Janis & Jack Wedding Big Day！終於到喇！

終於都黎到17.4.2014呢一日，早幾日都真係訓得唔係咁好，連續幾晚都唔可以一覺訓到天光。朋友問我係咪緊張，我又覺得唔可以用緊張黎形容，只係不斷反覆諗有冇野漏，有冇野未做 (咁咪即係緊張law!)

我呢個新娘子，相信相比新郎、同咁多個兄弟姊妹中，應該係最遲起身嗰個 (笑)！姊妹們都係去我屋企集合，約咗化妝師同伴娘6:30am黎到開始化妝。我梳洗好之後就大概6:30am，收到化妝師Yvonne個whatsapp話架的士兜錯路，要遲少少 -_- 等咗一陣，佢助手先上黎幫我整住頭髮先。。。之後Wun同Mayling都上咗黎喇！整多咗15分鐘左右化妝師終於都到喇！佢黎到之後我見佢又無手快地追番時間，而中途更加停咗手腳咁吹水。。。咁我諗住佢知道我個rundown，同埋佢做開婚禮化妝，應該知道時間，所以都唔好意思催佢。本身我無戴錶都唔知時間，直到化到中途聽到姊妹winnie話新郎同兄弟已經到左樓下，再加上攝影師們已經到晒，再話我知個時間有d tight，我方知真係慢咗好多。。。（其實試妝嗰時都見到佢好似有d手慢，但當時以為試妝應該係慢慢試，點知原來佢真係慢。。。不過到後期晚宴轉妝，個速度又ok wo！？可能朝早要warm up？）本身已經遲咗好多，再加上佢整完我個頭，個前陰部份唔啱我個要求 (識我嘅人都知我對我嘅前陰有一份執著!) 因為時間關係，夾硬都要出去影咗d相，但全程我個樣都係不情願同不安。。。之後，到佢地落咗去影新郎同兄弟嘅時間先fine tune番，我心情先好番少少。。。但，我成朝個rundown已經遲咗差不多一個鐘！=_=

同姊妹們影咗一輪相之後無幾耐就聽到佢地上黎喇！由於個接新娘遊戲我同姊妹們一齊花咗好多心機去度，早幾日襯積去咗澳門，仲特登約咗姊妹們上去我屋企幫手諗遊戲同整道具！所以其實我勁想睇佢地玩成點！但無奈我唔睇得，只可以聽！但就咁偷聽都已經覺得好好笑！

(之後就梗係要睇番相同片啦)

應該因為遲咗嘅問題，搞到要cut走一個game！嗰個game應該會好好笑，不過無時間真係無辦法。。。所以當我以為佢地仲會玩多一個game嘅時候，已經叫我入番房，準備讀愛的宣言喇！

呢part最好笑係，爸爸拖住我手帶我出房門嗰一下，我仍然係處於搞笑mode！所以當我行出黎嘅時候，見到有幾個好姊妹感動到眼濕濕嘅時候，我反而覺得好笑！(笑反了)

出到黎就係敬茶時間，之後就快快手手執埋野出門喇！Book咗架咁靚咁可愛嘅餓靚之van做花車，梗係要影番夠本啦！架車加咗我之前登特去買布搵人做嘅粉紅波點蝴蝶結，真係好kawaii呀！(心心眼)

積難得地記得我地book呢款車嘅時候特登揀咗天窗款，竟然記得主動要求企上去喺天窗
影相！好靚呀！叻仔！ (大拇指)

之後就出發去男家喇！積屋企喺元朗，我地一齊咗咁多年，當然深知馬鞍山同元朗嘅距離，所以一早都已經預咗一個鐘頭車程， 終於都到喇！

積哥哥喺窗口等我地番黎，所以可以高抄影到相！

因為伴娘嘅高度關係，我需要著一對8cm高嘅高跟鞋，對於甚少著高跟鞋嘅我真係舉步艱難！加上套褂個腳係好窄，我必須小碎步咁行。。。加上又拍片又影相，平時好快就行到嘅路程，今日行咗好耐都未到。。。

