台中Pre-wedding之旅 - Day 3 (拍攝日 - 青青草原、小瑞士花園、老英格蘭、演武場、秋紅谷)

終於都到左今次成個旅程最重要既一日！好彩我緊張既心情並無影響我既睡眠質素，我一覺就瞓到個鬧鐘響，因為又唔駛換衫又唔駛化妝，我5:50am先起身，梳洗完等左一陣Show老師就過黎喇。呢個時候我既心情真係好緊張，因為化妝真係好緊要！佢一路整我就一路諗咁整得唔得架！？但我又唔想好似challange老師咁，我無辦法之下唯有相信佢。佢一開始係整d頭髮 先，整左一半就開始化妝。老師拎左一包化妝既用具出黎，包括有粉撲、刮刀片、唇掃，話因為衛生既問題，所以唔可以同其他人共用，所以要我買，價值台幣 300元正，我可以同積共用，個價錢都唔算極過份，加上我都冇得揀。。。所以都要幫襯佢。之前佢地一早有講佢地化妝要用安瓶定妝，一定都知道幫襯佢地買會 勁貴，所以我一早自己就喺香港帶定去！我拎出黎既時候，我特登同佢講，呢隻我自己有試過無敏感 (其實係想提防佢要我幫襯佢)，之後佢竟然再問，之前有無試過用完之後上妝，因為有d搽左再上妝會起粒粒，我打死都話試過無問題啦！咁其實我都真係有試過既，咁佢就用我帶黎嗰支喇！唔知係我d皮膚好定咩(羞)，佢都係用左半支左右，個身完全無用到。咁的而且確，我為左呢次影相，我真係花左好多錢係美容護膚上面，老師化緊妝嗰時都有問我係咪平日都有做臉，同埋問我條眉係咪自己修，其實係美容院個姐姐修，我去台中之前幾日特登去做多左次facial先去架！

我化緊妝既時候，積已經起左身，所以俾佢影到我化緊妝既情形。。。但我個樣實在太過驚嚇，唔想嚇親大家，所以。。。哈哈

整既過程Show老師不時都會望錶控制時間，不知不覺已經整左個幾鐘，整既過程Show老師都會問我意見，原來之前同佢溝通既時候我講既野佢都有記低，好似我鍾意咩類型既髮型、頭飾佢都好記得。之後我擔心左好耐既就係我d頭髮不慎剪得太短問題，之後老師拎左幾束髮片出黎，佢話係真人既頭髮，我即刻問佢係喺邊度黎@@，佢話唔駛擔心，係d人拎去賣，我嗰度用左3束，佢話已經買左3千幾蚊台幣，d顏色同髮質同我本身d頭髮真係好似，完全睇唔出係駁出黎！解決左我一路以黎既煩惱！去到差唔多8點，我個妝已經化好，換埋第一套要著既衫，我自己好滿意，我即時梗係問積既意見啦！佢都話好好，咁我就放心喇！之後我地就落去食早餐，民宿既早餐真係好一般，不過我著住條咁窄身既裙都唔想食咁多野。。。我地快快食完早餐俾埋房錢之後就番房執行李準備出發喇！房入面望出去清境既景色真係好靚！

對住我地呢一身自我感覺良好既造型，當然要把握時間影低佢先啦！

好好彩，今日個天氣好好，出發之前已經見到天朗氣清，仲好猛太陽，影清境最靚既藍天白雪等緊我地喇！GOGOGO～～～好彩我有帶備防曬，如果唔係一定變燒豬！(但因為我係著第一件衫既時候搽，之後都無再補過，所以後來件衫低胸少少，最後我淨係曬燶左個心口。。。)

