今朝一早起身未check out，積話再去多次泳池游水，而我就喺個浴缸度浸浴。 我用咗個玫瑰浴鹽，成缸水紅色，好似有少少恐怖，哈哈！
個蛋糕尋日溶咗少少，轉向無溶嗰邊黎影相，都唔係好覺啫😅
我哋打電話畀阿仔，同阿仔一齊唱生日歌！
個蛋糕其實都唔算好難食，不過勁多奶油。
食完之後我哋就check out，然後出去食lunch啦！
我哋揀咗間西式餐廳，但又有少少泰國嘢食。
啲嘢食都ok，我哋好hea咁食完個lunch，就行返去酒店等cooking class個pick up。 但諗諗下，我成個trip都冇食過芒果糯米飯。於是我哋求其去咗間餐廳買take away。
返到酒店喺個lobby度食
之後就真係火都嚟埋， 話說個cooking class我哋本身都諗住喺返klook度book，點知我哋想book嘅時間又冇，唯有上網搵其他，最後我地係喺cookly個網站度book，間餐廳又無主動confirm，咁我哋自己主動打電話去，前一日confirm咗係兩點半pick up， 夠曬鐘都冇影，又無人打電話黎，我哋就打電話去嗰間b's restaurant度問，一開始就話上午班遲咗落堂，話個司機黎緊，會遲30分鐘！都算喇，30分鐘之後又唔見影！我地又打去！佢不停係咁話個司機嚟緊，我地問佢直接拎司機個電話，又話叫個司機打黎，等極都無！我地等下又30分鐘，等下又30分鐘！！之後又話塞車！已經等咗超過一個半鐘，真係超乎人體極限！再打去仍然話個司機黎緊，又話佢打咗黎，個電話唔啱blablabla！我地已經去到要爆炸嘅地步！
因為我地已經check out咗，佢又不停話就到，我地只可以坐喺個lobby度等，又無冷氣，又無野做！我地鬧爆佢仲要串咀話從來無人complain 過？！即係我地等咗成2個鐘之後嬲係我地唔啱？！本身都有諗住算數唔上，但因為今晚坐夜機，一早plan好係上完cooking class 就直接走，咁多個鐘又唔知去邊打發！加上今日係積生日，佢一早話想上cooking class，又唔想上唔到咁遺憾.....終於！等咗真係差唔多兩個鐘！！個司機終於出現，仲要架車唔兜入酒店，要我地自己行出去！！其實都真係著晒火！！
一上車，個司機唔係local泰國人，而係一個歐洲人樣嘅中年男人。我地上車之後，無道歉，無唔好意思，我地本身都無出聲，佢竟然仲要主動講話，我地因為係pm class，所以係要等am class完咗，佢送晒D人番酒店先接到我地。而am class 今日遲咗完，加上又塞車！佢地一早已經同咗cookly講，pm class個pick up 時間係唔固定！
下？！無人講過囉！同埋你am class遲咗就要我suffer？！我白白浪費咗2hrs！上少咗堂嘅時間邊個補賞？！同埋係不停話黎緊黎緊，一早話要多2hrs，我去按個摩都仲得啦！本身我地都忍唔住嘈咗幾句，之後佢仲好似怪我地係咁打去B's嗰度鬧嗰個人，嗰個bees喊晒口咁話唔知點算？！
下？咁又無人聯絡我地，得餐廳一個電話，唔打去打去邊呀？！
之後！我地本住反正都要繼續上，嬲黎都係影響心情，所以算數！真係唔知邊度得黎咁大量，而家講番其實都嬲！同埋本身我地以為個男人只係司機，所以同佢理論都晒口水，點知後期呢個男人係一直都繼續出現，同個bees又勁friend，又一齊上堂，關係好唔尋常......
