決定順產之後，姑娘就同我講，咁你可以食D早餐先，一陣先有力生喎。佢話吳醫生而家有個手術，一陣會過黎睇我。咁我就叫Daddy去Canteen幫我買份早餐。等緊Daddy份早餐嘅時候，吳醫生就上咗黎，之後佢check完話開咗兩度，我話大概5-10分鐘左右痛一次，佢問我人手幫我穿水好唔好，會快D，咁梗係好啦！之後佢伸隻手定唔知有無用D工具，卜一聲，有少少痛，就話搞掂喇，佢話D羊水都清嘅，其實我咩都睇唔到又feel唔到，話一陣可以落埋催生藥就快D搞掂！
咁佢話如果係見痛要打無痛就唔好太遲打，太痛就會好難打架喇，咁我就諗住快快食完個早餐就去打，姑娘話call咗麻醉師之後，15-20分鐘就會到。點知個早餐等好耐先買到，我開始越黎越痛，食咗半碗粥之後大概8點半，諗諗下都係唔食快快打咗穩陣！之後就叫姑娘安排。爹地繼續喺度食早餐，姑娘就用輪椅推咗我去產房準備。我本身諗住放低個電話，點知原來順產係可以拎埋個電話入去，之後我隻手駁住D機，D姑娘仲會幫我放好個電話喺我旁邊等我可以拎到，真係好讚！
開始都越黎越痛，但根據我上次經驗，呢個痛未去到急屎嘅痛，係未有耐生得嘅。入到產房，我就喺輪椅行上張床，一起身就成地都係羊水。之後就有個好新手嘅姑娘幫我喺隻手度種粒豆，佢係咁叫我放鬆唔駛緊張，但其實係佢好緊張😅
姑娘首先同我報咗麻醉師嘅收費同其他打無痛嘅雜費，叫我預大概兩萬蚊 (最後我睇完張單都唔知條數點計出黎)，畫押確認之後，等咗一陣，麻醉科醫生就到咗喇，佢知道我係第二胎而之前係順產之後，就話我應該就揀順產啦，仲話我好快會搞掂，嗰時大概係9點幾，佢話我應該中午前就會生得。基本上所有醫護人員知道我轉順產，而知道我第一胎係順產，都話我應該要咁揀，希望我真係冇揀錯啦！喺產房入面成個氣氛都好輕鬆，醫護人員又關懷備至😅所以我都好放鬆。
一切準備就緒就開始落麻醉喇，我要做嘅野就係好似粒蝦米咁曲起個身，然後無論發生咩事都唔好郁，我覺得有少少難度嘅係因為一直係陣痛緊，所以我有D擔心我太痛個身會郁。但個過程個姑娘會攬實晒我，基本上我係唔會點郁到。跟住我就feel到我個背脊應該係打緊局部麻醉針，然後就插D野入去，完成之後就開始落藥，會感覺到個背脊涼浸浸咁，跟住麻醉師不時問我覺唔覺得對腳痺，開始有反應時，就覺得一邊痺嘅感覺比較明顯，之後姑娘就幫我打側個身，話等D藥可以落得平均D。直至我feel到對腳都無咗感覺，但又仲郁到，咁麻醉師就話搞掂喇，慢慢我就覺得陣痛嘅感覺無咗。姑娘就話同我落催生藥喇，呢個時候老公又可以過番黎。
麻醉師落藥之前有提到頂住盆骨嘅感覺都仲係會有，我仲好驚我最怕嘅急屎勁爆肚痾嘅感覺會唔會減唔到😖。
慢慢開始我就覺得好似好凍，凍到個人打晒冷震🥶，姑娘俾咗張毛氈我，但個人都仲係好震，姑娘話係正常反應，叫我大啖鼻吸口呼咁呼吸，呢個呼吸法好似任何情況都有效，減痛又係靠佢，打冷震原來都有幫助。
大概10點零，我就去番候產室度等喇，姑娘同我講，吳醫生已經喺度靜候我嘅佳音🤭。呢下我又再覺得吳醫生真係一個良心醫生，如果我係開刀，我諗我而家已經搞掂，佢已經走得，佢情願等我都建議我順產，我相信呢個選擇真係對我好。
打完無痛之後，真係完全唔覺得痛，我仲可以撳到電話就知我幾咁輕鬆😙
