雖然只係兩日一夜，但我地諗住去游水，酒店又有草地可以郊遊，衫褲鞋襪、泳具加埋一堆玩具，執埋執埋都好多行李，我地第一個項目就係去迪士尼酒店入面嘅翠樂庭食自助午餐。所以我地直接call車去酒店。
一去到我地就見到chip & dale喺度，仲要唔駛排隊！即刻就衝埋去影啦!
勤勤之前會驚唔夠膽自己影，佢今次竟然唔驚。
直至到Chip & Dale係咁kiss佢，就開始面有難色，哈哈
一黎就有張大合照喇！
之後都仲未夠鐘，所以我地就喺counter換埋金咭嘅生日coupon，同埋幫嫲嫲佢地買門票。之前爭扎咗好耐究竟入一日園定兩日園，又左睇右睇D discount，點知去到當日佢地剛剛做緊個金咭優惠，呢個真係好優惠，就係金咭會員再買一日票只係需要$419。咁唔駛諗喇，即刻決定買一日票！
我地一入到去翠樂庭餐廳，Wow~~四周圍都係迪士尼嘅人物，Mickey~Minnie~Goofy~Pluto，全部都會喺個餐廳度行黎行去。勤勤興奮到爆炸，不停叫佢地個名。大人小朋友都唔會可以專心食野，哈哈!
直至到見到Goofy，我地問勤勤點先可以好似Goofy咁高，Goofy叫佢要食多D野，先可以長高，佢就真係乖乖坐番低食野！哈哈
加上佢地都係廚師嘅造型，我地當然又要話俾小朋友聽，D食物係Goofy同Pluto煮嘅，一定要食晒啦！
迪士尼人物嘅威力真係大，聽完之後，小朋友又乖乖食喇!
D食物其實都幾好食，熱盤嘅選擇都非常多。基本上每樣食少少都會飽到反艇。
我地又影相又食野，中途少爺勤又去左booboo，所以我地食到D人走晒我地先走。姑媽同表哥兩個就入園玩住先。
我地走咗之後仲要行番去探索家酒店checkin先，我地喺海旁嗰邊行，本身個路程話係10分鐘。
但我地......
見到咁靚嘅景色梗係要影相先啦！
到我地想同阿仔三個影既時候，少爺忽然話唔影，有性格我鐘意！我地兩個自己影～～
影完又一路行一路玩。
今日個太陽好猛，勤勤係咁話要sunglasses，之後佢一戴左就問，做咩咁黑嘅? LOL
有大家一齊行好興奮，所以全程佢都係自己不停跑，成頭都濕晒！
終於都到左探索定酒店喇！
拎到房之後，為咗令件事可以加速，我地安排兩位Daddy入房放低野，之後我地就出發去樂園喇！因為book房時唔知邊個優惠送咗兩張優先通行證，所以一黎我地就全部人一齊玩咗個迷離大宅先。呢個係唯一一個所有人一齊玩嘅遊戲，因為之後大家又再分路揚鑣。
玩完之後我地就同嫲嫲去咗玩森林河流之旅。
之後就去睇埋個米奇幻想曲。
今次可以坐到第一行，真係清楚好多。但勤勤都係有少少驚，夠膽自己坐但全程都捉住Daddy隻手。玩完之後，因為我地想夜晚去游水，所以我地就起程番酒店 lu~我地晚餐諗住去食華特餐廳，我地打咗電話去無得留枱，所以我地又分路揚鑣，因為Daddy絕對冇信心會帶得齊野.......所以我同伯伯去酒店拎游水行裝，其他人就去攞枱，我地拎完就行去餐廳一齊食野。
因為我仲勁飽嘅關係，所以我淨係叫咗份三文治，Daddy就食咗Salad。結果我飽到連份三文治都食唔晒，仲要打包。
行程實在太緊湊喇！野都未食完，又夠鐘去聽Story，我地帶住兩個小朋友去聽咗故事先。
呢一節係英文版，但呢個故事姐姐嘅英文就一般般啦。但原來呢個故事室入面係有好多玩具架！但我地聽完就出發去泳池喇!