積黎到門口等緊佢地set機嘅時候，又興致勃勃咁話一陣想點影點影，但明明就唔夠時間，所以最終只有拍片而冇影到相。。。入門喇！入到去攝影師問奶奶佢地要唔要d咩拜神儀式，奶奶話叫我地去個神櫃度扣三個響頭講自己個名 (響頭？！) 我第一時間打咗個突，然後全場都笑反了天！大家都相信奶奶只係分唔出躹躬同古裝片式嘅扣響頭分別！我當然相信佢只係分唔到啦，難道我真係著住套褂趴喺地度扣響頭麼？(驚嚇樣)

攝影師被偷拍到在偷笑呢！

之後就開始敬茶，今次奶奶全家，就連哥哥家姐們都係用跪的，膝蓋好酸喔～～(米字面)

快快換過回門衫後就一齊快快吃飯，題外話，訂嘅元朗盆菜又幾好食wo！時間關係，喺門口補拍片之後，食飯嘅時間只有15分鐘都無，大啖大啖食完又出發番馬鞍山喇！

差唔多完成早上嘅流程，放鬆咗一半，自拍一下先！

番到去俾原定時間遲咗一個鐘 (因為出門時遲咗一個鐘ma，汗) 燒豬師傅等咗成個鐘，我其他親戚都呆等咗一個鐘， 我家姐同隻豬玩自拍咗幾個字，原來佢咁重口味！（大笑）

終於可以切豬啦！

完成切豬後，轉妝準備出發去外影喇！本身諗住外影係著婚紗，但因為件婚紗個拖尾好長，又俾婚紗公司恐嚇我，如果整咗D洗唔甩嘅污積上去係需要成件賠的，聲稱係過萬元的！我當然唔敢搏。。。但我本身買黎外影襯婚紗嘅頭飾就用唔著喇！初初整咗個頭，我又覺得唔滿意，明明就係跟住我台中pre wedding既其中一個造型去做，之後yvonne有同我分析係因為個頭飾問題，咁我覺得都講得啱嘅。。。於是乎我又轉過個髮型！好彩轉髮型都算快！咁我地就可以快快出發去沙田外影喇！

出發前同伴娘影張相先！

去沙田影嘅原因係我同積係喺沙田度相識嘅，加上由馬鞍山去紅磡經沙田都算順路，所以就順理成章去沙田影啦！

商場入面都有影到！好正呀～

因為今朝嘅時間太趕，為免又趕唔上schedule，我地今次控制個時間控制得好好！加上兄弟micheal熟練嘅駕車技術，我地比原定時間仲早咗去到場地！

又轉妝喇！換上迎賓裝之後， 仲有時間影一陣相先切蛋糕！

之後就開始敬茶同影相喇，因為今日好多親戚朋友都係收工先黎，所以早D嘅時間黎到嘅人真係唔多，所以好輕鬆咁影！

等到差唔多原定換衫嘅時間都未見我同積公司嘅同事黎，本身我地真係想等，多得MC兼統籌 Louie幫手，勸我地入去換咗衫先，因為律師一早到咗，佢實在唔等得太耐！如果唔係佢，可能好晏都開唔到席！

我一直對於我公司嘅同事黎都有一種無形嘅壓力，話晒阿姐都喺度，搞得唔好好失禮架嘛！所以入去換緊衫嘅時候，我一直問住我嘅姊妹，我公司同事黎到未？當我換到七七八八嘅時候，聽到佢地話到咗，我就放下心頭大石！律師亦非常專業，由於我地個時間好緊湊，佢就叫我換咗衫之後，轉緊妝嘅時候佢入黎同我地講解進場，佢講得簡直快而準！

之後就準備進場喇，進場方式嗰度，明明之前講好由我爸爸帶領我入場，去到中間就交俾積架嘛，唔知做咩 Louie話積同佢講唔係，好在Louie好快就同我搞掂番安排好！終於進場喇！

spot light打落黎再加上頭紗，真係咩都睇唔到，再加上我一隻手要拎住花球，一隻手要拎起個婚紗，我真係全靠爸爸幫我帶路。

上到台準備證婚儀式喇！唔知係個look嘅問題定係只係角度問題，朋友share出黎d相影到我肥到痴線！(大哭)

