台中Pre-wedding之旅 - Day 4 (埔里、九族文化村、日月潭)

今日包車出去，之前我地都知道前一日影完相會好攰，所以本身唔想咁早出發，但幫我地租車既 Peter講左我句口頭蟬「早起的鳥兒有蟲吃」，加上佢話而家冬天好早日落，天黑去好多地方都唔好睇，我又覺得有道理，於是我地約左8:30am出發！我 地8點鐘左右落去酒店餐廳食早餐，食完就即刻出發展開我地一日跑online既行程。我地向來地旅行都好貪心，好多地方都想去，所以我地一日既行程去左人 地兩日先去得晒既行程！我地想去既地方有埔里既紙教堂、日月潭、九族文化村、車埕、集集車站！之前我地都有Peter講過，所以司機大概都知我地想去邊。 我地個司機叫賴生，感覺上佢係一個好老實既男人。

上左車之後我地就再同賴生講我地想去呢幾個地方，叫佢幫我地規劃一下行程。佢同peter都話好少人一日會跑咁多行程。。。 但加緊腳步都可以的！佢建議我地先去埔里既紙教堂再去九族文化村會比較順路一d，我地就按佢既建議先去紙教堂！我地又行番尋日行過既路線出發，因為同清境 一樣都係位於南投縣。我地其實都好唔夠瞓，但上到車都唔係好瞓得著。唔知我先入為主定咩，我地都覺得賴生開車無尋日REX開得咁快，但其實佢既技術都係唔 錯既！我地一邊坐車佢一邊同我地講一陣我地喺九族文化村點樣集合，因為佢話車可以開入d接我地，但嗰個位唔可以停車。因為我地無買到當地既電話咭，所以佢 叫我地打一下佢個電話，佢唔會接，佢見到電話響就會駛入去。於是我地就試用個電話打俾佢，但因為我地唔知個電話要加咩字頭先打到，佢一路揸車一路就禁個電 話，但又唔能夠有效地multi tasking，整整下佢成部電話俾左我地自己禁(估唔到既係佢用緊Samsung S3囉)但我地都係打唔到，最後佢竟然將架車停埋一邊整。。。最後唔知加左一串既數字喺前面先打到。。。之後我地就繼續出發去埔里，坐左差不多一個多鐘頭先到！因為前晚Rex揸車上清境都係一個半鐘。。。所以好難唔令我地覺得佢揸得慢。。。

其實我地真係好攰，尋日影相既時候可能我地唔覺意做左d高難度既拉筋動作，我同積不約而同地左腳大脾條筋勁痛！再加上呢日真係熱到爆炸，我著左一件都唔算薄既長袖衫真係就黎著火！所以我地去到紙教堂嗰時真係無咩心機。。。

呢張喺我地呢日影既第一張相，個樣真係勁不情願。。。

之後我地喺不同既位置用腳架影左d相。。。

我其實本身都對紙教堂呢個地方無咩興趣，只係積話想去，我見反正都包左車，所以都唔爭在去埋。我承認我喺呢個地方表現得好唔雀躍。。。但講真呢個地方真係一般。。。所以我抱住到此一遊既 心態影左幾張相就走人。走既時候我地入左去佢既手信店買左兩盒梅粉，因為佢個入場券可以當現金用，所以就唔好晒買d野先走喇！之後我地出番去搵我地架車， 但話說頭先入場既時候賴生兜左架車入去入面，聲稱會近d，點知嗰個跟本就唔係入口。。。。我地結果自行行番去入口，其實就係佢停車等候既不遠處。。。所以 我地走既時候無打電話俾佢叫佢兜番去頭先落車既地方，我地就自己行番去佢停車既地方（因為真係近好多。。。）我地行到過去佢仲問我地做咩叫佢兜過去接我地。。。呀呀呀(烏鴉叫)

上 番車之後，我地就出發去九族文化村。我地坐車入去，買票就直接打開車窗買。我地買嗰張應該係全票，其實買嗰時都無人問過我地想買咩票。因為話説之前我地同 Peter提起過我地想去九族文化村加日月潭，佢提議我地去九族玩完再坐纜車去日月潭，之後再搭纜車番轉頭，車可以喺九族等！我之前上網搵到資料都係咁 講，所以我都覺得呢個方法行得通！但今朝賴生就同我地講唔好坐纜車，因為要另外再俾錢唔抵坐！我地就諗如果要再俾錢就梗係唔抵啦！於是我地都打算去完九族 文化村就上番車去日月潭。。。但當我地入左場之後我再拎張飛出黎睇，發現張飛本身根本就包左坐纜車！如果包左就梗係坐啦！昂坪360既飛都唔平架ma！但又要諗點樣通知司機，我地於是決定玩完先算！我地入左去佢個水連沙公園影相！我地又再次極速影相！

圍住個公園影左一圈之後我地就進入佢園内範圍。 之前我地都睇過法蝶喺九族影櫻花既作品，見過條樹蔭路有好茂盛既櫻花，於是我地就去搜尋嗰個地方！終於俾我地搵到，因為其實你只要行入少少就會發現佢成個 公園都係嗰隻樹蔭路，但我地見到既係一地既櫻花，法蝶既人真係講得啱！櫻花真的掉光了！

