經歷成個禮拜嘅疑似穿水既驚魂，為咗買個安心，39週幾都仲去私家產檢，Check完之後話我羊水量仲好夠，覺得應該唔係滲羊水，終於都放下心頭大石！。最後一次產檢，終於有張正面嘅超聲波相，但個樣。。。。
我睇到之後笑死我，我睇完之後仲同阿媽講話做咩咁醜樣 XDDD 診所個姑娘聽到好大反應問我地話邊個BB醜樣，之後我問我講緊自己個BB，哈哈！佢睇完話超聲波係咁，咁我都唔信我個BB出到黎係咁樣嘅。。。做完檢查放心咗，仲同阿媽去剧個扒，仲行陣街先番屋企！
誰不知，第二日瞓到就黎天光嘅時候，又好似之前咁feel到下面有D暖暖地嘅水流出黎，本身同自己講流料黎嘅，點知唔對勁，開始開水喉咁收唔到掣！好在本身之前嘅分泌流量越黎越多，已經轉用咗m巾，如果唔係真係一床都係！我即刻叫醒老公，之後行入去廁所，但已經成條褲濕晒。。一除褲坐上馬桶，D羊水湧晒出黎仲見埋紅，直情好似TVB劇嘅情節一樣！
我冷靜落黎就諗到有排都唔可以洗頭，但又記起穿咗水唔可以沖涼，驚會感染，於是我決定淨係洗頭！我一邊洗頭，一邊叫老公拎定走佬袋！之後叫醒埋阿媽通知佢，吹埋個頭換好衫就call的士入院喇！今次堅料喇！
因為驚穿水會整到人地架車濕晒，所以拎定條大毛巾墊住先上車。上到車就開始覺得個肚痛痛地，仲諗緊呢個痛楚究竟開咗幾多度呢？ 但我仲喺的士上面好悠閒咁食菠蘿包，諗番轉頭呢D根本唔算係陣痛。。。
今次直接上2樓產房，去到同姑娘講話我穿水，登記完資料，話咗俾佢聽我朝早5點半穿水，大概15分鐘陣痛一次，佢就安排我瞓上床駁機，上次入過去產前房已經有經驗，一個機係check BB心跳，另外有個掣，feel到BB郁就按一下。我瞓咗喺度成半個鐘都唔係好覺BB郁，之後姑娘話BB瞓咗覺，佢地又推下我個肚，又轉下pose咁，仲俾咗個指甲鉗我叫我剪指甲。
其間一直都無人同我check過子宮度數，直至去到7點零，我聽到兩個姑娘講野，我估佢地應該係就黎換班，但話穿咗水都唔check又唔得之類，之後就過黎同我check宮頸喇。。。唔知係佢個手摰好D定我有晒心理準備，今次又無上次咁痛喎。但令我最重創嘅係，佢check完同我講，話真係穿咗水，但係。。。一。。。度。。。都。。。未。。。開。。。！！！
我之前上網睇，明明話一穿咗水，度數會開得好快架，所以成日都想係穿水先！點解會一度都未開架？但我已經覺得痛喇喎。。。
之後佢就話要送我上產前房度等，又再次換番呢件粉紅色衫，之後有個姐姐入黎同我check個走佬袋，話唔需要既野叫屋企人拎走先。之後就用輪椅推我上番4樓喇！當時嘅我仲心諗，穿咗水一定要24小時內生，咁起碼有個限期。我當時仲好樂觀咁諗。。。可能過多一陣已經開幾度啦！我經驗記得，8點零9點醫生會黎巡房，可能到時又有進展呢。。。
之後佢推我出去見番老公，就叫佢幫我拎走其中一個袋，仲同佢講未有咁快生得，叫佢番公司整理埋D野同攞假，總之記得聽電話就得喇。
上到病房之後食完早餐，我就用我之前download咗計陣痛時間嘅app去記錄低我陣痛既時間，已經好有規律地大概5分鐘痛一次，每次都有成45秒。之後就到醫生巡房喇，我同佢講我陣痛嘅頻率，諗住佢會再check下啦，點知佢話我未有耐先生得，佢話我都未知咩先係真係痛，話我到時一定笑唔出。。。第一個令我感到沮喪嘅消息，佢話會等4點幾先會再同我check。。。話痛得越密越強就會開得越快。。
