Yahoo Blog 要搬家了！

估唔到今年剛剛開始的起心肝寫 Blog，Yahoo Blog就要結業了！咁我應該比起其他Blog友幸運，因為我喺呢半年內都只係寫咗十幾篇blog，搬起家上黎，都簡單方便得多！喺云云咁多個blog， 似乎blogspot算係比較易用！首先第一步，就係要將舊嘅blog搬過黎先啦！我唔會俾Yahoo Blog結業而俾藉口自己唔繼續寫Blog架！花咗少少時間，就將帶有喜笑哀樂嘅十多篇blog搬咗過黎喇！之後要俾d心機追番d blog先！

婚禮化妝 落實Big Day MUA - Yvonne

話說之前去婚展嘅時候join咗間租衫公司 - Je Taime Beaucoup 囍愛一生，佢有埋化妝同攝影服務，當然一次過join多d野就會多d discount啦！本住呢個心態，而我本身又無咩心水嘅MUA，見睇佢d相都好似正常，就即管試下妝啦！佢得2個MUA有portfolio睇，我見yvonne好似都幫唔少artist做過make up，d樣都好似正正常常，咁就揀咗yvonne試妝喇！

我2月份嗰時join，當時一心諗住影完pre-wedding先去試，到時會比較知道自己想要d咩style嘅妝。 所以俾咗試妝費之後，一直都未book時間試妝，去到3月左右，Je Taime嗰度打黎叫我地約咗個時間先，因為yvonne個schedule都好full，咁我話我要星期六、日，佢話最快已經要去到6月！咁誇張？！咁我就唯有照book啦，本身就約咗8 Jun嘅。點知隔咗幾個星期，佢地又打黎話要改遲d，佢問我想22 Jun 定 29 Jun，咁我地之前book咗法國婚紗29 Jun揀相，所以就改咗22 Jun喇！(呢個係之後發生離奇羅生門事件嘅前哨)因為佢打黎嗰時我番緊工忙緊，所以我快快答咗佢個時間就好快收線，之後我就mark咗個時間喺我電話個schedule度喇！

話咁快就到咗6月，到到試妝嘅前一日都無人打黎confirm，因為都已經係2,3個月前book，我都擔心個booking有冇問題，所以我早一日就自己打去confirm一下個booking。羅生門事件正式展開．．．話說我早一日朝早打咗幾次去都冇人聽，當時個心都怯怯地，話晒俾咗一半deposit (包括租衫、攝影同試妝) 之後，自上次佢地打黎book試妝時到而家都無同佢地contact過。之後我一直打到12點幾，終於有人聽！但聽電話嗰個人都係古古怪怪，佢把聲聽落去係一個阿姐嘅聲。我話我之前book咗yvonne聽日試妝想confirm個booking，咁佢話check下本booking簿先，我講咗我係陳小姐約咗3點，佢check完就話有我個booking，應該就無問題。之後佢竟然反問番我，係約咗喺尖沙咀間舖定係佐敦嗰邊試，我就話好耐之前你同事打黎就話係尖沙咀嗰邊嘅，所以我都想confirm一下，佢話如果佢地話係尖沙咀就係架喇！話晏d"pheobe"番黎叫佢打個電話俾我再confirm (我完全唔知邊個係pheobe)！雖然我覺得好古怪，但既然佢話有我個booking，咁就無問題啦！之後到到夜晚，一直都冇人打過黎俾我！我心諗，呢間公司嘅service都係麻麻，無理由試妝前唔打黎同我講有d咩要注意架嘛 (因為我pre-wedding時已經化過2次，知道有咩要注意，所以無再打去問)。到咗第二朝，即係試妝嗰日嘅早上，諗黎諗去都係覺得怪怪地，點解會無 人打俾我，所以打多次電話去！之後又係無人聽．．． 之後我上佢個網頁睇，我發現原來佢地係開1點，唔怪得成日打去都無人聽啦！之後我諗，我book咗3點，我等到1點打去，我都出咗門口啦！所以都係直接上去算，反正我尋日都打去confirm過！

唔知點解我個心一直都好唔安落，直至我到3點上到去．．．我一上到去，震怒嘅事件就開始發生！我就話我約咗yvonne試妝，坐counter個姐姐睇完之後，就話我應該係去佐敦嗰邊，我心諗玩野咩，又要行黎行去！心諗都算啦，應該都唔會好遠！點知，佢睇睇下，又話我係約咗deborah而唔係yvonne！(咩野呀？！從來都無約過deborah囉！究竟邊句先係真呀？)之後再睇，又話無我個booking！(玩夠未．．．？！）我呢下真係著著地火！之後佢叫咗另一個同事出黎睇，睇完一輪，話我應該係約咗29 Jun！（唔好玩啦！我尋日打黎confirm過） 之後我將我confirm booking嘅事件由頭到尾講一次，佢話聽電話嗰個係改衫個姐姐，之後佢喺個電話度做咗咗一場精彩嘅扯貓尾演出，內容大致係鬧佐敦舖個同事，話個阿姐亂咁聽電話累死佢之類．．．．．．但個問題係，整件事唔係錯咗一次咁簡單，係由改日子嗰下已經錯晒！我本身29 Jun要揀相，我根本無可能會應承佢29號的，加上我係由8號改遲，如果yvonne係22同29號都得閒 (因為知道22號當日yvonne係同另一個人試妝，而佢係遲過我book的)，正常都會揀一個近d嘅時間，即22號！所以，我100%肯定係佢地搞錯！ 喺呢個錯上錯嘅情況下，我無可能唔嘈到拆天啦！好彩嘅係yvonne當日係幫緊另一個人試妝而唔係有job做，咁佢叫我地等到6點．．．我當時已經無得揀，因為我黎緊幾個weekend都唔得閒，我唯有披頭散髮又冇化妝咁等多3個鐘頭啦！結果我地去咗睇戲，但要坐第二行，睇到我頸都斷！之後佢地差唔多夠鐘嘅時候，都有打黎同我地講yvonne已經ready，又問我地識唔識路去，再同我地道歉！錯就一定係佢地錯架喇！但如果改過第二間又要重新搵過，d discount之前傾得咁辛苦，都唔想又黎過，所以都唯有算數啦！

