因為我哋係尾站，仲要係最遲上車，所以我哋要分開坐，不過上咗車之後大概半個鐘左右就到咗。
原定時間係九點半開船，但其實我哋八點九左右已經到咗， 之後仲要等埋其他車嘅人到，早咁多....應該畀我哋瞓晏多少少啦！
個團本身話包咗簡單早餐， 我仲以為會得個包同支水，點知都有成個早餐bar畀你食，雖然都係D簡單食物，但咁嘅價錢我覺得真係誠意十足！
食完之後坐咗半個鐘頭有多，終於都有個導遊出嚟講解
佢出嚟除咗講解個行程之外，仲sell我哋買啲浮潛週邊產品，例如防水袋同埋浮潛面罩個嘴仲有浮潛鞋。 浮潛面罩個嘴真係好值得買，話曬個個都係放落個嘴度咬，用個新嘅衛生好多！ 個防水袋我出發之前已經問過積好多次要唔要喺淘寶買，佢都話唔使，點知去到見到個導遊介紹，佢話人哋都用緊好有保障即刻走去買番個， 本身仲想話買兩個添....... 不過其實真係好實用，落到水真係完全防水可以影到相！
之後終於可以出發啦！
我哋坐嗰架快船真係好快，架船都幾包拋下，所以出發之前佢仲話問你食唔食暈浪丸，可以免費提供。
坐咗冇耐話咁快就到咗珊瑚島，其實自己去咗邊個島，佢唔講你都根本都唔會知。因為其實佢都係喺個海中心停低，叫你跳落海浮潛。
本身我哋仲好擔心會唔會驚，因為話曬我哋都係剛剛先學識游水，仲記得想當年我哋去宿霧浮潛嗰時完全唔識游水，我哋死命捉住帶我哋出海個男仔，當時嘅過程一啲都唔enjoy，因為實在太緊張！ 但今次學識咗游水真係完全唔同曬。 著咗救生衣再加個浮潛面罩其實非常安全，加上識少少游水嘅我哋都好放鬆，今次真係可以enjoy到浮潛嘅樂趣，
不過因為我哋未有經驗，唔記得set好個電話就落咗水，所以今次影唔到相。
玩咗應該都有45分鐘，但係感覺好快就叫我哋上番船，之後再出發去皇帝島。
去到皇帝島一樣，去到海中心就叫我哋跳落海玩浮潛，今次我哋set好曬個電話先落水。yeah！
皇帝島靚過珊瑚島，啲水清D，魚又多啲。我哋不自覺游到好遠！
我地淨係買左一個防水袋，掛住頸又唔方便遞來遞去，所以淨係積影到我，佢嘗試自拍但失敗，哈哈！
皇帝島多D唔同品種嘅魚。但其實又唔係真係算好多，雖然當年去宿霧我地唔識enjoy，但我依稀記得當年宿霧嘅bohol island靚D。不過我地而家唔驚水，第時應該大把機會再試浮潛。
游游下發現好似唔見咗張船，游番近少少，導遊示意我地番上船，我地好努力再游番轉頭
上番船之後，就去個碼頭上岸準備食飯。
皇帝島個沙灘Ｄ沙好幼，同香港嗰Ｄ真係冇得比。
之後我地坐架好搖嘅接駁車，就去到食飯個地方。
Ｄ野食就唔好太有期望喇，主要係Ｄ炒飯炒麵黎填飽肚，但都係嗰句，二百幾蚊團費包車又包船，仲包早餐同午餐，絕對收貨！
之後我地自費參加咗個ATV卡車，我地本身都有諗過參加ATV local tour，見呢度有，反正已經玩咗咁耐水上活動，就直接join呢個ATV喇。
我地兩個人租咗一架車，積負責揸，我就坐後面。
我地之前喺墾丁都玩過，不過呢度真係入去D山澗，D路好崎嶇，本身諗住take turn試下揸，之後都放棄喇，哈哈
去到第一個check point，隱約見到D海景，之後帶我地揸個領隊姐姐問我地落唔落車影相，其實個風景就冇咩好影，但都落車睇下先。
無份揸，扮下司機影張相先。
之後上番車再繼續前進喇！
去到下一個check point！嘩！個海景好靚呀！！成幅畫咁，附近又冇咩人，影靚相一流。
影咗幾張，發現唔係著泳裝，同個景有D格格不入。於是除咗衫再影！
之後我地上番車去下一個check point。
又係好靚！
之後就回程番番去lu
我地番番去餐廳個位置，其他團友一早已經食完坐咗架接駁車出去，所以唔見有車。我地見到個導遊喺度，佢就幫我地叫咗個哥哥仔揸電單車接番我地出去。
佢係一架電單車，隔離加多個兜，我就坐喺個兜度，積就坐咗喺個哥哥仔後面。
出番去之後，見到有間雪糕店，出面咁熱，食番杯雪糕先！
未夠鐘，我地出番個沙灘度，本身諗住再影下相，但發現太太太多人，都影唔到D咩，所以都係再落水游多陣先。
D人好清，我地從來都未試過喺海度游水，識游水以黎都係第一次。
但因為冇著救生衣，我地都唔夠膽游太遠。游咗一陣，我地就上船回程喇。不可不提係呢個團真係好超值，個導遊同Ｄ船員都好貼心，我地上船之前，知我地腳有好多沙，會幫我地用水喉沖晒Ｄ沙先。上到船仲有一大盤果盤請我地食! 熱辣辣嘅環境下食D切好晒嘅水果真係好窩心！所以之後佢問我地拎小費，完全無強迫情況下，我地都好樂意俾！佢仲好真心多謝我地。
番到去準備上車，佢地又再安排我地沖腳，真係好細心
之後我地番到酒店，積再去泳池游咗一陣水，我就沖個涼休息咗一陣。泳池個餐廳Ｄ野食又唔貴，積仲叫咗個炸薯條同啤酒。之後抖咗一陣，我地就出發喇。
我地夜晚book咗間So Thai Spa，就喺Malin Plaza附近，睇地圖見到步行都去到，我地慢慢行過去，但其實都要行成差唔多半個鐘，不過差唔多日落又唔算太熱。
佢係類似food court咁嘅設計，所以我地係可以買唔同野食。
我地求其搵張枱坐低咗，之後有間飲品店就話坐呢張枱要幫襯佢地飲野，反正我地都要買野飲，所以冇咩所謂。
叫下叫下原來叫到一枱都係！
但都係發現叫海鮮都係麻麻地，D小炒就唔錯！食到捧住個肚，去個market度行咗一陣，但又冇咩好買。之後慢慢行過去間Spa度，但原來好近，隔一條街就到，咁就早少少過去啦。我地book咗4hrs，我地8pm先開始，佢地收12點剛剛好。
等緊嘅時候，勤勤打video call俾我地，佢好乖，冇扭計仲好聽話，所以我地玩得好放心。
So Thai Spa比較起Let's Relax清靜好多，D 房好private，基本上我地都冇正面見到過其他客人。成個過程按摩師都好溫柔，又好細心。我地個package有body scrub同facial scrub，我尋日先做完都有少少擔心會唔會甩皮，不過做完又冇野。哈哈。
做完body scrub佢叫我地去沖身，係一個廁所兩個人同時沖，唔怪得呢個package係for couple，哈哈。做完呢part佢安排咗D曲奇同茶俾我地，個曲奇好好味，好飽都食晒。之後再做massage，舒服到瞓咗覺，真係不得了！
做完已經12點喇，直接坐的士就番酒店lu～
沒有留言:
張貼留言