自從上年有咗Lincoln之後都一直無機會去過旅行，不知不覺原來已經有年半無搭過飛機！天啊！之前一年去幾次旅行，我竟然年半都冇去過！生咗Lincoln之後其實一直都唔捨得放低佢，但當諗到襯而家佢未係好認人，同埋除咗工人姐姐仲有婆婆幫手睇住，而家唔去，真係唔知等到幾時先有得去！>< 心理爭扎咗幾個回合，終於買機票準備出發喇！
之前一直都心思思想去東京，有本2012-2013年版嘅東京閃閃書喺屋企一直都冇機會用，就證明幾耐之前已經想去！所以今次揀目的地，諗都唔駛諗～～～～Tokyo～～I am coming！
話說真係太耐冇去旅行，原來本passport過咗期我自己都唔知，好彩！真係好好彩！(我想講十次) 老公積今次真係唔知食咗幾多筒聰明豆！竟然發現我本passport過咗期！好彩夠時間續証！因為原來而家拎特區護照係冇得因為旅行原因而拎快証，好多人臨出發先知過期之後上網求救！食住花生嘅網友嘅回答係。。。「準時番工罷啦」、「香港其實有好地方玩」、「當俾錢買次經驗啦」。。。我真係幻想唔到如果當我好無助咁問人，仲要收到呢D回答我會唔會打爆個mon！而老公積應該都唔會自己一個人去！ 兩個人！兩張機票！！仲有酒店！！我諗我呢世都唔會原諒自己！哈哈！好彩以上都唔會喺現實出現！因為我已經成功續証等出發喇～～～YOHOO～～
本身係見到HKexpress嘅特價機票而想去嘅，點知左夾右夾個日子之後又唔啱，最後買咗香草航空，仲要係年青人嘅首選，凌晨機去，夜機返。我咁嘅形容並唔係想tag自己係年青人，而係想講。。。去完之後我地發覺我地原來已經唔年青，尤其係昔日嘅積仔已經變咗鄭伯！
仲以為自己好醒，出發嗰日仲番工，以為好型放工番屋企拎行李先去。。。又好衰唔衰仲要OT。。。基本上去到機場已經攰到hihi。。。
殘樣 x 2
基於都真係會掛住個仔同我本身係一名人奶媽媽，當過下癮，快去個四日就夠皮喇！餵緊人奶嘅關係，掉低阿仔去旅行都真係要多好多功夫！好彩我本身都算係小富媽，早喺放產假同番工初期已經儲咗40幾包冰奶喺冰箱！為咗可以去得輕鬆D，唔駛去住旅行仲要掛住點keep D奶，又要顧住點消毒D用具，所以決定唔帶D奶番香港！臨落機前泵奶先！
時間剛剛好！泵完就落機喇！
簡單一個冬甩都硬係好食過香港嘅！
買咗張Subway嘅3-day pass之後就去坐Tokyo Shuttle去東京站喇！
因為班機有少少delay嘅關係，比原定時間晏咗，爭扎咗好耐好唔好拎埋件行李直接去台場。但又唔想之後行街一直都拎住件行李， 反正又買咗day pass，最終都決定去咗酒店放低行李先。巴士喺東京市八重洲站落車，行咗勁耐超耐，兜咗唔知幾多個圈都仲喺個JR站，再勁行先成功去到個metro站，再狂兜終於去到我地要坐嘅丸之內線！
酒店係新宿歌舞技町嘅APA Hotel，因為之前book咗一個月後出發嘅機票，朋友介紹嘅酒店好多都full咗，又無時間plan行程，所以好草率就book咗呢間酒店，諗住近新宿都無衰，之後我地拖住個喼行呢條路就知出事喇！
因為我地買嘅係metro pass，最近嘅站係新宿西口，但佢每一個出口都要行長長嘅樓梯！去程都仲還可以，回程滿載而歸嗰下真係想死！下次book酒店真係唔敢懶。。。
沒有留言:
張貼留言