搞咗成日，終於都可以開始試妝喇！我喺之前book咗yvonne之後，都有上網search過佢，但都無咩其他jm用過佢，所以都無咩佢嘅作品睇到。我之前pre-wedding用過兩個MUA，台中嘅show老師就真係好好，但無奈無可能請佢黎香港。第二個係法國婚紗嘅lucy，有睇我之前"法國婚紗pre-wedding - 拍攝日" 呢篇都知道，其實唔係佢個技術唔好，但硬係好似怪怪地咁，好多時搵MUA都係講夾唔夾！因為我又唔想花時間同花錢再試妝，所以試妝嘅時候都唔想去"考"個MUA，總之我要嘅野佢做到就ok啦！所以一黎我就俾佢睇晒我想要咩妝，之前整過d咩出過事，整咩會好睇etc. 首先係試個褂裝先，因為褂頭一定要梳起晒d頭髮，我基本上係未試過一個成功梳起嘅髮型！之後yvonne同我研究我個面型可以點就，之後就開始做第一個妝喇！第一個妝都化咗好耐，因為佢一路化又會問我意見，又同我試唔同效果，去相先！

影相呢part都搞咗好耐，因為佢嗰度d光線偏黃，好似影黎影去d色都唔靚。終於都影到一張我覺得好d， 但始終我梳起d頭髮都真係爭少少。呢個佢話按咗我個要求黎做一個新潮嘅褂頭，傳統嘅都唔會咁梳。咁望上去都算正常，我今次都係淨係同積去，冇叫朋友一齊， 所以我即時whatsapp咗俾佢地睇，佢地都話ok！都似番自己，因為上次法國婚紗嗰度，我屋企人同朋友都不約而同地話個樣唔似我，似o靚模！所以今次我都好著重叫佢唔好化咁濃，我想似番自己。之後就開始試第二個頭喇！因為唔想考佢，所以我叫佢整個我試過2次都好睇嘅髮型，如果佢做到就即係ok掛？

呢個做出黎都唔錯！雖然我d朋友話好似同我平日個樣差唔多，但因為影相出黎係會淡好多，所以影相出黎同我平日見真人一樣嘅話，應該就ok啦！起碼一定似自己先囉，不過我係覺得佢d頭飾唔夠多揀，不過因為今次係試妝，到時我喺度租埋衫，應該可以直接襯埋！同埋yvonne見我鍾意d花花頭飾，佢建議我到時可以買鮮花，都可以考慮一下！

最終我就即時confirm咗yvonne做我個MUA喇！本身都諗緊join早+全晚定全日，因為我地未同photog嗰邊傾，所以未知會唔會出去影相。 本身想join咗早+全晚先，遲d決定影相先改全日。但佢話如果而家唔mark住個期，有機會佢會中途有job接會變咗無期，既然只係相差一千蚊，就 join埋啦！結果我地由6點搞到夜晚10點幾，兩個妝原來要搞咁耐，我都有擔心會唔會係佢手慢，但我諗應該係試妝又會傾計又要咩都要試所以慢掛。佢都係有經驗既，應該都唔擔心掛？結果搞到10點幾，飯都未食，搞咗成日攰到傻咗！搞到咁夜，化妝嗰時d光線又強，搞到我對眼d微絲血管都爆晒．．．最後去附近間韓國餐廳食咗d野就快快番屋企喇！希望big day日會順順利利啦！

法國婚紗pre-wedding - 揀相篇

揀相距離影相嘅日子有兩個禮拜，喺呢兩個禮拜入面，我同積不斷同自己講唔可以再加錢，因為上次台中法蝶嗰次已經over晒 budget，而我地亦發覺嗰d咩相簿油畫其實只要big day嗰日夠用就ok！現今嘅居住環境咁細，根本就無地方擺，而咁大本相簿，根本唔會成日拎出黎重溫，最多都係喺電腦睇！況且，以上次法蝶嘅case為 例，我地俾多咗$4500買多咗十幾張相。多咗十幾張相其實都唔係太覺眼，但就好記得自己俾多咗幾千蚊！基於以上種種，得出黎嘅結論，我地今次係要堅 持．．．唔！加！錢！今次影完相距離揀相嘅日子，有成兩個禮拜咁多！有足夠時間俾我地冷靜，上次台中嗰次，影完新鮮滾熱辣就去揀相，真係好易衝動揀多咗！因為講真，影結婚相真係好好玩，所以真係好容易會洗大咗！

我地約咗去佢地九展嘅門市揀相，因為呢排公司太多weekend嘅event job嘅關係，所以改咗去星期五晚放工去！我地收工勁趕去到九龍灣，見到個shuttle bus站勁多人等車，於是決定行過去！行到身水身汗，去到已經7點幾，遲左半個鐘有多！ 我地決定一個鐘內KO佢！一去到，門市無咩人，門市個姐姐首先開晒d相俾我地睇一次先，我一路睇，一路覺得好安心！因為真係影得麻麻地．．．我即刻同積講，唔駛擔心要加錢，我驚29張都揀唔到！唔知係個門市小姐聽到我地講定咩？所以佢全程都無sell我地，同樣，佢全程都無咩點講野！積話佢有少少黑面，我唔理啦！總之佢唔sell我就得，反正佢要sell我唔會sell到，因為真係揀唔落手！可能佢都知，所以都費事晒口水！之後第一次落手揀，已經刪走咗一大半．．．尤其係紫色衫嗰個造型，真係揀唔落手，差d想一張都唔揀！個樣勁老餅，件衫又著到勁肥，擺d pose又古古怪怪咁！d表情又唔知點！今次呢輯真係影到我好醜樣！好多張都影到我個表情好硬，擺pose嘅時候攝影師叫我咁擺，擺嘅時候都feel到怪怪地，但當時相信佢嘅專業照做，但影出黎我真係超生硬！反而積嘅表現好好多！ 之後好多個場景都揀唔落手，好似有d訓喺個地下度，真係好明顯係訓咗喺路邊個地下．．．有d出咗出面個花園影嘅，個景又好雜亂，好似平日自己閒影嗰d咁！竟然影得最好嘅係熊啤啤個景，好彩當時無skip到，如果唔係真係揀唔夠！不過因為積本身真係好憎嗰個景，所以即使影得個樣靚d，都唔係揀咗好多！我印象中好似一張獨照都無揀．．．因為影得都唔靚，所以留番多d quota俾積好過！我地真係用咗一個鐘頭都無，就揀好咗29張！之後仲要揀相入相簿、做封面、油畫，因為真係冇咩邊張靚，所以好難先揀到封面同油畫．．．上次法蝶都係好難揀，但係係靚相多到唔知揀邊張好！結果到最後．．．我地真係一蚊都無再加．．．都唔知係好事定壞事！果然真係一分錢一分貨，好彩上次影咗法蝶嗰輯，如果唔係，我真係以為我影結婚相就會係咁醜樣，今次雖然影得唔係咁靚，但三千幾蚊，俾我地玩咗成日，咁多個人serve我地，到時big day又多咗本相簿同油畫，都算ok啦！

