話咁快就出發喇，我地之前特登去申請左工商銀行既香港航空白金咭，本身個迎新禮物既里數係足夠我地換台中既來回機票的！點知我地早成兩個月打電話去換都話無晒quota (明明上機後係發現佢得3成客滿，講起就提醒我要打電話去反映)，咁我地就唯有照買機票啦。我地坐12:05機，我地就各自坐機場巴士出發啦。呢度就發生 左個小插曲，話說積喺早一日已經同我講我地去terminal 2，之前講過我呢排都好忙，所以行程上既野都交俾積負責，坐緊車既時候，我突然心血來潮多口問佢一句，係肯定係terminal 2? 誰知又係佢一廂情願既想法(好彩多口問下)。。。。。。之後我地順利check in，我地香港航空張白金咭一年有5次免費使用貴賓室，我本身對航空公司既貴賓室都無咩概念，諗住只係一個獨立既休息室，最多都係有d野飲飲下，所以都無 咩意圖話一定要去，但積就興致勃勃話一定要去，於是我地就搜索佢個位置，行左好耐，又上網佢個網頁睇，終於搵到！入到去要俾張信用卡佢登記，我地就是但搵 個位坐低左，就係呢個時候，我一抬高頭，竟然俾我見到。。。張家輝@@ 由於我工作關係，其實我都唔係第一次見張家輝，但喺呢個場合見到，係貴賓室wo，影帝都入黎wo，感覺自己寧舍優越架嘛(沾沾自喜) 佢就坐喺我隔離張枱，佢食左少少野就急急腳走左喇，我本身想影低佢，點知佢就起身，我淨係影到佢對腳 (左邊)
不過原來個貴賓室唔止有野飲咁簡單，係有好多野食，中西式既點心都有，但因為頭先花左好多時間去搵個貴賓室，所以快快食左少少已經要去登機閘口喇! 喺呢個時候，又再次發生一個小插曲。。。積竟然睇左個座位編號做個登機閘口 (oh my god > <)我地又要由一個錯既閘口走去一個啱既，因為頭先搵貴賓室已經行左好多冤枉路，我地喺同一段路走左3次。。。喺呢刻我同佢講，之後搵路既工作都係交番俾我算了。。。我地氣衝衝走到過去，點知班機要稍為delay，之後地勤人員話因為台中天氣唔穩定 (嚇!!) 我明明上個禮拜睇左天氣預測，話會天晴架wo!!! 呢一下真係俾佢嚇親，因為天氣真係好影響影戶外婚紗相，呢個一直以黎都係我地擔心既問題，不過當時法蝶既人多次同我地講，中部既天氣比其他地方好，好少機 會落雨，就算係落，都唔會落足一日。而經過我不斷研究佢既天氣預報，的確如此，而2月份落雨既機會更係極低，呢個都係我其中一個會選擇2月份去既主要原 因! 但又聽積講過佢同事之前去過台中影婚照，因為落雨而最終影唔成，去到呢一下又真係不得不擔心。於是我地上網睇下天氣預報，積一睇就真係話會落雨 (晴天霹靂!!) 但明明我早兩日先睇過，我自己再去睇一次，我睇台灣氣象局，明明就話天晴，我地當然選擇相信一個好既預測啦，我地就深信台灣氣象局先係正確! 等多左一陣，好快就有得上機。
香港去台灣真係好快，一個多小時就到，就連我之前download左套 "少年派的奇幻飄流" 都冇時間睇就到左喇。之後先知道，原來話天氣唔穩定既係講緊大霧、能見度低，所以先影響航班升降 (一額汗|||)。
沒有留言:
張貼留言