今日一早起身，睇到尋日區選嘅結果，應該係呢幾個月反修例風波以黎，大家最開心同興奮嘅一日，今日出發去生細佬，真係一個好日！成朝睇完D新聞之後，就起身最後準備埋個走佬袋，準備下午出發。其實仁安醫院已經包晒D衛生用品，所以基本上係帶自己嘅衫同個人物品已經足夠。
出發之前，最後教埋Daddy同姐姐點用個蒸奶樽機，之後洗埋個頭，仲試埋用個泵奶器，我試咗兩下睇下駁得啱唔啱，之後已經見到有一滴奶泵到出黎，睇黎細佬出世好快有奶飲喇！
因為又唔係作動入院，所以仲可以慢條斯理坐馬鐵出去。去到登記嗰時，再問多我地一次係咪揀四人房。之前上網睇，好多人都試過原先揀四人房，但之後因為無房，最終要upgrade去半私家房，咁就淨係補番房間嘅差價，其他費用都係跟番四人房。點知佢真係話四人房full咗，咁就俾機會我住下半私家房啦，仲request埋要新翼，完全係酒店式嘅格局，就當俾多三千幾蚊享受下啦！
登記完之後就有人帶我地上三樓，先做一D簡單檢查。姑娘會詳細講解所有流程，探病，餵奶，親子嘅時間表。
基本上如果生完個身體無咩事，其實呢幾日係會好他條。因為BB係會喺育嬰房有姑娘照顧，餵奶嘅時間係四個鐘先有一次，其餘時間佢都鼓勵你去休息，同政府醫院每兩個鐘叫醒你去餵奶嘅地獄經驗係完全天與地嘅分別！
姑娘會問埋你揀咩奶粉，佢會有人幫你餵。因為我都諗住之後會全人奶，所以就是但揀咗雪印smart baby 。基本上大部份嘅牌子都有得揀。
因為開刀嘅關係，要剃埋下面嘅毛毛🙊一剃完嗰下都好唔習慣。
之後就去咗個候產室度駁機聽BB心跳同check胎動。
但我又再次難逃喺醫院量血壓就血壓高嘅命運，一量又再次偏高，量咗幾次先好少少。
候產室入面有好多張床，我聽到隔離有個等緊順產嘅媽媽，姑娘同佢老公講話佢開咗兩度，話佢第一胎已經算快。雖然我聽唔到有慘叫聲，但令我又憶起第一胎慘痛嘅經歷，呢刻我又好慶幸我揀咗開刀。
駁完機一切正常，姑娘喺電話同吳醫生報告完我個情況之後，就帶我入病房喇。
我地個病房喺新翼，其實都係同一個樓層，只係經過咗產房同育嬰室之後，再有一個靚D同新淨D嘅reception，行入去就係好有酒店格局嘅病房。
設施非常完善，我嘅床位係近窗邊，所以更加闊落，房間嘅儲物空間亦非常充足。
廁所個鏡櫃每個床位有一格儲物，唔駛每次入去用先拎D野入去。
因為生完唔會沖涼洗頭，所以我係襯今日未生，唯一一次用過呢個沖涼間。洗頭水，沖涼液都齊晒，基本上係咩都唔駛帶。
本身諗住叫爹地去大圍幫我買野食，仲諗好想食火炙壽司，炸雞同珍珠奶茶。但諗諗下，其實我已經無檢查要再做，不如直接去餐廳食。我仲好記得蘭亭閣嘅鴨肝牛扒真係好好食！之前係因為勤勤病咗先入黎，就梗係唔希望會再食到啦，今次個情況就完全唔同喇！
原來晚餐係有dinner set，同出面餐廳嘅價錢差唔多，但D食物真係好有質素！
之前係食A La Carte嘅煎鴨肝牛扒，但Set Dinner冇鴨肝，有鴨肝醬，一樣係好美味！
臨生之前食到飽一飽，因為今晚之後就要禁食喇。嘆完個扒餐之後就番上房準備休息喇。
番上房之後就聽到隔離床個媽媽同佢老公鬧交.....最重點係聽到佢已經係開完刀第二日，但佢痛到廁所又去唔到，床又落唔到咁，又係咁話想加大止痛藥嘅劑量！我心諗，唔係話開刀好舒服唔痛架咩？！
之後唔知係我太緊張定咩，係咁想休息又瞓唔著，成晚都瞓得唔好，條腰骨仲好痛，我仲係咁諗因為張床褥太硬。去到5am我終於開始真正瞓得著，點知瞓瞓下，忽然間覺得好肚痛，我仲諗，難得我剛剛先瞓到，如果起身去廁所實醒晒啦，之後我越瞓就越唔對路.......點解......咁似陣痛嘅......