因為門市又係唔俾人影相，所以冇得睇住！到時拎咗相再upload上黎啦！　

揀完相之後，慶祝我地無加到錢，所以去咗 megabox 食餐好嘅！

 

法國婚紗pre-wedding - 拍攝日

話咁快就到咗影相日喇！本身之前係約左2點鐘，但法國婚紗早幾日打黎話想改11點，反正我地嗰日成日都預左出黎影相，早d去早d影完都好！因為唔可以化妝同gel頭嘅關係，一早我披頭散髮咁就出發喇！因為知道晏d都應該無時間食野，所以約咗積去又一城個food court食個豐富嘅早餐先再去！今日都落住幾大雨，好彩我地係影studio，如果係影外景都唔知點影！

我地準時去到，同門市個姐姐confirm左揀相個時間就上去準備喇！佢俾左個locker我地放野，之後我同積就放開兩邊各自換衫！雖然我都算係一個獨立嘅人，但佢個安排要分開我地兩個就真係爭少少．．．我當時仲諗，唔會係化妝咁耐都要分開掛?! 咁我咪會悶爆？ 好彩原來積換完衫就可以自己走黎走去，佢好快換完之後就過黎我化妝嗰邊搵我喇！ 我個化妝師係Lucy，佢幫我換完第一套衫之後，就開始幫我化妝喇。其實換左套婚紗個人都幾辛苦，著住佢黎化成2個鐘頭妝都幾辛苦！記得上次台中嗰次係差唔多化完佢先幫我換衫就好好多！

化妝姐姐Lucy一黎就問我個頭想點set，之後俾左本書我參考。之後我同佢講我d頭髮唔可以梳晒上去，一定要放d頭髮落黎，如果唔係會好出事！之後我俾左我上次台中影嗰次我覺得靚嘅造型俾佢睇！又俾左d出事嘅髮型佢睇！之後佢話上次set過今次又整多次怕唔怕一樣，但我自己知自己事，我個面型好多頭都唔整得，所以都係唔好為左轉而轉！同埋我諗類似嘅髮型，應該都可以有少少變化嘅！不知不覺，化個底妝同set第一個頭就搞到成2個鐘喇！

我一路化，積就坐左喺我後面等，佢都悶到發霉！呢個已經係差唔多完成！

加埋個頭飾就搞掂！

呢個就係我第一個造型，影左相出黎係唔錯，但唔知點解照鏡嘅時候就硬係覺得怪怪地！望黎望去都覺得有d唔妥，但又講唔出係咩問題！ 又覺得個妝好似濃咗少少，但上次影相嗰時已經知道影相出黎係會令到個妝淡咗一半，所以專for影相的話係要濃d！又覺得好似個頭d前陰太多，但Lucy話我本身個陰就係咁！最後喺搵唔到原因嘅情況下決定就咁算數！

成功自拍一張！

個 妝ok之後，Lucy就幫我地call我地個攝影師上黎喇！我地個攝影師係Daniel，佢助手叫阿正。Daniel望上去都好後生，但後來見佢影相嘅時 候都好熟練，我估佢喺呢度都做咗好一段時間。一開始我地就落左去地窖嗰層度影一個水晶珠簾嘅場景，佢首先幫我地試影幾幅，再俾我地睇個preview，問 我地鍾意邊邊面，同埋我要七三面或者八二面先會影到唔會有包包面。試完之後就開始影喇！一開始嘅時候，積又遇番同一個問題，就係笑得好假！ Daniel一黎都話佢笑得好流，所以後來d相佢就叫積微笑，而我就要笑個爽嘅！喺地窖影左幾個場景之後，就上左去地面嗰層度影。雖然佢地好似好多場景咁，但其實每個景都係得一小part，所以如果有其他人影緊，我地就要影第二度或者要等一陣。

之後就轉第二套衫喇！呢套衫其實我試嗰時都覺得一般，但當時唔知係因為唔啱身所以覺得唔好定咩。因為佢地d衫係唔會幫你改，只會係加布編針，而試衫嗰時，之前都講過，真係趕到無朋友，所以極度唔啱身佢都由你！因為台中嗰次揀得最多就係粉紅色嗰套，所以就唔想再揀粉紅色，諗住揀件紫色，當時就當佢係唔啱身而唔靚，所以照揀！結果，原來真係唔係咁好睇！再加上個髮型，唔知做咩好似好老餅咁，又係講唔出個原因，可能係因為d頭髮太鬆，但太貼又唔好睇！所以最後又係搵唔到有咩解決方法下唯有照影！ 可能攝影師都覺得我呢個造型唔好睇，所以好快影完就叫我換第三套衫喇！