麻醉之後對腳係無咗知覺，有一下我掂到自己隻腳，仲以為做咩有條欄杆喺度😆原來係我自己隻腳。隔咗一陣，吳醫生又再黎睇我，話開咗兩度左右，佢話幫我放咗D尿先，咁會多D位俾BB鑽落去又會快D。
我見都仲係兩度，咁好似仲有排等咁，加上我又唔痛，我就好安落咁攤喺度休息。因為尋日幾乎無瞓過，等等下我差D就瞓著咗😴。隔多一陣，我感覺到宮縮繃緊越黎越密同有野頂住嘅感覺越黎越強。頭先提到我最驚嗰個勁爆急屎的痛，原來落咗無痛只會覺得頂住而係唔痛架😜！大概半個鐘後，姑娘問我感覺有無唔同咗，其實我係feel到係去到原有急屎爆痛嘅層次，但係係無痛版，我又諗頭先先兩度，應該未有耐啦，咁我話都係差唔多，因為都唔痛。😅姑娘就話咁一陣再check啦。
隔咗幾個字，姑娘入黎一check，就話已經去到八九度，我心諗咁突然？之後即刻安排推番我去產房，頭先唔知個姑娘點樣撩兩撩，去到走廊嘅時候，我已經feel到有舊野頂到去門口😲
去到產房之後，姑娘同我set好張床同個腳踏，之後話叫我可以試痾住先，我心諗咁casual 咁嘅😅因為我都仲係唔痛，所以我可以好冷靜咁慢慢度啱個位，同上次我痛到痴咗線嘅發狂狀態完全唔同😆
姑娘通知咗吳醫生可以上黎，我就自己一條友喺度試痾 (其實個感覺有D搞笑😅)，好快吳醫生就到咗，佢入黎嗰時著住一件好似圍裙嘅野，仲著住對水鞋，好似賣魚佬嘅造型咁行入黎😆之後話要同我減咗D麻醉藥，如果唔係我感覺唔到幾時要用力。呢個時候就feel到急屎嘅痛番番黎喇！其實對我黎講，最難頂係肚痛到花灑嗰隻痛，但係唔俾你痾! 所以其實可以俾我痾嘅話我係可以頂到！
經過我上次嘅經驗，都知係feel到宮縮痛就發力，但因為我成日唔肯定幾時真係宮縮，我就會依賴醫生或者姑娘睇到個機提我先發力，個過程其實係得醫生同一個姑娘，有幾下醫生同姑娘喺度唔知整緊咩無提我，醫生就話，你唔駛理我架，你自己繼續啦😅 乜又咁causal咁嘅。
跟住我用盡九牛二虎之力push咗幾下，姑娘指示我老公幫我頂一頂個背脊，又真係易發力咗喎。個姑娘又不停喺我個肚度勁大力推 (之後好似個肚都瘀瘀地痛，唔知關唔關事😅)。過咗一陣，姑娘忽然叫我大力鼻吸口呼 (又係呢招!) 原來係BB個心跳突然間跌咗一下，我大力呼吸完就話好咗D。之後醫生就話用個吸盤幫一幫我，好冷靜地話驚會焗親BB，話呢個係一個迷你吸盤，但我都要自己用力，結果......兩兄弟都係要用吸盤出黎。準備就緒之後，等到最後呢下宮縮，加埋吸盤嘅助力，BB個頭就出咗黎喇！之後再推埋個身出黎，雖然唔係好痛，但感覺到超大舊野撐爆咁拎出黎。之後醫生就好淡定地話，恭喜晒。
出世時間係11:02，竟然剛剛好係嫲嫲所講嘅吉時11am-1pm出世，所以真係好似整定咁。
上次爹地無份睇住BB出世，今次爹地睇晒全程。見到BB成身紫色咁出黎，喊得好大聲，之後再變番肉色。姑娘抱開BB抹身同檢查身體，見到個頭頂有條痕同埋吸盤個控，後期聽兒科醫生講，可能係人手穿水嗰時整到條痕，不過兩三日後已經無咗喇。之後問爹地要唔要剪臍帶，姑娘有強調條臍帶係無神經線，所以唔會痛，咁爹地就放心剪落去。準備剪嗰時，BB仲痾咗篤weewee，姑娘仲話BB斟茶俾Daddy😆。之後姑娘包好條毛巾之後就抱過黎俾我地影相。
我同BB嘅合照應該有影咗三四十張，但佢個樣都係咁😆
之後就係同埋爹地一齊影，個角度實在影到我太樣衰🤦♀️影咗幾十張都係樣衰
