2月28日出發嗰一日正正係我嘅正日生日，為免去到當地難搵生日蛋糕 (上年喺台中已經試過一次)，加上係下午2點55分機，有足夠嘅時間，所以決定喺屋企切咗生日蛋糕先出去！
第一次兩個人喺呢個新居切蛋糕^^
之後就出發去坐機場巴士喇，第一次喺九龍灣一齊出發去機場，預先上網搵定要坐E22，坐咗個零鐘頭終於都到機場！咁平嘅機票當然要辛苦少少，Hong Kong express個網頁一早寫咗要去terminal 2 check in，但原來上機又要去番terminal 1，慳到盡嘅我地，去程係無買到寄倉行李，拎住件行李行黎行去之後，時間剛剛好可以上機！人人都話Hong Kong airline/ Hong Kong express成日delay，但今次已經坐咗第三次，touch wood又真係冇delay過！
咁平嘅budget airline無飛機餐之餘，當然係無任何嘅娛樂設施啦！所以我一早已經喺電話download定好多集近期熱爆嘅韓劇「來自星星的你」煲足全程機，瞓咗一個鐘，睇足兩個幾鐘！喺機上積仲叫咗一個六十幾蚊得幾啖嘅咕嚕肉飯．．．加多支水．．．因為要食藥．．．上機前，積已經開始唔舒服，旅行先黎病嘅不幸事件完完全全地發生喺佢身上，仲要病足咁多日，唉！
落到機，我地先去換錢，積向來都覺得有錢傍身先有安全感，佢一黎就換咗4000蚊港紙，其實檳城消費咁平，去4日3夜真係用唔到咁多囉。之後就出去搵巴士坐，一出到去就見到架401E，RM2.7一程真係平到爆，咁平以為坐一陣就到啦，無位坐都照上，點知，"坐" (因為其實係企)咗個幾鐘先到！如果係以個時間黎計，RM2.7搭到個幾鐘真係抵 -_-！仲要因為d路又唔平，又拎住件行李，d乘客又左攝右攝，呢個幾鐘真係辛苦到爆！
終於到咗Komtar，算係市中心點，而我地嘅酒店亦都係步行範圍內！落咗車行咗一陣就搵到間酒店喇，呢間酒店好平，但真係一d都唔差，除咗隔音差咗少少之外(隔離房有人咳都聽到．．．)，其他野都無咩問題！check in嗰時，個櫃台姐姐仲有留意到我今日生日，同我講生日快樂添！
放低行李之後，就出發去新關仔角夜市食晚飯喇！之前上網搵過，酒店轉出去大街就有101巴士可以去到新關仔角，的確係好快搵到個站，亦都有人等緊車，點知等咗成廿幾分鐘都無車。
因為頭先坐機場巴士比預定時間耐，見已經差唔多9點，所以決定截的士！當地坐的士唔係跳錶嘅，而係上車講個目的地，個司機開價。同咗司機講目的地之後，佢話RM15，都唔算太過份，之後就上咗車喇！坐的士只係十幾分鐘嘅車程就到！初初黎到檳城，都仲好疑惑當地人究竟係講普通話定講英文，但落車嘅時候，個司機竟然係用廣東話同我地講：「前面行過去就係喇！」-_-||| 其實去完4日3夜，都仲係摸唔清一開始應該同人講咩語言先好．．
本身減緊肥好耐無食晚飯嘅我，諗住樣樣野食少少淺嘗啦！我地叫咗沙嗲串、炒棵條、煎蠔餅、"司"蚶、福建蝦麵、仲有紅豆霜同椰青！唔好以為好多野，因為佢碟碟都好細，所以真係唔多！本以為積唔夠"攝牙喇"嘅份量，佢竟然話夠飽！＠＠我本身諗住食少嘅係我！搞到我勁有罪惡感！原來佢係唔舒服無胃口．．．但真係又平又好味！如果唔係我減肥，積又冇胃口，一定可以繼續食食食！！！
本身schedule 咗會行隔離嘅Gurney Place，點知因為晏咗到，食完野已經 10點幾，大部份商店都關晒門，之後入咗去Watsons買咗d日用品，同最最最緊要嘅防曬lotion就坐番的士走lu～～之前喺香港想買一支SPF50以上嘅防曬，睇晒成間萬寧、屈臣氏都係睇一兩款，呢度，幾乎每一支都係over SPF50，可想而知，呢度嘅紫外線指數係幾高！睇緊幾日，都要同凶猛嘅太陽搏鬥喇！(對於我呢d曬唔黑，一曬只會出雀斑嘅人黎講，永遠都唔會可以同陽光玩遊戲！)
新關仔角對開嘅海塝。夜晚食飽喺度散下步都唔錯。
番到酒店，積病得仲嚴重咗，仲有少少發燒添．．．好彩 (都唔知算唔算係好彩) 佢上機前已經有d唔舒服，所以有拎到之前睇醫生嘅藥黎，如果唔係真係要去醫院先幫到佢喇！-_-
沒有留言:
張貼留言