到左第三個造型，因為前兩個髮型都係放d頭髮落黎，本身lucy叫我梳上去，但我堅持唔肯！結果喺佢本造型書左睇右睇，揀咗呢個希臘女神頭，本身lucy話佢無嗰絲花花圈，問我有冇買鮮花，呢d咁呃錢嘅野梗係唔買啦！好彩最後佢問隔離個化妝姐姐借到！呢個造型都算ok，所以都算影得多！我地仲影咗嗰嗰熊啤啤場景，本身積直頭話想skip咗佢唔影，因為真係堅行．．．哈哈！我地仲有行出咗少少去室外影，因為今日有落雨，所以超多蚊！我一行出去就針咗幾大粒！最後影到5點幾就影完！化妝姐姐lucy話send番d相俾我，所以拎咗我個facebook，佢即刻就post咗上facebook tag咗我，本身我都未公開我結婚嘅消息，因為咁所以就半公開咗呢件事！不過都唔係好多人睇到^^"

我地影完嗰下都真係驚驚地，雖然只係得3個造型，但係大大話話都影咗十個場景有多！起碼都影咗二百幾張，我地只係得29張，好驚會揀多咗相！影相呢part真係最易out budget，聽好多人講，喺FB度影都洗多咗成萬蚊！ 約咗兩個禮拜後去揀相，希望到時個荷包會無事啦！(汗)

法國婚紗pre-wedding - 揀衫篇

話說之前 book天澄閣嗰時，佢地送咗一張法國婚紗嘅影相coupon俾我地，個package係free 10張電子檔案嘅相，包一件婚紗連化妝set頭。當時我地都仲未出發去台中影pre-wedding，但已經join咗法蝶個package，心諗應該唔會再俾錢人賺！我當時已經諗去到一定俾人劏，唔去的話，就劏我嘅機會都無！ 點知，原來影結婚相真係會上癮架！唔怪得成日聽日講結婚最容易out budget嘅item就係影pre-wedding！ 我地以台中嗰輯無影到studio為藉口，俾自己喺香港再影多一輯！我地係剛剛去完台中番黎無耐，即係3月左右就上左去法國喺尖沙咀嘅門市傾個 package。最終我地加咗$3,800 join咗個package，包29張相入落一本相簿，個package包咗3件衫連化妝set 頭！其實個sales都無特別push我地，佢由一開始sell我地貴plan，再由貴到平開始sell起，相信我地呢個應該已經係package入面最平架喇！我初初以為，應該都無咩人可以淨用coupon一蚊都唔加咁去影，但我後來上番d blog度睇，真係有jm係唔加任何野去用張coupn！勁！不過過到第一關，都唔代表過到揀相嗰關！但我知道嘅係．．．．．．我地第一關已經失守！

法國婚紗其實幾有系統，join嘅時候佢會俾一個website login你，叫你喺試衫之前自己上網揀定20套想試嘅衫，到時去到就會直接拎出黎俾你試。我地約左5月中去揀衫，因為我有2件係婚紗1件係晚裝，所以我之前揀嘅大部份都係婚紗。咁樣都好，因為之前台中嗰輯，婚紗嗰輯我地都覺得麻麻，呢個都係其中一個俾自己影多次嘅藉口！

佢試衫呢part就真係拍馬都追唔上法蝶！佢只係有一個類似bontique嘅fitting room俾你試，同法蝶嘅獨立試身房連3面台再有埋沙發茶几真係無得fight！仲要個fitting room喺正個門口隔離，d人行出行入都會見到你！試嗰時真係趕到無朋友，佢有2個staff serve你，一個負責幫你著，一個負責幫你拎走除咗嗰件衫。一著上去，佢就叫你出去企上個台階影張相，前後都無10秒就要換過第二套，基本上你係無可能睇清楚件衫，個姐姐有講過話睇唔切要出聲，但當你想照鏡照多兩眼，佢就會話，我地影咗相架，你一陣可以喺電腦睇番！咁即係．．．．．．我出聲都無用！

積成功偷影！ 因為嗰度係唔可以影相架，所以積影咗兩張就要收埋個電話喇！之前去法蝶我地直情拎埋單反出黎任影唔嬲！咁一分錢一分貨，我地都好明白個道理！

極速穿過晒嗰十幾件衫上身之後 (注意: 個程度唔用得上個試字，我只係覺得穿過一次上去)，就坐低睇佢地幫我影咗嘅相喇！之後發現都幾出事， 因為佢係用嗰d極舊款嘅DC，呢個都唔係大問題，最大問題係佢個機檬到阿媽都唔認得！基本上有5-6件婚紗我喺個mon度望上去係一模一樣架．．．我唯有 憑我頭先速記嘅能力，回想番我頭先"穿"過嘅衫嘅感覺黎揀！圖中呢件最終無揀到，因為另一件同呢件差唔多，但係佢係designer系列，係我 upgrade咗個plan先包，所以抱住唔好蝕嘅心態就揀咗嗰件！

之後就到積揀男裝禮服，但基本上佢都無咩得揀，印象中好似得兩款唔駛加錢，而只有一款係正常，另外嗰款係勁古怪！所以完全唔需要費煞思量就可以揀到，試啱個size就搞掂！之後佢同我地講番影相當日嘅注意事項就走得喇！成個過程都係一個鐘頭左右！原來中途俾過一份問卷 叫積填，但份問卷並唔係問你覺得佢d服務點，而係問你幾多錢人工，除咗呢輯婚紗相之外仲有無影其他etc. 我地估計係俾佢d sales到時用黎sell我地買相用既！希望到時我地可以堅忍！

落實場地佈置 - v8 wedding

終於都落實左婚禮佈置呢一part喇！我地上網睇左好多blog，又去婚展比較左好幾間佈置公司，終於襯5.1呢日假期落實左v8 wedding decoration做我地婚禮佈置公司！其實成個過程都有d峰迴路轉，話說我地book天澄閣嘅時候，offer左3間decrotaion公司嘅 cash coupon俾我地，分別係maple妍楓、v8同jnc。早喺幾個月前，我已經上網睇blog做research，見d jm話 jnc d設計好靚，但同時價錢亦都成正比上升。而網上睇過佢地3間嘅作品，的確係一分錢一分貨．．．

