Janis & Jack～～＊幸福點滴～～: 高雄墾丁生日之旅2015

已經係連續第三年生日同積去旅行慶祝喇！兩年前去台中慶祝生日嘅時候係影pre-wedding，兩年後已經成為人夫人妻嘅我地再次揀去台灣慶祝生日！

今次揀咗想去好耐嘅墾丁，可能會奇怪點解唔夏天先去墾丁，主要原因係我地都唔會玩水上活動，冬天夏天黎都無所謂啦！

我地儲咗好耐嘅Asiasmile終於都用到喇！換到兩張高雄來回機票，淨係俾稅就得，爽呀！高雄本身都無budget airline去到，真係fit晒啦！所以我地今次係坐嘅係港龍航空。

為咗唔駛天未光就起身，我地揀咗10:55am班機，都要7點幾出發，仲早過番工架！但去高雄只需要一個鐘頭左右，所以12點幾就到步喇！高雄機場唔大，一行出去就拎到行李。

換埋錢就行去坐捷運去高雄火車站，我地今次好創新地揀咗台灣好hit嘅motel。真係唔好以為motel係情侶先會去，我上網搵資料嘅時候，發現係勁多當地人帶小朋友一家大細咁去！話明係汽車旅館，D人都係揸車去嘅，所以好多都係喺D交通好唔方便嘅地點。我地左揀右揀，終於揀咗呢間又大又靚，仲要係喺市中心範圍嘅「華納不只是motel」

http://www.hwanah-motel.com.tw/index-1.php

book呢間motel嗰時真係好麻煩，因為佢多數都係做當地人生意，我地冇當地銀行咭，網上又俾唔到錢，結果要打電話去問先hold到房。五點先拎得房，所以我地喺高雄車站坐的士過去放低D行李先，好期待我地揀咗好耐嘅房呀！

放低行李之後，Motel幫我地叫咗的士，呢個房就係lobby喇。

佢個地圖mark到好似行都行到去火車站，去程坐的士嘅時候就知無可能啦，我諗行半個鐘都去唔到呀！好彩坐的士都唔貴，所以我地就直接去新崛江商圈喇！

去到嘅時候又未肚餓，所以諗住行下先。我一見到D夾公仔機就俾佢吸引到，台灣真係好興夾公仔，間舖入面有好多部機排晒喺度，真係見到都覺得開心！最好嘅就係佢每一部都會有個保證銀碼，即係話你入到嗰個錢或之前就一定會夾到，咁自己就可以衡量嗰個錢去"買"呢隻公仔值唔值得啦，咁起碼不至於得個吉！

我揀咗呢個警長胡迪，好得意呀！

我未去到個保證銀碼就夾到，感覺上好似賺咗！

之後我地就去行街喇，我本身好有target想買衫嘅，點知我就揀唔到 > < 積反而買到4件恤衫，又平又靚！真係羨慕。。。衫就揀唔到喇，點知我行行下去到個原宿商圈無意中入咗個大賣場，入面D野仲平過cosmed，對於勁易曬出斑，冬天都搽SPF50防曬嘅我，就掃咗佢一堆防曬液！仲有指甲油呀嗰D，都好抵呀～～我地邊行邊食野，食咗少少小食。

因為夜晚一早book咗去鼎王食麻辣火鍋，如果再坐低食飯又怕太飽夜晚食唔落，所以決定行多陣就早D去鼎王喇！

行咗陣我都無咩斬獲，咁我地去咗中央公園影相，我生日嘅二月二十八日係台灣法定嘅二二八假期，我前年黎嘅時候已經知道，今年原來佢地仲要一連放咗3日假，今日係第二日，所以周圍都好多人，包括呢個公園，勁多親子喺呢個公園郊遊。

影完相之後，我地就直接坐的士去鼎王喇！YUMMY～～前年食過之後一直都好懷念！

極優質嘅服務，D店員不斷躹躬，真係好到我都唔好意思！

同埋佢湯底嘅鴨血同豆腐真係毫不吝惜，下次有機會再去，真係記得唔好點太多野，淨係食佢個湯底都飽咗大半！我地兩個人點4樣都爆胃！

食飽之外，我地就行咗去六合夜市。一去到六合夜市，我就俾呢個射氣球遊戲吸引，因為之前睇台灣嘅偶像劇見到D人玩已經好想玩。

點知佢呢檔都幾流，TWD50一局，我地問個阿姐點先有獎，佢話有打就有獎，話一局有13發子彈。最流嘅係我佢支槍係有紅外線，如果唔係盲嘅都一定打中晒。之後打完一局佢又問加唔加多局，打下打下佢就話我地打咗5局，話可以揀邊D邊D公仔。

基本上都唔係好知個玩法，不過TWD250換到一隻公仔都唔貴啦，反正我本身都想要！於是我就帶埋呢隻兔兔番香港喇！

因為食得太飽嘅關係，所以見到D野食都食唔落。不過向來我個胃都有兩格，一格放甜野，一格放咸野，就俾呢個盆栽雪糕吸引咗。

味道就一般啦，不過就真係好得意！

六合夜市唔係好大，行咗一陣就行完喇，加上我地又唔駛食野，所以好快就行完。之後我地就行過去美麗島站，其實都冇咩野睇，係睇個站入面嘅設計，但其實係同旅遊書上見到嘅係一樣，甚至係睇相仲靚，但都要到此一遊嘅，哈哈！

去到嘅時候都有好多人影相，我地是但影咗幾張就走人lu～

本身諗住直接去坐的士走，點知醒起今日我生日未買蛋糕，於是諗住行番去六合夜市度買。旅行慶祝生日就會有呢個問題，就係周圍搵蛋糕買，但又唔可以係成個wo，因為兩個人會食唔晒。

行番轉頭途中見到個南華夜市，反正經過就當然唔會放過啦。但呢個夜市全部都係賣D好老土嘅成衣，好似元朗街市嘅貨色，但呢個夜市可能係機車嘅捷徑，中間無停過咁有好多機車穿插，搞到好難行，又一陣陣機油味。