因為係冬天嘅關係，所以室外游泳冇開，淨係有室內泳池，所以如果夏天黎會仲多野玩！
泳池有毛巾提供，所以原來可以唔駛帶咁多野。嫲嫲就去咗浸溫泉同焗桑拿。我地就出咗泳池，原來仲有救生衣提供，幫勤勤著咗之後非常安全。池水只有1.2m深，又冇咩人，真係可以放心暢泳，原來游水呢樣野，學識咗就真係唔會游唔番，我地冇游一排，真係又游得番。玩下玩下，我地都游到人地差唔多收場。
呢件米奇浴袍係上次會員7折優惠嗰時買嘅，今次大派用場！勤勤著住之後好開心，仲係咁邀請表哥影相，仲話要笑 XDD
全日都冇瞓過晏覺，一上車明明已經好眼瞓，但去到酒店見到表哥有得玩就即刻生猛番晒！
結果喺佢玩野去廁所又唔去廁所之下，跌咗隻拖鞋落馬桶，喊完就瞓咗喇！
因為我實在太醒瞓，所以成晚都瞓得麻麻地。加上勤少嘅睡姿，我成晚唔知食咗佢幾多拳！
我7點幾醒咗，8點幾就起咗身執定D行李。因為3間酒店嘅活動都可以join，所以跟本係可以排到D行程滿滿！
小朋友都醒晒，咁準備又可以出發喇！
因為我地諗住去芊彩餐廳食brunch，佢11:30am先開始，所以我地參加咗個新春市集先。
小朋友可以舞龍，但有D重，所以媽媽要幫手。
之後就係玩D攤位遊戲。玩完就有換禮物，小朋友最鐘意！
之後我地就去咗芊彩餐廳。
未夠鐘，小朋友見到草地又雙眼發光，衝呀！！！
生日coupon係brunch set買二送一，係半自助餐形式，仲可以出去拎沙律，食物都幾好食。
食到飽飽又計劃玩咩喇，出發去隔離個Hollywood hotel玩下先。又有草地，小朋友又衝呀～～～
有機會玩bubble，好興奮！
仲有個sir滑梯玩！
忽然又話唔想影相，自己坐埋一邊冷靜下，哈哈，呢個小朋友情感越來越豐富！
好多影相位～～
影完之後我地就去咗馬里布遊戲室，係類似冒險樂園嘅遊戲機可以免費任玩。
唯獨係有個推糖機，勁呃錢，$5/ round，只係推一下，唔洗過錢唔安樂嘅Daddy Jack，用咗幾十蚊先推到兩粒出黎........
其實入去呢個遊戲室係冇人會check你，所以其實係人都可以入黎。
之後玩完我地出黎見到有呢個賽車遊戲，好好玩呀！
本身仲驚勤勤唔識玩，點知佢好快已經控制得好好。
玩完仲有個獎牌同駕駛証俾番你，好認真！
唔多人，所以我地玩咗兩round！
好靚呀~~~
之後仲有得玩kinetic sand，勤勤對玩沙係有個情意結，非常投入！
玩完之後我地就參加大堂個跳舞派對，昔日怕醜嘅勤勤已經唔見咗，佢好hyper咁自己走出去freestyle，仲一齊同哥哥姐姐跳舞，主動拖人隻手。
最後仲有Goofy出現同大家一齊玩！小朋友嘅心情真係變幻莫測，玩到尾見到個迪士尼姐姐冇啦啦喊，之後仲驚咗佢本身最鐘意既Goofy，話驚Goofy會食咗佢.....
同大家一齊影完相之後 ，嫲嫲佢地就撤退
我地繼續奮戰到底 LOL 沿路勁hyper
我地又去番迪士尼樂園酒店。今次我地又行番個海旁，勁大風，但勤勤勁興奮，全程都係自己行!
我地去咗Storyroom參加遊戲，呢個即係尋晚聽故事個地方。入面有好多玩具，媽媽都好投入！
但原來個遊戲時間係同D姐姐玩D好簡單既拋波波，玩完又有貼紙，勤勤玩完一次就去咗玩玩具。佢非常投入，但我已經好眼瞓，所以邀請佢出去玩迷宮。
呢個迷宮其實都幾好玩，小朋友嘅視覺都真係好難先出番去。同埋如果佢行走咗都幾難搵番佢，所以我一直都跟住佢後面叫佢帶路。
玩完之後我地就call車撤退lu～～呢兩日嘅迪士尼之旅真係好充實！如果夏天黎應該會仲多野玩～～期待下次嘅旅程！
沒有留言:
張貼留言