Decoration呢一個範疇，本身我地都預左around 10k嘅budget，諗住已經算好鬆動！但因為天澄閣本身個樓底好高 (呢個係其中一個吸引我地揀呢個場地嘅原因)，所以個backdrop做到頂要加大，所以做backdrop時候要加錢！下面兩幅圖就係做到頂同唔做到頂嘅分別，其實要做晒成幅backdrop，係上面同左右都要加大，要加錢都好合理，但當初book場地嘅時候淨係見到樓底高，覺得好grand，又唔會諗到咁長遠，考慮埋做decoration要加錢嘅．．． 所以各位jm，揀場地嘅時候，唔好俾眼前好華麗嘅佈置所蒙蔽，其實係要用金錢去堆砌出黎！

而佢個入口位可以做一個隧道 (呢個亦係另一個原因吸引我地揀呢個場地)，所謂嘅隧道，其實係將佢入口嘅酒櫃用拉布做decoration，下面係有做隧道decoration同冇做 嘅分別，其實呢幅相都有做一面，上次去無影到相，如果完全唔做嘅話，會係前面嗰塊布都無埋．．．

 

我地喺一開初嘅時候，一直都係諗住用foamboard做backdrop，但係幾個月前去婚展初步問過一間佈置公司，用foamboard再加埋上面嗰兩個item，已經over晒 budget。因此我地諗住退而求其次，做拉布嘅backdrop。於是我就上網睇下d作品，之後見到 Sans Decoration 嘅佈置都唔錯，佢地常用嘅係拉布上面加蕾絲布，望上去好似有d pattern咁，有少少似print嘅效果，加上佢款花柱我尤其鍾意！就係呢款！

之後我問番有個舊同事上年結婚嗰時搵邊間decoration，諗住比較下d價錢，點知原來佢都係搵呢間！之後我地就send email去quote價，佢建議我地join個deluxe package再on top加野，加大backdrop同做隧道再加埋地毯等等，出番黎個價錢要12k！ 之後我再send email去另外幾間公司報價，左加右加都接近一萬！於是我地諗住婚展再比較下其他公司！我地喺婚展度問左3間，分別係maple妍楓、deca cafe同埋oyster workshop。

Maple妍楓
天 澄閣俾左coupon我地嗰3間佈置公司，今次淨係得Maple一間有喺九龍灣擺婚展，所以我地第一間問嘅就係Maple。佢個basic package其實唔貴，但加高再加地毯後，同Sans Decoration價錢都差唔多，扣埋天澄閣嘅$1000 coupon都係平左7百零蚊，最主要係佢俾我地睇嘅reference，我地都搵唔到有合眼緣嘅design，所以了解完之後都唔作考慮之列。

Oyster Workshop
之後再睇嘅就係oyster workshop，呢間本身都無咩興趣睇，個booth都唔多人，但係因為想睇嗰間deca cafe full左未有位，所以坐低了解下。呢間佢地sell做foamboard嘅package，本身其實都算抵，但因為我地做foamboard又唔想淨係一塊backdrop無pop up嘅foamboard，之前見過人做foamboard，一d pop up嘅野都無其實真係唔好睇！但加一塊都要1200蚊，最後佢offer到1200有兩塊，但加埋地毯嗰d都貼近一萬，最重要係，呢間無咩做過天澄閣，所以有少少危機，而價錢唔係特別劈價，所以都唔作考慮。

Deca Cafe
最後就睇deca cafe，因為近期天澄閣同呢間佈置公司做promotion，佢地有個special offer俾天澄閣嘅客戶，有個$8,888嘅package，包做到頂嘅拉布backdrop、有埋地毯同其他table decoration，但如果要做埋個隧道total都要過萬！但佢呢個package只可以喺佢二十款設計入面揀，只可以改顏色，改其他少少野就已經當係一個新design，同樣問題，我都係喺佢指定嘅款式揀唔到我地啱心水嘅設計！同埋佢個價錢同Sans Decoration差唔多，所以最終都無考慮。

睇完三間之後，我地都覺得我地本身先入為主覺得Sans Decoration係好d，因為佢現有嘅款式我都揀到！如果價錢只係相差一千蚊內，我都係揀番Sans Decoration。因此，我地離開左個會場之後就打電話約Sandy出黎傾。但佢d時間好難就，因為setup佢都係自己follow up，所以好多時間佢都去左set場，而佢之前強調佢一日只係接一單job，所以都想快d confirm實佢。結果我地就約左5.1嗰日假期，但要就佢set場，只可以6:30pm喺銅鑼灣starbucks度傾！

終於到左5.1，點知我一早收到一個email就令到件事有峰迴路轉嘅變化！

收到嘅係v8嘅email，v8係天澄閣其中一間有俾到coupon嘅公司，我之前都有send過email去問d package，佢個basic package係抵嘅。但因為佢d拉布款式都係無Sans Decoration咁靚，而按我地嘅要求左加右加，出到黎嘅價錢都係差唔多，所以我都無再進一步同佢地傾。但我呢一朝收到佢個edm，見佢 promote緊foamboard嘅package，而佢寫明個優惠只限5月1號confirm嘅優惠，於是我地就即日約上佢公司了解下！我地喺見 Sandy之前約左佢3點鐘傾，諗住俾多個選擇自己都無壞。

上到去就同之前email聯絡個Patrick傾，咁佢show佢地d sample俾我地睇，因為可能佢同天澄閣有做joint promotion，所以佢好多reference都係喺天澄閣。但主要都係一d唔太特別嘅拉布款，之後我就開始問佢個$4,888嘅foamboard package，首先我地要加大要加$1,500，之後要舖地毯又要加$1,200，仲有要做foamboard pop up一件要加$500，加埋晒就around 8千，經過我地左r右r之後， 其他內容就同Sans Decoration幾乎一樣，其實佢整體個價錢已經平過Sans少少，所以我地要考慮嘅係我地都係想做拉布款，定係想做番foamboard款。本身去 到呢個位，我都諗住夜晚見埋Sandy先決定，點知個關鍵位就係喺個隧道，因為本身要加二千幾蚊我地一早已經選擇左放棄。但Patrick就提到，之前都 有好多天澄閣嘅客人好似我地咁，想做隧道但又覺得貴，所以佢地就俾多個選擇，唔係封晒三邊，只係封兩邊，咁就可以遮住左個酒櫃，射燈同埋地下嘅裝飾都包 晒，價錢只係一千蚊！經過一番周旋，最終我地傾到終極優惠價$8,500做埋個兩邊隧道！咁樣計落，就平過Sans好多啦，因為嗰邊如果要做埋隧道， 要$12,000，Sandy之前喺email度話已經係好優惠嘅價錢，所以應該唔會再點有得平，最多都係我地cut咁d野先可以within budget內．．．所以去到呢度，我地就決定左join v8喇！

