今日我哋冇咩特別安排行程， 所以一朝早起身就喺泳池度游一陣水， 游到肚餓就直接喺池畔間餐廳度叫嘢食。
餐廳啲嘢食又唔貴，叫啲嘢食仲係即刻整，所以啲薯條pizza全部都熱辣辣香噴噴。
咁樣浸住對腳坐喺度食都真係第一次，食食下都好驚啲嘢食會跌咗落水，哈哈。
食完之後我哋就準備出去行一陣。 諗住一陣間去沙灘度影下相，所以著得有度假feel D先。
本身我哋諗住去Big C買嘢，但諗諗下都係好似食咗飯先好啲，諗嚟諗去都諗唔到食乜，之後就諗住去食海南雞飯，睇到個地圖發現都可以行過去，所以就沿住芭東海灘一直行。 但因為係正午，烈日當空， 所以行咗幾步就已經熱到出煙。 見到個炒雪糕卷即刻唔放過！
佢有好多種口味畀你揀，每次可以揀兩款，咁熱嘅環境下好想食啲水果味嘅雪糕，我揀咗熱情果同芒果。
佢真係拎個新鮮嘅熱情果，同埋切一舊新鮮嘅芒果加落去炒，所以勁fresh！ 其實佢係一塊勁凍嘅鐵板，然後加啲水果，再加啲牛奶溝埋佢，就會變成雪糕。 咁熱嘅環境下食完真係透心涼，perfect！
食住個雪糕頂一頂，好快就行到去呢間Briley雞飯度啦。
我哋叫咗一個雞飯同一個豬髀飯。
之前睇過地圖見到呢間orientala spa好近， 呢間都算多人去有好多間分店。 之後我哋嘗試walk in入去。
坐咗一陣之後，佢話冇師父，要等兩個鐘之後先有，但係喺附近都冇咩嘢做所以唯有撤退。 我哋完返條路行去Big C， 沿路都唔係好見有其他似樣啲嘅spa。 本身都諗住買咗嘢先算 ，之後行下行下到咗jungceylon。 記得我哋第一日黎見到佢頂樓有好多間spa，於是我哋上去望一望，就見到呢一間。
去到剛剛好日落，真係行慢一步都影唔到呀！
用個手機開咗日落mode，即刻變咗張油畫咁，但好似怪怪地.....
降落傘嗰個攤檔係咁撩我哋玩，我哋唔玩係咁趕走我哋唔畀我哋喺嗰個位影相...... 我地唯有企過啲繼續影，呢個降落傘之前我哋玩過，所以都冇咩興趣。
影到個太陽落咗山我哋就撤退lu
之後有少少口渴，我哋行返去個芭東酒吧街嗰度，是但去咗一間酒吧叫咗杯cocktail。
本身我哋都周圍搵緊有咩禮物買畀阿仔，之後有個阿姨喺度sell緊一啲好old school有人名嘅手帶，覺得都啱呀仔，就幫襯咗一條。
飲完杯嘢之後，我哋終於真係去超級市場度買嘢啦，買完成車野之後諗起聽日係積嘅正日生日，買定個蛋糕先，勁平，但好精緻！
買下買下原來買咗好多勁重，本身諗過返酒店先，又諗緊好唔好買嘢返去食，之後去到個bangla night market就諗住食埋先返去。
呢個night market同尋日嗰個又有少少唔同，我哋本身以為坐喺嗰個位幫襯佢買杯嘢飲就得，點知發現原來係要幫襯埋佢個海鮮檔，結果我哋好似尋日咁，呢間又買，另一間又買，兩個檔口就走過嚟鬧交。。。 糾纏完一大輪終於都可以坐低食。
呢款鰤鮯我已經想食咗幾日，明明之前喺泰國都好常見，唔知點解好難搵到，今次呢度買到，佢又唔熱又唔係好新鮮所以都係麻麻。
啲小炒都唔錯嘅，不過其實我又唔係好肚餓，同埋喺呢度食就好熱，仲要我坐坐下突然間勁肚痛，附近又冇廁所。。。。應該係話有我都唔夠膽去，之後我急急腳行返去就jungceylon商場個廁所度去，去完再行返轉頭已經唔係好想食。。。搞到有少少浪費咗
食完之後我哋就抽埋啲嘢返酒店啦， 好唔開心嘅係因為太熱，個蛋糕溶咗一半......
沒有留言:
張貼留言