呢張做咩笑到咁？多謝積哥囉！真係要笑足佢成世！ 「我請在床各人見證。。。。」在床呀救命！全場爆笑！我地笑到差D停唔到，佢有d fd仲大叫「加油呀 Jack」宣誓都要人打氣！-_- 之後我地停落黎，律師好認真咁同我地講，「再讀多次！」最好笑係，積幾個禮拜前沾沾自喜同我講，我已經背咗句結婚誓詞喇！我仲話得嗰兩三句，仲要有紙睇嘅，背咩呢？點知，背咗原來會咁。。。呀～呀～呀～（烏鴉叫）佢讀錯完之後，搞到我勁緊張，即刻字正框圓咁讀！我就當然無問題啦！

之後到致辭，積就當然又係緊張到想講咩都唔記得啦，我本身都冇咩準備，所以有d野想講我冇咩講到。

儀式完咗，我又入去換件敬酒衫喇！呢度就發生咗件意外，話說我換完件敬酒衫，出黎行咗幾個圈，同公司同事影咗一張相之後，就坐咗埋去睇朝拍晚播！

到到埋番位坐咗一陣，諗住要敬酒啦！積又話想我行去同佢公司同事嗰枱影張相，因為可以做埋即場派相，點知行咗過去，佢阿姐又行開咗，擾擾攘攘之後，就坐番埋位。就係呢個時候，坐番埋去嗰時張凳"kick"住咗對鞋。。。我彎腰落去整嘅時候，我條裙後面條拉鏈。。。爆。。。咗。。。！呢個時候我背脊涼一涼 (都唔知係心理上定生理上嘅涼意)，我保持冷靜咁"唉"咗落個椅背度，同側邊嘅伴娘講「我條裙爆咗！」(呢個時候我終於明白點解新娘身邊總要有個伴娘伴住) 佢即刻走咗去同個化妝師講。而呢個時候，因為啱啱Louie就企喺男主家席同女主家席嘅中間，我就叫佢幫我叫我媽咪過黎。因為我媽咪識黎車衫，我相信佢有一定嘅經驗幫我睇到衫裙有冇得救.......之後佢話條拉鏈已經certified.....之後幾個姊妹都過咗黎，本身化妝師除咗佢件外套披咗上黎，我同媽咪都即刻叫唔好！(咁咪係人都知咩事囉！！) 不得不讚嘅係，我阿媽真係一個處變不驚嘅人！

呢度扯開少少，因為上年我同媽咪去北京旅行嘅時候，我又係突然間隻鞋爛咗，為咗唔好俾D團友知道咁尷尬，我阿媽又係處變不驚咁cover我，我地係順利咁買到支膠水貼番隻鞋，再番番去食飯而冇人知！！！勁野啊阿媽！！！

講番現場，我阿媽叫停咗佢之後，就叫姊妹去拎件披肩俾我！因為爆嘅幅度係好大，係成個背脊都出咗黎！件小小嘅披肩係唔能夠遮到的.....於是乎我叫班姊妹們圍住我，我地就直衝入番新娘房！呢個時候原來在場嘅人都有唔同嘅想法......剛剛行過黎嘅姊妹問我係咪頭暈，遠處嘅兄弟就以為我地嗌交......證明係冇人知道事實嘅真相！

入到去再證實條裙已經無得救嘅時候，唯有決定著番套褂出去敬酒......我本身已經唔鍾意著褂，所以一直諗住只會喺朝早著一次，夜晚本身都冇諗住再著！但去到呢個時候......雖然我好不爽......但都辦法啦！唔知係安撫嘅說話定咩，化妝師同身邊嘅人都不斷話，好多人都會著褂黎敬酒的.......換咗褂之後就出去敬酒喇！

本身我地都諗住無咩特別活動或表演，所以敬完酒，再補影埋相已經準備送客喇。

婚禮後，積嘅舊同事不斷捉住佢飲酒，爸爸拉黎佢出黎都仲想番轉頭，搞到爸爸勁唔放心想送埋我番屋企.....=_= 好彩結果佢都無再飲，仲搵咗兩個清醒嘅兄弟幫手送D野番屋企。

準備咗咁耐嘅婚禮就完滿結束喇！