PS自製櫻花樹下感覺……

影完之後我地就收埋個腳架準備入去玩下喇！我地玩左幾個呃錢既攤位遊戲！

之後我地再行入d睇下有咩玩，因為時間關係，所以我地打算只揀一個機動玩戲玩（另一個原因係我地年紀大左，好多野都唔夠膽玩）之後我地見到有個加強版既海洋公園滑浪飛船，見到d人成身濕晒，我地梗係唔制啦！我絕對唔想成身痴立立咁去日月潭囉！行過少少見到有個類似跳樓機既物體，呢樣野細個玩都幾乎唔掂，而家就梗係no way！

我地再行過少少見到有一個擬似過山車既物體，見佢唔多人排隊，於是就排隊玩呢個喇！點知排排下，發現原來都係會濕身的……但係都排到就唯有照玩！

呢個輕微加強版既滑浪飛船比起海洋公園既認真少少，沖落去嗰下又係例牌會影一張相呃你錢！積向來最鍾意買呢d……但明明張相真係影得好樣衰……玩完之後我地就問入面d職員確定我地張飛係咪包左纜車，確定之後我地就打算send短訊通知司機我地兩三個鐘後會玩完日月潭折返！（因為我地之前夾好我地打俾佢係唔會聽的，所以唯有send sms俾佢）點知我地send完之後佢就即刻打番黎……咁唯有要照聽……積話費事晒電話分鐘，所以叫我聽，因為顯然我既國語係比佢好 ！之後司機話我地坐左纜車過去日月潭之後係要再駁車先去到日月潭要遊覽既地方，我地自己係去唔到！佢話佢而家開車去纜車嗰邊接我地！我地其 實都唔肯定個實際狀況，咁既然佢咁講我地就相信佢啦，反正都包左車！咁我地就照坐纜車喇！

 

搭纜車去日月潭要中途轉一次纜車，過程都唔駛等好耐！佢一架纜車坐到好多個人，所以我地兩程都要同其他人share坐！坐第二程差唔多埋站既時候，我遠處就 望到擬似我地架包車，因為黃色車都好易認！我估計司機已經喺出口等我地，不出所料，我地出左站真係見到佢！我地本身諗住喺個站隔離食午餐，但賴生話呢度都 係食d便餐，無咩好食，話車我地去日月潭附近食。咁我地就上左車，上左車之後佢不斷講日月潭有幾遠，我地落左纜車要自己坐車去係無可能……雖然望過去真係 好遠，亦如佢所講，嗰度係無的士可以截，但我總唔相信自己搭車係去唔到！因為我地本身的確係諗住坐公車去……上網搵過資料係可行的！於是我再追問落去，原 來係可以坐船過去架！！坐船遊日月潭應該別有一番風味！不過既然包左車就唔晒錢啦！之後我地閒談得知，呢日 (2月28日) 原來係台灣既公眾假期，所以周圍都好多人！我仲同積講，如果我喺台灣，我每年生日都會係放假～～
 
之後賴生就車左我地去一間食小炒既地方，個老闆本身介紹我地食總統魚，話係日月潭最出名，但都唔平，我地最終食左個三餸一湯既套餐。係d農村小炒，我地食左個叫龍鬚菜，之前都未食過。d小炒都幾有鑊氣，不過個湯就真係唔掂......超油！結果我地無飲到......

食完之後我地就去日月潭喇！入去既時候好多旅遊車，仲有好多國內遊客.......都塞左一陣車先入到去！我地之前一直都先入為主覺得日月潭無咩野好睇，但事實上都真係！好彩我地堅拒去日月潭影婚紗相！（英明）

 

佢本身仲有個叫涵碧樓既地方，但我地行左幾轉都搵唔到條路，我地再一致認為應該都係冇咩特別，所以行過去都費事！但另外想講既係真係超多國內同胞，我地遠處 見到有一班旅行團喺度影相，令我不禁諗起「老表，你好野！」團友影相嗰幕！之後我就喺隔離講「茄子」，點知，佢地真係即刻一齊講「茄子」，真係笑爆我！  因為積無睇，佢仲不思費解問我點解會知！哈哈！睇電視劇真係識好多野架！

好快我地就行完一圈上車喇！結論係日月潭真係無咩野好睇，我真心覺得赤柱仲好過佢囉。。。可能賴生都無諗過我地會咁快行完，所以我地行番去架車嗰時佢都行開左，我地等左10分鐘左右，於是打俾佢，響左一下手機就收線，佢即刻極速奔跑番黎，搞到我地都唔係幾好意思。上番車之後我地就出發去車埕老街，但途經一個地方，賴生話係一個新既旅遊中心，都有d人會去影婚紗相，反正順路，佢又誠意拳拳，我地盛情難卻，所以都象徵式入去打左個圈，影左張相。

(待續...)