我開始密切留意我陣痛嘅頻率，去到10點幾，個姑娘黎同我摸肚，話摸到BB仲未落盤，仲教我自己摸。。。即係話真係有排！仲叫我一陣學玩fitball，可以舒緩痛楚同快D落盤。。。
之後有個紅十字會既職員黎問我捐唔捐臍帶血，其實我上次入院已經有職員同我介紹過，所以一黎我就話ok喇。但佢話因為我5點半已經穿咗水，所以如果今晚10點半前都未生就用唔到喇。。。我當時諗，唔會10點半都未生到掛？！填完之後我就喺走廊行來行去希望快D生得。。
好不容易去到中午12點，呢刻我已經有D痛到面容扭曲。。老公已經喺公司番咗屋企再幫我拎咗飯黎俾我食喇。其間對面床有個太太，遲我少少入院，已經係第二胎，佢入到黎已經好似好痛，但我見佢一直都保持冷靜，直至佢食食下飯，佢屋企人幫佢按鐘話佢好痛，佢仲痛到慘叫。。。之後幾個人衝入黎好快手就幫佢轉去輪椅話可以送去產房喇！佢既叫聲的確令人不寒而悚！
其實都痛到無咩胃口食飯，食完之後又再繼續忍痛，開始痛到腰骨都痛埋，應該係有D進展掛。。。我問姑娘拎咗個暖包希望可以舒緩下。呢個時侯對面床又黎咗一個等生既產婦，佢黎咗無耐已經痛到嗌，仲喊出黎。姑娘仲鬧佢，話嗌同喊都無用。。。嗰時可能我未係真係好痛(雖然嗰一刻我已經痛到想死，但原來沒有最痛，只有更痛) 所以仲可以好冷靜咁用呼吸法。不過最好笑係個太太竟然可以喺陣痛既間距時間打電話俾d client ，我諗佢平時應該係個工作狂！
之後去到2點，就叫咗我去做fitball，有個物理治療師教我地一齊做。佢教咗我地幾組動作，但我想話做完仲痛咗！樂觀地諗係個產程有進展所以痛咗。。。
做完番上床我已經痛到想死。。。死忍難忍忍到4點，終於有人同我check宮頸喇，我好期待佢話俾我聽我已經開晒！Check 完之後佢話可以落產房，叫我通知先生過黎，我仲心諗今次掂喇！之後我問醫生其實開咗幾多度，佢話兩度。吓？咁咪即係仲有排？唔理啦，如果唔得就唔會送我去產房啦！之後我執好晒D野就等人推我落去，一出到去就見到老公到咗。去到產房就係我嘅惡夢正式開始。。
我落到去佢叫我除晒D衫換件紫色衫，之後我痛到行上床都行唔到，俾D姑娘喝令我之後，我終於瞓咗上張床駁埋機，呢個機仲可以check到陣痛既時間。之後佢問我落催生藥好唔好，咁梗係好啦，快D搞掂嘛。仲問我要唔要笑氣，咁梗係要啦！但最令我沮喪既消息係，佢話8點鐘先會再黎check開咗幾多度！8點？！而家先5點喳喎！！
產房個空間好大，但白色既冷燈光加上冷冰冰既儀器，配合我勁痛又無助既感覺，好有恐懼鬥室既feel。。。。令我有一絲安慰既係，我本黎以為係差唔多生得老公先可以入黎，點知原來呢一刻佢已經可以入黎陪我。。。佢入到黎之後，又有人送咗碗粥入黎，我想講呢一刻我已經痛到連餐具都拎唔起。。。因為一痛又要聞個笑氣，加上我已經痛到唔係好食到。。所以食咗好耐都食唔完。。