跟住係爹地同BB，係最靚架🙈
對比起當起爹地第一次抱起勤勤硬晒呔咁嘅樣，佢而家真係好熟練！
跟住爹地同佢影咗幾張獨照，喊得好可愛呀！
呢個樣仲搞笑！
最後就準備推佢去兒科做檢查喇，姑娘仲問我地有無屋企人喺出面。我叫爹地打俾婆婆，所以佢地又影到張合照😝
由拎咗BB出黎交咗俾姑娘，醫生就好專注咁處理我。我個傷口剪咗一邊，我印象中上一胎係剪咗兩邊。之後就拎埋個胎盤出黎，再叫我搓下個肚，幫助子宮收縮。好快手醫生就搞掂喇，臨走前仲提我乜野唔可以食。之後姑娘就準備帶番我入房，因為麻醉藥仲未過，所以我好輕易就可以自己過床，姑娘就推番我番房喇。
本身姑娘同我講我兩個鐘後大概一點已經可以飲水食野，所以未到一點，就叫咗爹地去買飯食。點知隔咗一陣，醫生又再黎睇我，我本身仲以為佢已經走咗🙊所以我覺得佢真係好盡責😛之後佢一按我個肚，我就feel到勁多血喺下面湧出黎😲就話我無好好搓個肚🙈其實我有搓，不過就無咁大力。咁重點係，我自己按極都無反應，佢一按就湧出黎。爹地話，佢年中都唔知按幾多個肚🤣合埋眼都知個位喺邊。
之後醫生話我個膀胱好多尿，頂到個子宮去咗左邊落唔到去。但我又真係唔係好覺得急喎。之後佢話好彩我黎睇下你，啱喇，你D麻醉藥未過！之後佢就伸隻手入去，徒手幫我撈咗一大堆血塊同雜物出黎😵仲叫我而家可以痾尿......喺張床度，又喺度整緊，又有人望住，點痾呀😰本身佢叫姑娘幫我放一放尿，之後佢穩陣起見話驚我痾唔到，話幫我插番個尿袋，插到聽日🙈 叫我聽日先好落床。
之後我又一直都血壓高，所以醫生叫我抽血驗下咩事。仲有叫我直至5點都唔好食野住🙈搞到爹地買咗野上黎俾我都唔食得。
後期姑娘同我講每樣額外野嘅收費，插尿袋又要收，倒尿又要收，話我本身book咗手術室，最後無用到都要收番D行政費😑抽血化驗要收，要密切咁量血壓又要收😖每一樣野都要畫押確認.....張紙都唔知簽咗幾多個名😰之後同我講話本身我係開刀，25/11就唔收費，但而家係順產，就由25/11開始計第一日，順產個plan係4日3夜。換言之，我係生完兩日後就要出院，如果唔係又要收費......
每日有一節嘅親子時間，因為我未落得床，所以爹地自己去親子🤪佢話個個都係父母喺度互影，得佢一個一條友😆 BB張開眼望住佢
之後去到5點幾，姑娘問咗醫生話我可以食野，餓到我滿天星終於可以食飯喇！本身都諗住叫個產婦膳食套餐。
但我後日已經要出院，我係唔會食得晒，所以都係散叫算。
去到8點左右，叫爹地番去陪勤勤做功課。因為呢個哥哥十分期待自己做哥哥，由我尋日入院開始，就不停同學校老師講媽咪今日去生細佬，所以今日老師打黎同我講佢俾蚊針到腫晒之餘，仲問我係咪已經生咗細佬😆
爹地一走咗之後，醫生又再黎睇我。話我個報告見到我個肝酵素有D高，尿酸又有D高，有可能係懷孕引致，所以話我有少少妊娠高血壓，要觀察多一兩日。話如果睇野唔清楚或者好頭痛就要出聲。聽日又再抽多支血check肝酵素，仲有消毒藥水同個盆要浸傷口，又要再收費😅
呢盤野就係用黎洗個傷口，我仲要第一次用嗰時整到個廁所板染咗色，洗極都唔甩.....好在之後清潔姐姐上黎洗得到。
之後我就休息喇，BB唔駛自己湊，基本上係好得閒。仲要住咗半私家房已經算好安靜。不過就硬係瞓得麻麻地，不斷都係瞓下又醒下咁。
沒有留言:
張貼留言