我地係一套衫就影一個場景，我地第一站就係去清境上面既一個山坡度影，嗰個位係可以影到清境望落去既整個山景，真係靚到好似幅畫一樣！我地去到既時候，已經有一對喺度影緊。我地把握時間，就去左落少少影左棵樹先！上嗰棵樹需要走上一個小斜坡，我上到去嗰時氣喘得好緊要，唔知係咪因為有少少高山反應。上到去見到棵樹，雖然唔係好高，但都真係要爬上去！工作人員已經準備好凳幫我地爬上樹，首先係我上左去先！影左好幾張之後就到積都要爬上去，但因為佢要上個位比較高少少，本身工作人員都叫佢唔好勉強，唔係人人都可以上到去！之後花左一段時間，積終於都爬埋上去。之後REX仲講笑話佢地走先，留番我地喺度。因為基本上我地上左去真係完全唔敢郁，係佢叫我地擺咩pose就擺咩pose。

影完呢個場景之後就上番去個山坡度影，上到去頭先嗰對都仲未走。我地落車settle down之後佢地就走喇！我之前都有d擔心會唔係好識擺pose，但REX真係好專業，佢會教晒你點擺，我完全掌握得好好。但積就不斷做唔到REX既要求，最重點係呢輯我地係要影好開心活潑既感覺，但積平日影相都好少笑，所以笑極都笑唔到，REX不斷叫佢唔好假笑，又不斷要引佢笑。。。有d pose仲要REX親自示範。。。不過無辦法啦，平日積都係影人多，甚少俾人影。反而我就不知不覺做左業餘既model，係積私影既model。。。後來Show老師都有問我係咪平日有做開model，話我好識擺pose，我就話都係俾積影得多訓練而成。

影完呢度之後我地就轉第二個場景喇，我地第二站係青青草原！我喺門口公廁入面個廁格換左我最鍾意嗰條粉紅花花裙之後，就去左門口個洗手盤位置轉妝喇。。。

途中有好多路過廁格既人都話好靚，好可愛，有好浪漫既感覺，不禁令我飄飄然～～～～喺呢個場景我地影左好多相，亦都係我地揀得最多相既場景，因為影青青草地、綿羊同影馬都係喺呢度影！

入到青青農場，我地就去左影餵綿羊，為左要影張靚既餵綿羊相，佢地買左好多飼料俾我地餵，成隻手都係佢地既口水。積個樣差不多喺每一張相入面都係處於極度驚慌既狀態，我地最後揀得好辛苦先揀到幾張佢個樣稍為自然少少既相。。。之後我地就去左一大片青草地度影，嗰度影左好多張都好靚，有一張我地瞓喺個草地上面，但d太陽勁刺眼，我地都睜唔開眼，但為左要影張靚相，我盡全力睜開左幾下，攝影師都捕捉到！但積個樣。。。完全係張相既敗筆。。。後來佢地話可能我d
假眼睫毛擋到少少！影完之後，我地見到有得租馬騎，因為我地之前有提過我地想影騎馬，所以佢地就幫我地問要幾多錢。明明本身NTD100可以騎10分鐘，
但我地要用黎影婚紗相就要NTD500騎10分鐘。之後REX問我地價錢有無問題，我就問10分鐘影唔影得切，佢話會盡力捉緊時間！所以我地成個過程都好趕急！當我行近隻馬既時候佢都好乖咁俾我影，積行埋去嗰時隻馬就係咁郁黎郁去！佢地都笑話隻馬鍾意女仔！

我著住條裙勁大條，上馬嗰時超論盡，都唔知有知整親隻馬。。。積上埋黎嗰時，差d搞到我地差d一齊墮馬。。。當我地影完之後都發覺NTD500好抵俾，因為個師傅超落力，佢要幫我地捉住隻馬，當REX數一二三之後佢就要彈開幾步以免入鏡！師傅彈開既速度勁快，仲以自轉兩個圈既方法彈開，REX都笑讚個師傅超有梗 (其實我都唔係太確切知道有梗既意思，我估應該係有型，有風格之類) 因為都要確保我地既安全，所以REX都叫師傅唔好走太遠，佢彈開兩步又要跑番轉頭，搞到佢都喘晒氣！影完之後，佢都真係收左我地NTD500 (但我估應該唔止影左10分鐘) ！我地仲有喺草地度影綿羊，又係要搵d野食黎引佢地！呢一part我好記得d羊本身係全部pat pat對住個鏡頭，之後REX同海倫講咁影唔好，佢就幫手用個身推郁d羊，勁搞笑！但再令我覺得佢呢份工真係唔易做。。。