基本上v8同Sans我都唔擔心佢地嘅技術，尤其v8佢做咁多天澄閣，佢仲有好多獨門嘅方法喺呢個場地去setup，例如好似封兩邊嘅隧道之前都無一間有 suggest過！咁呢個時候無奈都要比較價錢！本身其實我都覺得好唔好意思，因為約左Sandy又唔去，但因為佢約我地去銅鑼灣真係幾唔就腳，而且v8 呢個咁抵，我地join Sans嘅機會真係唔大，都無謂浪費大家時間，所以我地就send左message俾Sandy同佢講唔好意思，話我地已經join左第二間，所以個 meeting要取消。我地其實已經講晒對唔住，好抱歉，唔好意思！之後換黎佢好大嘅回響．．．好話我地而家先講 (其實已經早左1.5小時)，佢話今日要setup，因為約左我地，所以要特登拎個電腦出黎好唔方便 (就係因為就左佢setup嘅地方，所以知道佢唔係特登出黎，只係拎個電腦出黎真的有咁嚴重麼？！？)，話我地無心就唔應該約佢！！bla bla　blaaa～～～～最後仲叫我地唔駛唔好意思，只係佢唔好彩！但最後再加多一個「唉」字 (前半部已出現多次)！ 其實．．．我覺得．．．雖然真係我地唔啱在先．．．但我地又冇同佢有commitment，出左黎都唔代表我地一定會join，佢咁嘅回覆的確令我地有少少唔舒服，好抱歉講句，我再有朋友想搵佈置，都真係好難介紹到俾佢囉．．．

台中Pre-wedding之旅 - Day 6 (新社古堡、返香港)

終於去到最尾一日喇！我地今日包左半日車，會送埋我地去機場！我地喺酒店食完早餐就拎埋行李出發！我地出到酒店門口就見到有架黃色車，同賴生架車係同一系 列，之後我地就上前問，我地一早就知道會係一個女司機，佢叫彭美玲。我地放好行李之後上車，我地本身一直都諗住係去梧棲漁港，呢個地方係由我地出發之前, 到行程途中一直計劃去既地方．．．早幾日都去唔成，一心諗住佢近機場，包車去完再順路去機場就perfect！呢個亦係我地今日選擇包車既原因！上到車之 後，佢就同我地講，話今日落雨又大風，去高美濕地嗰邊影唔到相，高美濕地係我地因為去梧棲漁港而打算順便去埋，並非一個主打項目。咁我就話我地主要係去梧棲漁港係想食野，但當時其實只係朝早8點半，我地又無諗過咁早其實有無野食．．．而司機都話唔肯定，因為其實梧棲漁港並唔係一個主流嘅旅遊景點。喺呢個時候，佢就show左佢個車前面個影片機俾我地睇．．．個機入面show緊嘅係一個自制嘅mv，係mv！入面播緊嘅係一d旅行相，但張張都係個人頭勁大，個景blur晒咁．．．仲配埋歌做background music．．．之後佢叫我地睇嘅係"新社古堡"，入面播緊嘅就係佢喺"新社古堡"影嘅相輯成嘅mv．．．佢建議我地改去呢個地方。呢個時候我地就擔心漁港真係會無野食，亦都擔心會落雨，所以最終就決定去"新社古堡" (絕對唔係因為佢個mv吸引到我)！

我 地出發前，再去多次九個太陽買多次手信，之後開始覺得呢個司機好搞笑！我地買野嗰時佢又唔去，到我地準備走嗰時又話要去廁所，作為一個司機，阻到客人嘅時 間係大忌黎架ma！之後我地再出發去"新社古堡"，但因為之前友人托我地去cosmed買一款藥布話好好用，但我地之前去左幾間，好多都賣晒，我地只係買 左一兩包，講到咁好用，我地又想買d番去俾媽媽用。於是我就叫佢車我地去cosmed，之後佢又話咁早應該未開，一陣番轉頭先再去！咁我地就先出發去新社 古堡！車程嘅途中，佢不斷同我地傾計，之後仲無啦啦叫我地寫d香港興嘅歌手同歌名俾佢，話等佢可以用黎做mv，佢o個個張張都係個人頭勁大，個景blur 晒嘅mv...... 之後坐左好一陣子都仲未到目的地，呢個時間其實我有少少擔心，一陣回程時間會唔會好趕．．．因為一陣係撘飛機唔遲得架嘛！坐左差唔多成個鐘，終於都到達目的地！因為時間唔係好夠，我地一陣仲要去買野，所以我地打算一個鐘頭之內就會出番黎喇！(最尾一日都仲要跑online) 我地極速衝入去就影左幾張相！個風景都唔錯，但以前喺英國都睇過好多古堡，所以都唔覺得好新鮮！

之後影影下，無啦啦有把男人聲喺後面用國語叫:「鄭先生」。我地覺得奇怪，無理由呢度會有人知積叫鄭先生架？！之後我地回望，竟然係見到．．．

原來係早兩日車我地個司機賴生，當日我地想包今日嘅車，佢話佢接左單新加坡人嘅單上阿里山，原來佢地其中一個地方都係黎呢度！我地仲諗緊個美玲司機係咪知道佢黎呢度，所以特登叫我地黎．．．

因為我之前幾日真係影得太多太多相，所以都唔係太熱烈影相，腳架都無拎。之後行下行下，見到有對情侶影緊相，叫我地幫佢揸機，我地幫佢影完之後，就順便叫佢幫我地影張合照啦！

