終於放低咗件行李可以出發喇，第一站係去食吉列牛定食！因為跟住會去新橋部搭百合海歐號去台場，所以我地去咗新橋站嘅分店度食！
用GPS跟住個地圖行，明明見到未到，但望過對面間餐廳張相又好似喎
諗緊會唔會係個GPS delay咗啦，行咗落去見到無人排隊。。。無理由架，網上明明話都要排下隊架？之後望入去，唔係喎！睇人D相，係有塊石板燒架，呢個都無！即刻走番出門口，再上網對多次，好險，差D食錯咗，哈哈！之後再跟住個GPS再行，今次啱喇！
真係有人排隊。。。仲排咗我地半個鐘有多。。。不過我諗稍為有人介紹嘅食店，排一個鐘頭內都算係咁。
開餐喇！
外脆內軟，個略嫌個調味重咗少少，唔係好食到牛味，有碟係應該准山蓉，勁似鼻涕，撈咗幾啖飯都係頂唔順個質感，成件事可以一試但唔需要再食。
本身夠鐘泵奶，但因為啱啱間餐廳太細唔適合做呢件事，所以要快快去下一站！就係台場嘅大江户溫泉博物館喇！因為尋晚通宵機，諗住去浸下溫泉休息下。行番去新橋站坐百合海歐號。
因為諗住會去埋其他站行街，所以買咗Day pass 。
大江户溫泉博物館喺電信中心站隔離。
落車行十分鐘左右就到喇。
入場首先要喺locker放低對鞋先
之後會再俾個手牌你，場內所有消費都係用個手牌去紀錄，走嗰時先俾錢
之後就去揀浴衣喇
入去更衣室先
有個好舒適嘅化妝間，風筒、面霜、潤膚膏全部野一應俱全，基本上就算要黎過夜帶個人黎都ok！咁舒適嘅環境就梗係坐低慢慢泵奶啦！
之後換完衫就出去大廳搵番積喇！場內用咗大江户時期嘅設計，梗係影相先啦！
喺場內周圍行咗一陣，就出咗去場外，呢個泡腳池係唯一一個可以男女一齊嘅溫泉。
天氣都幾熱，再浸落D熱水度個feel其實係爭少少。。之後我地就去大浴場度浸喇。日本嘅溫泉係一絲不掛，我地就分別去男女浴場度各自浸喇。雖然一個人浸係有D無聊，但諗到如果同friend黎大家肉帛相面又真係有夠尷尬。。。所以都係一個人自然D，哈哈！
入面有好多個池，又再分室外同室內，仲有按摩浴池，我浸到對手都摷晒皮先捨得出番去！搵番積之後我地就買咗碗冰食，個綠茶味同D丸子好好味呀！
之後我地就去咗個休息室瞓覺喇，一瞓落去就瞓著咗，但瞓咗未夠一個鐘，有個男人D鼻鼾聲勁誇張，搞到我發夢見到哥斯拉！嘈醒我之後我就瞓唔番，咁就撤退啦！
去番大廳買咗碗拉麵食
之後我又去泵多次奶就走喇！呢個溫泉博物館真係好正，真係可以hea足一日！周圍都見到有人攤喺度瞓覺，哈哈！不過可能唔係周末，所以個場都唔係好full。但黎呢度做親子活動都勁正！我仲見到有個大肚媽媽抱住一個歲幾既BB再拖住個3，4歲既囡囡喺度浸溫泉，一拖三真係堅！
我地由日頭玩到夜晚！
迷你美國自由神象
彩虹橋夜景
之後就去行街啦！本身重點地方一定係西松屋啦！呢個間簡直係媽媽級既黎東京朝聖既地方！一入到去商場見到babiesrus忍唔住入左去！其實都好平，但一心諗住忍手留番去西松屋同Akachan先入手！我後來就後悔喇，原來佢已經好多款同算平！好忍手咁買咗一套衫俾勤勤就走咗喇！
之後去到呢個拉麵博物館，積最鍾意食拉麵，不斷主動要求影相。。。
門口影。。。
行入少少又影。。
再行入D又再影。。。
可以用拉麵控黎形容佢。。。
啱啱喺溫泉博物館食完拉麵佢又再拉麵。。。館入有好多間拉麵店
積揀咗呢間博多拉麵。
因為驚叫一碗會俾人西面，但我又想留肚食我安排咗既重頭戲壽司！所以叫咗一碗麵再加一碗迷你嘅豚肉飯，但又幾好食架喎！
麵係勁幼條嗰隻，個湯清得黎又好濃郁！個人口味覺得仲好食過長龍既無敵家。。。食完我地就向西松屋出發喇！
之後就去番新橋站食美！登！利！壽！司！
我地去到大概9點半，本身佢話佢地要關門，之後話要我地10點半交枱，無問題就可以俾我地入埋，咁梗係入啦！揀左店家推介既兩個set！
救命呀！！真係好食到震！新鮮既程度直情覺得D海鮮喺我個咀入面游緊水呀！！每一件都好食到頭皮發麻！我知我誇張！但真係堅好食！慢慢嘆到人地收舖。。日本人真係好準時。。所以好準時咁邀請我地離開。。美登利壽司真係令人再三回味！性價比極高！
沒有留言:
張貼留言