新加坡四日三日破天荒之旅 (Day 3 - 聖淘沙Beach、黃亞細肉骨茶、烏節路、牛車水)

今日我地會轉番去市區嘅酒店，我地朝早去咗尋日無開嘅馬來西亞美食街食早餐先。美食街入面全部都係黎自馬來西亞不同地方嘅美食，因為我地幾個月前去過檳城，食過佢個檳城喇沙真係一試難忘，唔同新加坡嗰隻喇沙係咖哩口味，呢隻喇沙香港真係無得食。。。所以一見到我地又要食啦！ＹＵＭＭＹ～～～

之後仲有上次去檳城無食到嘅ROJAK，係用D醬撈咗D生果同油炸鬼，味道都幾特別。仲有食咗雞煲飯同炒粿條。

食完早餐之後，我地就去埋聖淘沙海灘行下，聖淘沙海灘主要由三個特色海灘，包括Tanjong Beach、Palawan Beach同Siloso Beach組成，我地首先坐番聖淘沙express去到Beach站，再轉沙灘接駁車去Palawan Beach。

過咗吊橋之後就係太平洋最南邊嘅位置。

因為我地唔游水，所以都係影下相到此一遊。之後就坐番接駁車去Beach Station，黎嗰時係架小巴，回程坐到度假車喇！

番去之後，我地check out間房就call的士去市區酒店喇！我地第二間酒店係Dorsett Hotel，地點方便，步行就可以行到去牛車水！

我地放低行李之後就出發去黃亞細度食肉骨茶喇。呢間肉骨菜好出名，話以前賣晒就會收檔，話早幾年曾蔭權黎過都要食閉門羹，仲有好多其他名人黎過添！

黃亞細嘅肉骨茶好濃藥材味，加上好勁胡椒，好好味，不過夏天食完真係成身汗，哈哈！冬天食就真係一流，所以我地都買咗幾包肉骨茶料番去，冬天自己再整黎食啦！另外佢D鹵水都唔錯。

食完黃亞細之後我地就坐咗的士去烏節路，我地首先去咗ION Orchard

入面有間Bengawen Solo賣斑蘭蛋糕，但因為佢係新鮮做，所以保質期只有兩三日，所以都唔敢買太多黎做手信。因為唔係番去即刻會見到嘅人係唔可以送呢～～> < (後來發現，原來機場店夜晚收好夜，價錢仲要一模一樣，仲要可以退稅，早知唔駛拎兩日-_-) 即場買咗一件黎食，真係好鬆軟呀！

之後喺大街買咗件麵包夾雪糕黎食，呢個配搭都唔錯，重點係好平！為番起幾蚊港紙一件，喺新加坡消費指數咁高既地方真係搵唔到！

行多咗幾個商場，就坐的士去牛車水。都話過咗5點坐的士唔抵架啦！唔記得又坐！又俾貴咗喇！

去到之後我地行咗陣街，買咗幾件T shirt。再行去搵馮滿記買藥油啦，本身以為好多地方都有得賣，點知原來係得一間！行咗好耐先搵到，點知無開。。。唔知係收咗舖定休息。唯有聽日再黎過啦。。。

之後再去咗Smith Street食晚餐，之前食咗D野都未落隔，同埋食咗太多濃味野，揀咗個田雞粥，都好好味呀！

之後積送佢媽番酒店休息，我同媽再行咗陣街，等積番番黎，我地再食埋甜品就行番去休息lu～