懷孕期點滴 (Week 36 - 提早放產假？)

好不容易去到36週，終於打敗仗。。。我之前其實成日心諗，成個孕期都無病過真係好彩，但都唔夠膽講出黎。。費事烏鴉口。又以為自己大肚身體好咗，又諗係咪無食生冷野個身體會強壯D。。可能因為一直都無大病過而掉以輕心。。結果臨。尾。香！

話說我地因為方便照顧BB要搬屋，之前一直要遷就裝修時間，結果要等到36週先可以搬。可能因為太忙碌，爸B公司野又忙，結果佢率先病倒。。。睇左兩三次醫生都唔好，最終喺我地搬左屋之後，我終於俾佢嘅超級病毒傳染咗。。仲病到一發不可收拾。。。喺36-37週呢兩個幾禮拜，我經歷到呢生人從來都未試過因為病而咁絕望既日子。。。

因為大肚既關係，醫生開既藥都好輕，食左可以話完全無效用，唯一就係醫生好肯開病假紙，叫我休息多D。。。所以加埋病假同大假，預產期前三個半星期我已經開始放假喇。。。喺放假既頭一個禮拜我已經睇咗三次醫生。。。本黎唔想食既抗生素都食埋，都係喉嚨劇痛加勁咳，再到失晒聲，一勁咳個肚就好chok。。。真係辛苦到想死。。。。爸B喺新加坡公幹番黎之後，病情仲嚴重咗，仲發高燒！ 兩個人齊齊病重。。。睇見一堆藥海真係嚇死人！！

食極藥都好唔番，仲加埋個氣喘！一到夜晚就透唔到氣！好擔心唔知會唔會無啦啦變咗哮喘，又好擔心好擔心忽然生得會唔夠氣生，所以有晚又透唔到氣就夜嗎嗎入左去聯合醫院急症室。。。諗住"備案"先。同之前去過急症室一樣，大肚婆去睇基本上係唔駛等。好快就被分流去到見醫生喇！個醫生問完一輪症，話開D藥俾我，等咗好耐，因為話唯一呢支唔影響胎兒既藥要喺第二度拎過去，佢地藥房無。醫院俾左支氣我聞，係話擴張氣管。話支藥只係舒緩，唔會對病情有幫助。。。

佢見我抖番氣仲瞓得著就開咗支咳水同止痛藥俾我就叫我走喇。。仲話氣喘係唔會影響生仔。。呢一刻我已經知道藥物係幫唔到我，加上雖然話D藥物唔會影響BB，但每食一粒藥落肚，心入面都覺得好不安！所以我番到屋企嗰個星期，無食藥既情況下，咩食療湯水中醫都試齊，一日飲幾十樣野。。咸甘桔、青欖湯、田雞湯、洋蔥水、果皮水。。。。總之話對病情有幫助嘅都試晒！我一日未病好，一日都唔想BB出世住。。。

後記: 好好彩最後BB好生性！等媽媽好番一星期之後先出世！