所以無等人黎我已經可以落床行lu。呢個就係我望出窗外嘅風景。
之後我發現我對手同膊頭好似做完幾百下掌上壓嘅肌肉痛咁😆應該係尋日生仔太用力🤣反而個傷口真係無乜點痛，今日連止痛藥都已經唔駛食。
今日就可以去餵奶lu，餵奶的話，自己按時間去哺乳室按鐘，之後入到去講個床號，之後自己入去洗手，姑娘就會抱你個BB出黎。
我生完之後第一次見到細佬B🥰姑娘一抱出黎見到佢😍好細粒呀！因為未上奶嘅關係，所以係象徵式埋身餵，之後就補奶粉。雖然之前餵咗兩年，但太耐無餵過D咁細嘅BB，我都要重新pick up番D手勢，同埋其實👶🏻都要學點食，大多數時間佢都係啜啜下瞓咗，但塞支奶俾佢，瞓咗都食到，都知佢係為食仔😋。之後有個擠奶講座，姑娘教點樣擠奶，但都係紙上談兵，聽到我爭D中眼瞓😴
我聽緊嗰時，我家姐黎探我，佢地喺個"金魚缸"度睇BB。D人就係咁樣圍住
之後影咗BB張相😧個樣成個禿頭阿叔咁嘅！我仲問爹地有無認錯咗第二個BB🙈
今日嘅親子時間我地可以一齊參與喇，細佬👶🏻表情多多好得意🥰個咀唇由一出世到而家都係紅卜卜咁。
今日全日嘅餵奶時段我都有參與，不過都係象徵式4個鐘先一次，而深夜嗰節，姑娘都建議我地休息多D，其實都好悠閒。所以醫生再黎巡房我都有問佢，我聽日係咪可以出院，無謂又要再俾錢嘛😅🙈最好笑係醫生黎巡房嗰時我同爹地喺房度食緊飯，我睇到個menu，忽然間好想食梅菜扣肉。
咁食到一半我就番上床做檢查啦，醫生就問我有無頭痛眼花嗰D啦，因為我仲有高血壓，咁我今日全日都好似有D頭暈作嘔，有少少似暈車浪嗰隻，咁我話頭痛就無，但有少少作嘔😅之後佢話，作嘔就食得清淡少少啦😆唔知係咪佢睇到我碟扣肉🤣
我今日先落床，聽日就出院，所以沖涼教學，仲有出院講座都係今日一次過上晒。呢兩個講座爹地媽咪都可以一齊聽。聽完之後D記憶先番番黎😝仁安同好多品牌都有合作，所以有勁多試用裝送，尿片，lotion，咩都有，勁大袋！😆聽日就出院，所以就叫爹地今日拎咁D野番屋企先。
最後好順利，醫生第二朝黎巡房，話我已經可以出院。兒科醫生再睇埋BB，都無問題，可以一齊出院lu🥳
本身我地畫押嗰張單簽咗勁多個名，加上又upgrade咗去半私家房，仲諗住起碼都要成8,9萬先走得。點知最後因為順產又平咗，又早咗出院，拉上補下，埋單7萬1，即刻俾錢走人囉。我入院嗰日，隔離床個媽媽已經生咗，點知我地同一日出院，認真滾水淥腳😅
我地拎黎嘅BB衫，交俾姑娘，佢就會幫BB著靚靚推出黎喇。
爹地咩住兩大袋野，我就負責抱住BB🥰影番張相留念先
喺仁安生仔呢幾日嘅美好時光，話咁快就完。好驚番屋企會無得瞓，好彩細佬好乖😘
因為早咗出院嘅關係，陪月未返得工。 所以今日就由婆婆過嚟幫細佬沖涼。
今日細佬差唔多全日都係喺度瞓。
終於等到哥哥放學返黎🥰
沒有留言:
張貼留言