Anyway，大量嘅我地終於到咗個market！話個bees會帶我地去買餸，架車停咗一邊叫我地落車等佢黎。
下？人又唔見，我喺個街市門口咁多人點等呀？之後我地好疑惑，佢就話咁我地可以喺車上面等。OK！又等！等到花兒也謝了！十幾分鐘之後終於見到佢施施然行出黎........佢一黎就問我地係咪仲想繼續。
唔通我等咗2個鐘，終於等到你地接到我地黎，再特登再等到你出現，d9你之後話唔玩咩？！
之後又真係唔知邊得黎咁大量，我地只係回應咗句yes......
之後佢一買咗杯蔗汁請我地飲....算數，無謂激親自己！
跟住就傾我地想煮咩，之後我地就入去買材料。原來成班係得我地兩個人 (我相信就算有其他人應該都嬲到走咗)，我地可以揀4道菜，我地揀咗冬陰公，炸春卷，青木瓜沙律同咖喱雞。
佢一路買，一路有介紹唔同嘅材料俾我地認識。
呢度買嘅原材料平過香港好多好多！但因為時間有限，我地都係快快手買，其中有D辣椒，佢有買多D俾我地拎番香港。
買完之後，臨上車之前我地仲買咗幾個芒果番香港，真係又平又好食！
之後我地就番到去佢個餐廳，其實係佢間屋。佢屋企門口就係煮野嘅地方。因為我地今晚要坐飛機，唔可以太晏走，要追番佢浪費咗我地2hrs嘅光陰，我地煮嘅時候，一人負責一道菜，其實嚴格上我地係學少咗野，因為咁樣我地只係每人學到兩道菜，不過去到呢個地步就算數喇.....
我地自己去洗番D材料，之後就準備開始喇！
呢盤係準備煮冬陰公嘅材料。
之後我就率先煮咗個冬陰公湯先，咁多道菜入面，最好食就係呢個，我地即場就食晒！
之後積就負責煮個咖哩醬，就係呢個外國人喇，佢唔只係司機咁簡單，佢又會幫手喺Bee's個雪櫃幫手拎材料etc. 仲幫手煮
正宗整咖哩醬嘅方法應該係用個盅，但又因為係時間嘅關係，我地用攪拌機。
仲要佢地拎咗隻類似木匙嘅物體，之後攪難咗.....即係話D醬入面會有個匙嘅殘渣......Bee's聲稱係用椰子做既....所以唔怕...
個咖哩其實麻麻地，我覺得我地自己煮嘅仲好食...
之後我就整個春卷，原來整春卷都好簡單，但佢呢個style就好中式，完全冇泰式feel。
最後就係個青木瓜沙律，但其實都係麻麻地好食，所以都係當一個體驗。
之後我地煮完食咗少少就take away喇，因為我地夠鐘要去機場，好彩我地本身預鬆咗少少時間，本身仲諗住落咗堂仲可以去多次massage，點知就白白浪費咗喺晏晝等佢地嗰2hrs上面......仲要個時間剛剛好，佢送番我地番酒店，喺Klook book嗰架機場接送車已經到左。不得不提，我地成程book咗Klook嘅所有野都又抵又準時又可靠！真係好讚，下次去旅行都可以考慮再用!
之後我地去到機場，我地去咗個VIP lounge，唔似平時去香港嗰個，佢只係好似間細細嘅餐廳咁......本身仲諗住可以沖下涼，瞓下覺。因為我地係通宵機番去，一早就要同阿仔去運動會。
最搞笑係積上網見到有個15mins free massage嘅service，佢諗住去問下，點知個staff即刻就安排咗兩個大媽過黎，即場坐喺度就按......勁老尷，哈哈哈！但佢已經黎到又冇理由reject佢，之後就係眾目睽睽下俾佢按摩咗15mins......
班機delay左一個鐘.......我就喺呢個餐廳卡位瞓左一個鐘，之後就上機喇！
落機後順利番屋企放低野再直接去運動會! 唔知下次幾時再去trip喇~~~~期待！
