人都爭D行唔到，仲電咩動車。。。本身諗住靠架電動車去遠少少嘅風車公園嗰邊，但呢個moment我地已經唔敢再揸喇。。。

我喺平地度兜咗幾個圈，但都係人太多嘅關係，好難控制，最後，我地係要推番架車去還。。積落寞的背影。。。

但其實呢條路真係多人到冇可能電動車到囉。。。

Byebye電動車！

還咗架車成身鬆晒！我地就步行去搵食喇。呢度好多間食肆都有電視台嘅飲食節目黎採訪過，佢地都會貼張海報出黎。的確，我係會被呢D野吸引去幫襯嘅。

食完之後我地就沿路行，去到一個賣乾貨嘅漁市場。成為人妻之後，去旅行買嘅野都唔同咗....-_- 我係會睇D煲湯嘅蠔豉、元貝。。。但真係又平又靚，有少少後悔無再買添呀！

之後我地嘗試行去個風車公園，點知原來係勁遠，我地沿住海水浴場條步道行，行咗勁耐都好似仲未有耐，同埋行咗一陣已經天黑喇，所以就折返lu～

我地行番去碼頭，勁多人排隊等船！之後我地見到好多表演團隊巡遊，各色各樣咩都有。

我估今日應該係佢地有D活動，好似長洲飄色咁，周圍都好多放煙花！我估可能因為咁，今日嘅旗津有咁多人。終於上到船，去番西子灣站嗰時，我見漁人碼頭都係喺附近，之前搵D資料過嗰邊有好多餐廳，本身無諗住去食飯，諗住都過去望下啦，話「痞子英雄」都係喺呢度取景。

我地跟住地圖一直行一直行，明明方向無錯，點解沿途都無人架呢？心諗，如果有餐廳，都總有人行去食飯架？！但方向又無錯架wo！唯有一路行。。。

行到去一個停車場嘅位置，有幾架車停咗喺度睇煙花，因為呢個海邊剛剛可以望到對面海嘅旗津放嘅煙花！但點解都仲係見唔到有燈光閃閃嘅餐廳呢？當我地回頭一望，就見到呢個牌。。。

寫住漁人碼頭無錯呀！我都仲以為係咪仲有另一個入口。。。但再行入D，見到D餐廳招牌有D仲喺度，但就全部吉晒。。。有如死城一樣。係不遠處嘅香蕉碼頭都仲有一間餐廳營業。但周圍都無人，咁唯有折返啦。。。無啦啦白白晒咗我半個鐘嘅時間行咗過黎！番到黎香港上網搵番D資料，原來3個月前呢D嘅租約完咗，所以所有嘅餐廳都執晒。。。本身仲諗住尋日我生日黎食飯，好彩最後搵唔到吸引嘅餐廳放棄咗，如果唔係，生日先搞成咁仲慘！！

之後就坐番捷運去巨蛋站，諗住去行瑞豐夜市。去夜市之前仲去咗巨蛋隔離個商場行下。