應該都持續咗有成個鐘，去到6am我終於忍唔住去廁所，原來，真係見紅！原來我成晚腰骨痛，唔係張床褥太硬！係陣痛呀！
之後我就按鐘通知姑娘，咁啱又已經到咗6am，本身要食第二粒胃藥準備開刀，所以姑娘自己已經行咗入黎。我食完之後再諗清楚，好似天意想要我順產咁。其實近呢兩個禮拜我都有諗過如果我真係作動先，我係咪應該會考慮順產，呢個問題其實早幾次產檢。吳醫生再問多我一次嗰時我都有認真諗過，又到幾日前我同勤勤嘅對話:
媽咪: 勤勤呀，媽咪下個禮拜就去醫院生細佬喇。
勤勤: 咁你到時可以抱我喇 (因為我成個孕期都無抱過佢)
媽咪: 但媽咪到時會有個傷口會痛痛，未必會咁快抱到你喎。
勤勤: 邊度呀？
媽咪: 醫生叔叔會cut開媽咪個肚拎細佬出黎
勤勤: (震驚) 可唔可以唔cut開呀？
媽咪: 唔駛擔心喎，係之前你去睇細佬嗰個醫生叔叔幫媽咪cut開個肚拎細佬出黎，醫生叔叔會照顧媽咪架喇。
勤勤: (表示放心) 好搞笑嗰個醫生叔叔呀？
(其實唔止係勤勤，我發覺原來成個孕期都係見住同一個醫生，到生嗰時都係佢，感覺真係放心好多)
媽咪: 係呀。
勤勤: 我驚醫生叔叔會cut到細佬個頭呀，不如唔好cut開啦！細佬會自己行出黎架喇！
媽咪: 唔駛驚呀，醫生叔叔唔會cut到細佬個頭架，之後醫生叔叔會幫媽咪聯番個肚架喇。
勤勤: 點樣聯番呀？係咪用膠紙呀？
媽咪: 😅
呢一刻我又有諗過，我係咪唔應該cut開個肚拎細佬出黎呢......
仲有另一個插曲就係，本身我自己亂揀嘅開刀日子，嫲嫲知道咗之後就話呢日係初一，問我地可唔可以揀過第二日，又或者俾佢12點先出世都會好D。由於我一早已經book咗，指定時間同日期係會另外收費，而我本身又唔迷信嘅，就諗住按番原定時間。其實我本身係唔信呢D野，但去到呢一刻，開刀前兩個鐘，細佬都搶住要自己出黎，我不禁諗，如果我都堅持要開刀，好似好一意孤行咁。
呢一刻我打咗俾老公同佢講我作動，之後姑娘就入黎幫我check我個情況，之後佢話個宮頸已經開始鬆鬆地，但就未開度數。我就再諗，我而家先6am，其實我已經痛緊，手術室book咗8am，咁即係反正我都要再痛多一段時間，定還是真係打個無痛轉順產呢。
之後我即刻check番D收費套餐，睇下如果我轉順產究竟會多咗定少咗錢，睇完之後發現應該係差唔多。之後我就再喺之前join咗嘅whatsapp媽媽group問下D媽媽意見，幾乎一面倒都係建議我順產，仲有做過無痛嘅媽媽話，做咗無痛係真係唔痛嘅，令我即刻覺得信心大增！
之後我就決定一陣問下吳醫生意見，如果可以做到無痛，我就轉陣！之後老公黎到，又未到探病時間唔入得黎住，我就同佢講我諗住轉陣，叫佢喺出面幫我問下姑娘我而家轉有無問題，知道收費之後我地就要求想問下醫生意見。姑娘好快就幫我打電話俾吳醫生俾我自己問佢。
我一問吳醫生話我想轉順產有無問題，佢第一句就話，我不嬲都叫你順產架！之後我再問可唔可以打無痛，佢話可以隨時安排。之後好快就話，咁我幫你取消咗個手術室先喇，但補充如果到時我順產唔成功，就要俾番緊急剖腹嘅費用，之後我又淆底，問佢我成功呢機會大唔大。佢都係答我無包生到之類嘅答案。咁我就戰戰競競咁話，好啦，我轉順產啦！
沒有留言:
張貼留言