呢 個其實並唔係重點！話說佢幫我地影完之後，就話同積講話我地用大機影相，最好就係搵番用大機嘅人幫手揸機，因為唔係人人都識用！積就講左句，好易之嘛！點 會唔識呀？話口未完，我地再行前d又見番賴生，佢好主動咁話幫我地影相，本身我地唔想影，見佢誠意拳拳，就諗住是但影一張啦！點知，佢一拎起就係咁係咁問 做咩冇畫面，又問按邊個制，搞左好耐又教埋佢按邊個掣，幫佢較埋個screen有畫面，足足搞左分幾兩分鐘，結果影出黎係咁．．．

佢影完仲問我地影成點，我忍笑忍到人都振埋，同積一齊話都ok丫！都仲未完，賴生於是話彭小姐會影得好d，叫佢幫我地影，叫住唔駛佢都已經過左黎，佢仲不斷叫我地行去邊個位，叫我地擺d咩pose，我真係笑到人都振晒，結果出到黎係咁！

佢話佢想影條水柱，結果．．．水柱真係影到，但就真係淨係影到條水柱．．．個人blur晒．．．(完全係佢mv入面d相嘅風格) 搞左都有成10分鐘！終於走得甩！但我同積都笑都失晒控，我笑到眼淚都標埋！

冷靜落黎之後，我地就上車回程喇！兜番落去果然都真係需要d時間，出番市區，我地沿路兜去搵cosmed嘅踪影，兜左一陣終於搵到，買齊之後我地就去搵野 食！我地隨意停左架車喺路邊就入左間食麵嘅舖頭！之後入到去，司機彭小姐一下就坐低同我地一齊坐．．．我第一下都打左個突，因為司機一般黎講都唔會同客人 一齊食野，雖然我地無咩所謂，但應該好多人都會介意，呢個做法真係有d好笑！咁我地都循例問佢要唔要食d野 (其實嗰時只係早上11點左右，我地包車都係包到十二點幾，即係話佢車走我地再食都仲有餘)，之後佢話要，之後就一齊叫野食，仲計埋喺同一張單．．．雖然碗麵都唔貴，不過係個做法有d搞笑，到走嗰時佢話俾番錢我地都無收到。反正都一齊食，積就提出話同佢影幅相．．．

我地一話影，佢即刻拎個太陽眼鏡出黎話要「裝一下年青」 佢仲拎佢個dc出黎話要用佢嗰個影，仲話要淨係影我！仲要開晒閃光燈，我個樣醜到極點！ 仲同我講話影得好靚，一陣要放上臉書．．． (oh....my....god) 積仲笑話我張相將會出現喺佢d mv入面（烏鴉叫：呀呀呀．．．）

食完之後，我地就起程去機場，之後竟然塞車！佢話因為今日有棒球賽，所以行另一條路，點知都塞，坐左好耐都未到，已經過左我地原定嘅時間！雖然我地原定嘅時 間係預早好多，但因為我地唔熟嗰度嘅路，又唔知塞車會塞幾耐，心情都難免會有d焦急！最搞笑嘅係，去到一個燈位，剛剛轉左紅燈，佢竟然兜入去油站話要加油！仲話係因為紅燈先會入去加，如果唔係就唔加，咁即係話唔係必需啦！結果，我地因為咁，再miss多左次綠燈．．．(無言) 最後，終於都到左機場，比起原定時間遲左15分鐘左右，咁我地本身預早左好多，加上台中個機場好細，一行入去就可以check in，所以時間上都逴逴有餘！

就咁就完左我地6日5夜嘅 pre-wedding 之旅！今次個旅程好開心亦好難忘！講真，台中嘅景點其實唔係話特別吸引，絕對唔會係話人生一定要去一次嘅感覺，加上佢d景點都係太同小異，度度都差不多。 但最開心難忘嘅係當地嘅人，佢地真係好熱情，令我地可以完全放下戒心，好放鬆咁享受假期！諗起番到香港又要面對日日戰戰兢兢嘅生活，真係好唔想番去呀！

台中Pre-wedding之旅 - Day 5 (東海大學、法蝶揀相片)

今日嘅重點活動係去法蝶揀相，但我地都要爭取時間喺揀相之前去多一個景點！終於都唔駛早起身，瞓左一覺好之後，我地就去酒店食早餐再出發！我地去到酒店餐廳，又見到尋晚介紹我地去嗰間日本餐廳個職員，佢一早就喺餐廳門口接待住客，原來台中唔止婚紗店既人工時長，酒店都係一樣．．．我地食完早餐之後，休息一陣我地就出發去東海大學。我地行去台中車站嗰邊搵公車搭，放便搭公車就係我地住喺車站附近嘅原因！台中搭公車唔係上車入錢，我地無 佢地當地既"八達通"，上車之後車長一人俾左一張咭我地，落車嗰時俾番佢先再收錢。我地到左東海大學個站，行過對面就係東海大學嘅外圍，行到過去見到有個 地圖，我地本身黎嘅主要目的其實係想去入面既路思義教堂，我地按個地圖方向行左去大學內圍，經過左一個超大嘅體育運動場嘅範圍，都見唔到教堂嘅踪影，但我 地已經行到滿頭大汗！於是我地又再次選擇問路，我地見到有個女人喺度整緊d樹，我同積都以為佢係大學嘅職員。我地問完佢之後，佢話佢本身都要行去嗰個方向，所以帶埋我地去！我又要再講一次，台中嘅人真係熱情同好好人！原來我地一開頭已經行錯左，佢話我地應該喺我地頭先見到地圖嘅位置直行唔應該轉彎．．．東海大學真係好大，如果唔係個女人帶我地行，應該又會再次迷路。原來嗰個女人唔係職員，佢話佢個仔喺呢間大學讀書，佢都住附近。我地行左都有成15分鐘．．．終於都到左！

我地頭先順便問埋嗰個女人點樣行去東海夜市，我地喺教堂前面影完相之後，就按佢指示嘅方向行。沿途嘅風景真 係好靚，東海大學嘅建築好有日式風格，四周都好清靜，感覺好舒服，但我地今日嘅行程緊密，加上我地尋日影相已經影到好攰，無拎到腳架出去，所以我地沿途都 係草草影左幾張相就繼續趕行程！