影完之後我地再上車去影第三個景點，就係小瑞士花園。今次我係喺個車尾度換衫！周街換衫真係人生第一次！Show老師好有技巧地用新著嗰條裙套左上我身上先，之後先除原先嗰條，所以都唔會走光。

 

今次我地入去影之前有俾到我地個DC叫Show老師幫我地影d snap shot。我地好遺憾影青青農場嗰時無叫佢幫手影，嗰度既花絮真係好難得！但因為成個過程都好趕急，所以都顧唔到咁多。。。

我地影完小瑞士花園之後，REX同我地講因為時間上用得比預期中耐，加上我地要影既演武場收五點，我地落番去台中市起碼都要1.5小時，所以建議我地快快影完老英格蘭之後去左影演武場先，再去影夜景。我地當然無問題啦，因為我地本身都想影夜景！所以影完我就先換左燈色條裙，再喺入面間7-11食午餐先。我揀左個牛肉麵，之後REX同我講好多香港既朋友黎到都好鍾意食即食溫泉蛋，問我要唔要試下，呢樣一向都係我既致愛！點知我真係一試難忘！ 積係都話香港7仔有得賣，但我真係見唔到囉。。。佢地唔止做野既速度神速，就連食野都係！積自問平日食野都算快，點知我地先食到一半，佢地已經食完，我一路食緊，Show老師就幫我一邊整頭髮！認真佩服！

我地食完野之後就出發去老英格蘭影外觀喇！我地喺路邊既時候，有個女仔走過黎向阿REX問路：「錢溫陣young尊處呀?」一聽個口音就知道係積d朋友！我勁笑話佢d口音同積好似，所以就知道佢係香港人！ 我地影完外觀之外，再有影拋花瓣。花瓣就係我地今朝手拎嗰個鮮花球，果真物盡其用！但因為d花瓣好凋零，所以最後我地一張都揀唔落。。。去到呢度，話說我 地有好多張相都係想捕捉我地唔望鏡頭，REX本身就叫我地自己望其中一點，希望我地既視線係一致！點知佢一叫我地望嗰時，就話：「太棒了！。。。你們的視 線完全不一樣！」 我地笑爆，但去到而家先發現原來我同積都無咩默契！好彩只係影相呢方面！

影完之後大概兩點半左右，我地就上番車番去台中市，同REX預計既時間差不多！呢個時候，REX就叫我地可以休息一下，因為車程都要個幾鐘，呢個時候又再次覺得REX真係鐵人！因為我著住件衫令我呼吸困難，加上化住個咁濃既妝，所以我都係瞓左一陣。。。但坐喺我隔離既Show老師成個人瞓晒落我度，搞到我都唔敢亂郁，免得整醒佢。坐左一個半鐘頭車左右，終於都到左演武場。一望入去見到好多人，應該今日有活動。。。REX同我地講，佢地事先都打過黎問，唔需要預約，但就要俾入場費，之前門市d人都講過話係今年開始先要俾。我又再次喺車後面換衫！Show老師通常幫我換髮型既時候都會問我意見，演武場呢個造型我本身都諗住要復古少少既味道，我同Show老師講我想要一個復古得黎又唔要覺得老再想要d可愛既感覺。我講到咁Show老師都明白我想要d咩，幫我整左個辮子既日式髮型，真係好勁！