我一抬頭就望到個鐘。。。真係度秒如年。。。呢幾個鐘我記得我無數次同姑娘講我好痛。。問有無方法減痛。。。佢話因為BB心跳唔係好正常定胎動唔係好活躍，所以唔可以做無痛。。。只可以用笑氣。。。其實我想講，個笑氣係對止痛一D效果都無，只係會令人wing wing 地，但喺無辦法之下當有個寄託。。。但聞得多或者方法不當係會令人作嘔！
都唔知過咗幾耐，開始變成急屎既痛，係搞肚痛嗰隻痛既十倍！！勁想痾又唔俾人痾嗰種。。。我諗去到急屎既痛應該差唔多啦！我又多次按個鐘同姑娘講我好痛好想痾。。。多次佢入黎睇都話未得。。。我多次懇求佢再幫我check下幾多度，但佢話因為我已經穿咗水，唔可以check太多次，會好易感染。。。。淨係叫我吸笑氣，我話我吸到想嘔，就俾咗個嘔吐袋我。。。我又再次陷入絕望。。。
我不斷吸個笑聲，吸到要換過支新。。。。已經痛到手軟腳軟。。。又吸到暈陀陀。。。每一次準備陣痛既時候，就好似坐過山車去到最高未衝落黎嗰下既心慌感覺。。。每一下呢個感覺我就好後悔點解我要順產。。。。我每隔兩三分鐘就有呢下感覺，真係難以想像可以幾個鐘內不停咁坐過山車。。。。
好辛苦好辛苦先等到八點。。。終於可以check度數喇！！好想即刻就生得呀！！奇蹟並無出現。。佢話我開咗6度。。。咁即係仲有差唔多一半？！？！但姑娘安撫我話我已經算開得好快，話開到呢個度數，後期就會快好多。。。我又再問要等到幾時。。。佢話。。。。四個鐘先可以check一次。。。即係。。。12點？！？！我就死喇。。。4個鐘又4個鐘，真係好似4年又4年咁耐！！！
8點後呢段時間我已經去到失去理智。。。我完全失控咁亂用力亂呼吸，又覺得雙手麻痺晒。。。呢個時候叫老公見到我一拎起個笑氣，就指導我慢慢用鼻吸氣，慢慢用口呼氣。。。我每次一痛就用我散渙既目光望住老公，佢叫我吸就吸，呼就呼。。。我印象中都work咗一段時間。。。直至去到唔work。。我直情用住個笑氣好似透唔到氣咁。。。我又再按鐘叫姑娘。。。同佢講我真係要痾。。佢話唔會check度數，除非見到BB個頭，佢幫我望完當然係失望啦。。。仲叫我唔好亂痾，如果唔係我自己個傷口同BB個頭都會腫。。。但我當時已經不受控制。。。呢幾個鐘真係我人生最絕望既時候。。。
我劇痛到幾乎暈低 (其實我講咗無數次想真係暈低唔再覺得痛)，迷迷糊糊咁終於去到10點幾，我再次痛到頂唔順又控掣叫姑娘，我又再次用懇求既語調同佢講我真係好痛。。。問佢我生得未。。。今次個答案終於有少少唔同！ 佢話因為有個產婦要緊急開刀做緊手術，另一個產婦都等緊開刀，所以醫生唔得閒！話11點幾就會黎再睇我！我後期清醒既時候諗番，即係話本身如果有醫生得閒，我係可以早少少生！？！？！
終於捱到11點幾，突然間有一班人衝入黎叫我老公出去，話醫生要做檢查！之後就話因為我已經穿水超過18小時，所以要打抗生素！之後有人check完我個子宮就話我開晒可以生得！！呢班人極速各就各位！一開波就拎起個腳踏叫我放對腳上去，我已經痛到咩都睇唔到，隻腳亂撐，個姑娘即刻又喝止我，我又用懇求既語調同佢講，我放唔到。。。你可唔可以幫我。。。成功放咗上去之後，就叫我一陣痛既時候就用手揸住個手柄發力！呢個時候我淨係feel到下面好多野整我，又打麻醉針，又剪會陰，又要用尿喉放尿。。。但呢一刻我成身已經痛到唔屬於我自己，我淨係想快D生出黎唔駛再痛！