東海大學真係比我地想像中大，所以用左嘅時間比起我地預計嘅長，我地本身仲plan左去鼎王食麻辣火鍋先再去法蝶。法蝶嗰邊之前同我地講我地一點鐘可以去揀 相，但我地一早已經plan左有活動先再去揀相，所以我地講左三點先會去。點知我地行過去東海夜市，俾我地想像中嘅耐仲要耐．．．仲行到成身大汗．．．

我地到左之後就以極速嘅時間行左幾間店舖，快速行左一個百貨公司，買左少少野，我地無買到野食，一黎我地準備出發去鼎王食火鍋，二黎日光日白，好多小食店都 未開檔。行左一陣，我地就要準備折番台中市喇！我地由落車嘅地點行到去東海夜市行左好遠嘅路程，所以即係話我要行番去落車嘅地點再坐公車番台中市係無可 能！本身我地打算坐的士，點知一眼俾我見到有架公車經過，係可以番到去台中市，我地行黎行去都搵唔到個站，於是我地又再問人，行落一條街就見到，等左一陣就有車喇！咁我地又慳番一程的士錢！落車個車站好近間鼎王，而間鼎王就喺法蝶隔兩條街，所以好方便！

鼎王好好味，又唔貴，d服務一流！好食過我地幾年前喺台北食嗰間！佢湯底嗰d鴨血同豆腐可以不斷加，d店員好主動咁幫我地加，加到我地唔想要，而家講起已經好想食！ 我地食完之後就行去法蝶準備征戰漫長嘅揀相過程！我地去到法蝶嘅時候已經4點幾，佢門市嘅職員見到我地就問我地做咩咁晏，佢以為我地唔知醒，所以打電話去 酒店搵我地，但我地出左去，佢以為我地迷路，原來我地嗰日同show老師講我地3點先會到佢無講低，我地無多講我地一早已經去左咁多地方，淨係話我地去左 食野！之後我地就坐低開始睇相，門市個女仔話佢睇過我地d相影得好好，有幾張佢地覺得好靚，佢去到個電腦打開俾我地睇，真係唔錯！之後佢幫我地叫左野飲， 我地就坐低由頭睇一次，一共有成500張相！我地嘅target係要揀46張！認真係漫長嘅征戰！

我 地睇完一次之後，個女仔就過黎同我地一齊揀，我地話唔要嗰d佢就會打個交叉，注意我地係揀d唔要嘅相，唔係揀d要嘅，所以難度又增加左！我同積一早都有共 識，我地唔可以加得太多相，所以我地第一round見到d唔係好靚嘅都全部話唔要！所以第一round我地已經刪走左二百幾張！門市個女仔都好驚訝我地刪 得咁快！其實我地話唔要嗰d，都真係唔差，但因為加相真係太貴，所以我地不得不割愛！另一個原因．．．係因為積好多張相嘅表情都好唔自然，所以有d我覺得 靚嘅都唔揀得．．．積仲沾沾自喜話多得佢，如果唔係我地會仲難揀，加既相會更多，會俾得更多錢！某程度上呢個都真係一個事實嘅．．．揀完第一轉之後，我地就見到海倫，佢話啱啱影完相番黎，因為佢有份同我地影，所以陪我地一齊揀相！佢地真係工作 non-stop！佢同我地揀嘅過程係會將一d相類似嘅俾我地作比較，唔似嗰d都唔會俾我地揀，我地screen完第一轉，都仲有百幾張！佢第一轉有同我 地講如果要加晒呢d相，要加成兩萬蚊！@@食左我隻車咩？個package都唔駛呢個錢！不過我地真係覺得仲有好多張可以唔要，之後我地話想再刪多一轉先！


之後攝影師REX有走過黎一齊睇，雖然佢無講野，但心理上我地係會有d壓力，始終喺佢面前唔係幾好意思話唔要d相咁．．．感覺上好似唔尊重佢咁丫ma！呢個 應該係佢地嘅策略！佢地又會係咁讚d相靚，仲話我其中一個造型好似一個叫"麻衣"嘅女星，佢地話係一個由日本去台灣發展嘅藝人，我到到而家都唔知嗰個"" 麻衣" (其實唔知係咪咁寫) 係咩樣，應該唔會係日本女優掛？我地見到仲有百幾張，我同積同時講，我地要"闊斧"d，意思係話我地要大刀闊斧咁唔要d相！佢地仲係咁問我地咩叫"闊斧"，我地梗係唔話俾佢地知啦！之後有d其實真係幾靚，但我地都唔要，因為加相實在太貴！有d佢地都會話唔要好可惜，咁都無計架，你地收得咁貴！之後再周旋左一round，又要揀邊d相入相架，又要揀邊d相做大相，已經搞左4-5個鐘．．．真係體力消耗！最終我地揀到淨番六十幾張，佢又再同我地計 錢，都要成6千蚊，我地話我地喺香港都有影，所以無預咁多budget．．．xyz$#%$%)．．．(下刪3000字) 搞左好耐，最終我地都加左HK$4500要晒嗰65張相！即係加左十幾張，其實都仲係有少少貴，但一黎真係影得靚唔捨得唔要，二黎係因為佢地真係好落力， 我同積都覺得唔忍心拒絕．．．所以最終都加左！不過呢個錢我地又唔會加得好唔舒服，就大家開心下啦！

佢最後print左份野出黎有晒我地揀左嘅相既thumbnail，上面mark住我地邊張相要做d咩，邊張要改d咩，我同積番到酒店就不禁係咁拎出黎睇！我仲話我地仲有成年先結婚，我地而家就係咁睇，我驚到時會睇厭左！哈哈～post 住幾張出黎先！

經過超過6個鐘嘅漫長搏鬥，Peter就車咗我地番酒店，佢話我地算揀得快，另外一pair仲揀緊！呢pair就係第一日同我地同一架車嗰pair人．．．佢地1點鐘已經開始揀，即係仲要早我地3個鐘到！又好似誇張左少少呀？我地番到酒店就執行李，準備聽日最後一個行程之後就番香港喇！真係好唔捨得啊～～～～

後記：
呢張相法蝶post左上佢地個facebook，差不多有成2000個人LIKE，REX仲拎左黎做cover photo tim！真係令我地飄飄然