呢個場景同今日晏晝影好開心活潑既感覺好唔同，要酷酷既感覺，呢下真係有少少考起我，我同積相反，唔笑既相我真係唔識影！反而積感覺非常良好！呢一輯REX教我地擺左好多好型既pose，本身我以為我會影得好唔自然，點知又出奇地好！唔知係我領悟力高定REX指導得好！應該兩樣都有啦！ 不過可惜既係今日演武場入面有活動，好多地方入面都有人，所以我地只可以喺外圍無咩人既地方影。影完之後就差唔多日落，因為我地之後係影夜景，而影夜景既 地方係喺法蝶既附近 (本身我地以為就喺隔離影)，所以我地就番左法蝶先，換完衫再出去影。番到去我地去左3樓個化妝間換衫，呢個影夜景既造型就梳晒d頭髮上去，都比我想像中 好睇！

換完衫抖左一陣又再次出發喇！我地一直都以為只係喺法蝶附近影，點知上左車之後都坐左好一陣子先到，果然認真！途中既時候REX不時同我地介紹路過既景點，又同我地講笑，佢地真係精力充沛！我地差唔多到既時候我就認得出呢度叫秋紅谷，之前上d blog plan行程嗰時見過，話呢度既夜景好靚，我地本身都有plan搵一日夜晚過黎睇下，點知就咁既情況就黎左喇！又有得影夜景，又去到秋紅谷，真係雙重收穫呀！我著呢套衫啱啱襯到我帶黎既紫色高跟鞋，但對鞋好高好唔舒服，Show老師同海倫好體貼地幫我拎左我對拖鞋出黎俾我換，等我埋位先著番對高跟鞋！真係超窩心！

影呢輯相都係要酷酷既感覺，所以又係唔可以笑。加上因為影夜景既關係，好似話個曝光時間要耐d，我地一個pose要hold好耐，閃光燈閃完之後要等多好多 秒，等到聽到個相機"刷"一聲先郁得。本身夜晚又凍左好多，我對高跟鞋又整到對腳好痛，再加上影左成日真係有d攰，所以去到後期真係難免有少少意興闌珊。。。但我地都影左好耐，REX教我擺左好多我從來都唔會擺既pose，有d好性感既pose佢仲扮埋出黎，真係超正！終於都完成一日既拍攝行程！臨行之前REX仲show佢相機俾我地睇啱啱影嗰幾張，我估佢應該都好滿意！之後我地就番番去法蝶喇。。。

番到去就地換番便服，先要俾埋個尾數同其他既雜費，找完數之後就番酒店喇！當時我地都feel到好攰，但走既時候仲見到海倫喺度serve緊第二枱客，真係唔寫個服字都唔得！之後就有個短髮既型女仔車我地番酒店 (後來喺佢地d facebook睇番先知佢係攝影助理，接送都要做埋，法蝶既員工真係multi-function！)， 之前車我地既Peter應該去左車其他客人。但因為之前我地托peter幫我地call左架車聽日去玩，之前佢講過話要講低個房號俾佢聽，於是我就叫左個 女仔要等我地一陣，我地想托佢幫我地講個房號俾Peter聽。之後我地check in既時候，reception個姐姐同我地講頭先有個司機黎搵我地，唔知係peter定係聽日個司機喇！總之就confirm架車係無問題啦！我地就托 酒店既人聽朝如果個司機到左就call我地，之後我地就番上房喇！雖然我地攰到爆，但我地都堅持要照原定計劃去一中街夜市！ 但因為我仲未落妝，所以我索性沖埋涼洗埋頭先出去。我成個頭都係嗰d噴髮膠，老師叫我先用護髮素再洗頭，我足足洗左3次先洗乾淨個頭！搞掂之後已經係晚上十點。。。我地再坐的士去一中街夜市。今次真係無精力再影相，我地去到掃左一轉街，食左炸雞排、葱抓餅、大腸包小腸同埋臭豆腐，台灣既臭豆腐同香港唔同， 細件d同埋會夾酸菜蒜豆喺入面（驚死唔夠臭）！食完之後我地好快繞左一圈就走左喇，因為真攰到爆炸。。。番到酒店仲睇左陣電視先瞓！體力真係超透支。。。