終於都可以出力喇，一陣痛嗰時就好多人同我打氣，叫我出盡力！痾咗幾下之後，我聽到佢地講話BB心跳開始唔正常，叫醫生準備定吸盤。。。之後我老公就入番黎，醫生就同我地講話BB而家個情況可能要用吸盤附助生產，有可能有咩風險等等，仲話如果都唔成功，就可能要轉做緊急開刀，話無問題就簽名同意，嗰下根本肉隨鉆板上！我隻手痛到震晒咁簽咗個名。。之後就話因為要醫生助產，所以老公唔可以陪產，叫佢出去外面等。
之後醫生就準備好個吸盤，就等下一轉既陣痛，點知呢下陣痛等左好耐都唔黎，而我淨係記得頭先醫生一句話可能要轉開刀，我真係同佢搏命！！一痛嗰一下，我真係咩飲奶既力都出埋！！又有人喺我個肚勁推，嗰下之後，醫生就同我講話數123，我再出多下力痾埋BB個身出黎，即係話BB個頭已經出咗黎？點解無BB喊聲既？嗰一下之後，我就feel到好大舊野滑咗出黎，之後就拎咗去隔離張枱度吸BB個咀入面既水出黎，終於都聽到BB喊喇。。。。啱啱趕得切4月6號23:55出世！但因為我穿水太耐，BB 出世有少少發燒，所以要拎去觀察。。姑娘拎咗BB放咗喺我身上一下，叫我錫啖BB就拎走咗佢喇。。
醫生幫我拎埋個胎盤出黎之後，陣痛既劇痛終於都停咗，之後就聯針，比起頭先十幾個鐘既痛楚真係唔算得係咩。。。但之後原來都未完，原來仲要觀察子宮收縮既情況，佢地叫我搓肚幫助子宮收縮，又無講要老連咁大力，我搓咗一陣隻手又攰，個人又攰，就瞓著咗一陣，隔咗半個鐘左右個姑娘入黎check就話我無努力搓肚，所以子宮收縮唔理想，止唔到血，要吊藥幫手止血。。。。但因為我本身左手條點滴俾D血塞住左，搞到要吉埋右手。。。。
仲有可能因為我頭先聞得過量笑氣又或者唔小心用口吸咗，我成晚去到第二朝都勁想嘔同覺得個喉嚨好似焯傷咗咁。。。。而因為拎咗BB去觀察，所以佢唔係同我同房。。。咁我就可以安心休息喇。。。因為隻手吊住藥，個傷口又痛，我到咗第二朝拎番個電話出黎先真正睇清楚BB個樣。
經歷完十級痛楚，加上成晚都仲好唔舒服，到到朝早先清醒番問姑娘我個BB點，但後來先知原來產後房同嬰兒觀察房係分開運作，所以佢地唔知BB個狀況，叫我自己晏少少冇唔舒服自己落去睇。之後到食完晏晝飯，就到爸B積去睇BB，原來爸爸媽媽係可以隨時入去探BB，媽媽仲可以喺指定時間入去餵人奶。我終於喺清醒嘅時候見到我BB喇！
喺公立醫院生BB，出到黎真係可以立刻學識湊BB！D姑娘一見到我地黎到，就叫我地自己同BB換片、餵奶、掃風、換衫，我地起初連BB都唔夠膽抱起，兩三日後就已經做到呢D野！BB都好叻叻，觀察完24小時之後，check埋其他報告都冇事就推番去產後房俾我自己湊喇。我本身好佩服其他媽媽，一生完就可以即刻照顧自己個BB，之前我一生完，自己一個瞓喺度休息都辛苦到爆！聽出院講座、上產後運動班都差D唔想去。。。但原來母愛係好偉大，BB一喺我隔離之後，咩傷口痛都唔記得，因為所有野都要自己一腳踢，加上我BB遲咗先跟我，仲要密集式去育嬰室學餵人奶！無覺好瞓嘅日子就由呢一刻開始。。。唔怪得之前D媽媽成日話會懷念大肚嘅日子，而家回想番我已經好懷念，起碼想去邊就去邊，仲享受到女皇式嘅照顧，而家就到BB有皇太子級嘅照顧喇！媽媽，加油啦！
