食完之後就出發去極樂寺喇！話說尋日落巴士嘅時候，見到一班香港旅客同一班唔知係咪印度嘅旅客都不約而同，好有目標地入去一個印度嘅食肆！今日又再次見到另一班香港旅客都係好有目的咁入去，我地有理由懷疑呢間會係旅遊書有介紹嘅食肆！(由於我地今次只係去檳城一個地方，一般馬來西亞嘅旅遊書只係得一個十幾頁嘅chapter講檳城，所以我地今次係無買到旅遊書嘅) 我地喺門口擾攘咗一陣，終於決定入去試下！我地坐喺剛剛入黎嗰一家四口嘅斜對面，見佢地拎出本旅遊書指手劃腳咁叫野食！證明我地嘅猜測係無錯！無奈，我地睇唔到佢地點咩食！之後印度籍嘅老闆問我地食咩，我地問佢拎餐牌，佢指俾我地睇，就係牆上面嗰d睇咗都唔知係咩嘅食物名！
之後佢帶咗我地行出去，佢用夾住印度話同英文嘅口音同我地講，基本上都唔知佢講咩，我講英文佢又好似聽唔明！是但佢指咩都話要one就叫完喇！
之後拎黎嘅係一塊有蛋漿嘅印度薄餅配一碗咖哩汁，另外仲有一塊比較油d嘅印度薄餅配一碟煉奶．．．咁塊餅熱燙燙咁整出黎，又唔會難食得去邊嘅，只不過真係好普通囉！最好味應該係佢杯拉茶，真係好香好滑！就係咁，到到食完嗰一刻，我地都唔知呢間野係咪出名，如果係，係出名在邊part？
之後我地就行去隔離個巴士站等車去極樂寺喇！203, 204都可以去到，等咗一陣就有車喇！只係需要RM$2，檳城搭巴士真係好平，但等唔等到車真係睇你好唔好彩！
我地上車到咗個司機提我地落車，一落車就feel到30幾度嘅高溫！過咗條馬路就見到嗰間勁出名嘅Laksa！睇個旅遊節目，直情話係全球十大美食之一，咁誇張！真係要試下先知！剛剛先食完早餐，一於去完極樂寺落黎再食啦！
越行就越feel到猛烈無情嘅太陽，我忍唔住買咗把防UV遮！
大汗淋漓咁行上去極樂寺，首先見到呢個龜池，本人對龜向來都冇咩好感，所以影一張相就轉身走喇！
之後再行上去，主要都係影幾張相，因為我本身都唔拜神的 (我黎呢度可以話係主要食Laksa而順便去極樂寺, 哈哈哈)
呢個係雕像，但像真度極高，第一眼真係嚇親！有冇人真係會買番屋企擺？
佢有個纜車話可以上去睇個像，我地見又冇咩人坐，雖然只係RM2，但都放棄咗 (因為當時諗住一陣都會去升旗山)，之後就行番落去食Laksa喇！
叫咗一人一碗，呢款laksa同平日喺香港食嘅新加坡laksa完全唔同！呢個味道真係好特別，酸酸辣辣得黎又好清新！真係無讚錯！熱辣辣食完之後，問人升旗山點去，就行咗去前少少嘅巴士站等204號車去，等咗一陣上咗車，轉幾個彎就到喇！落車之後就排隊買飛啦，排隊嘅人數都唔少！
因為我之前上網睇過個blog，有人講過話去呢個Penang Hill係一個nightmare，人又多，上到去等勁耐車都落唔番山，人又多又迫又臭，迫咗兩個鐘先落得番黎，所以我本身對呢個地方都有少少保留．．．但又見去得極樂寺，近近地又無理由唔去埋姐．．．但當我地排隊排到就到嘅時候，我望到個price list發現有d唔妥，佢有兩個價錢，一個係寫住係RM8，另一個寫住RM30，之前見過skyyer個apps話係RM4，諗住通漲定唔知咩，去到RM8都唔太過份嘅，之後望望下，見到當地人個個買都會show個證件出黎，我就諗唔通RM8係for malaysian，RM30係for non-malaysian@@?! 因為RM30個價錢係有寫住standard，而RM8係寫馬拉文，唔知佢寫咩！諗得黎都排到喇！真係話要RM60 for two，痴線咩，相差咁遠？！梗係唔上啦，咪又係迫雨個纜車上個山影幾張相！於是，我地影咗張到時一遊嘅相就走喇！
之後就到惡夢嘅開始！我地行番出去頭先落車嘅巴士站等204啦，點知一等就等咗45分鐘．．．都．．．無．．．車！！！熱到個人都癲！咁諗住等咁耐，唔忿氣，要等到有為止啦！
影下相打發下時間啦！
繼續再等啦．．．．
點知等到差唔多一個鐘都無！死死地氣．．．去．．．坐．．．的．．．士．．．！呢度等巴士真係鬥耐力，d的士泊晒喺前面，d司機落晒車，就係等我地呢d等到唔等得嘅人去坐的士！盛惠RM30，其實話貴又唔算貴，但因為巴士真係好平！咁睇就會覺得好貴囉！等一粒鐘都無，真係輸俾你喇．．．！自呢個慘痛嘅經歷之後，嚇怕咗積，佢話之後都唔再搭巴士喎！
我地坐的士直接去姓氏橋，佢完全好似大澳一樣，只係比大澳細！首先去到姓周橋．．．
我向來都唔食榴槤，但黎到馬來西亞呢d地方，我當然都好鼓勵食榴槤嘅積食啦！姓周橋入面有一檔賣榴槤泡芙，積話好好食！
我唔食榴槤，就食杯雪糕啦！未影到相已經開始溶喇！因為真係熱到人都就快溶！
天氣好熱，出黎嗰時我地買咗支豆寇水，當地人話係一種植物，但就咁食會好澀，豆寇水要用冰糖煮佢幾個鐘先飲得，個味道其實係似溝咗水嘅可樂，但都幾解渴嘅！
之後行埋去姓陳橋，呢度個景色都幾靚！
途中有經過小印度，但都係到此一遊嘅地方而已！
去到town hall，因為「單戀雙城」入面有一幕都去過呢個地方，我印象中係好大片草地，去到並唔係見到呢個景象，而係好似嘉年華會咁！原來，佢真係搞緊一個日本文化節！一場黎到，即管都影咗張相，但原先黎到呢度諗住可以慢慢影，影好多張靚相架嘛！而家就變為行下d攤位啦！
因為實在太熱，我地買咗杯刨冰一路行一路食，其他熱食真係見到都唔開胃．．．
之後再行過去隔離個Fort Cornwallis，都係喺外圍影咗張相就算lu～
再行前d，見到埋個地標鐵檳榔同埋clock tower，全部都到此一遊之後，就準備去食野lu！
本身諗住先去食伍秀澤海南雞飯，積講過唔再坐巴士，行過去又有d遠，於是都係坐的士啦！本身去Chulia嗰邊佢話RM12，點知上到車再check下，話原來係開到3點，於是改去汕頭路夜市，轉多條街又收到我地RM3，盛惠RM15！
汕頭路夜市最出名有4樣野食，就係鴨棵汁、鹵水、四果湯同杏仁茶，我黎之前最想食嘅就係權記嘅鴨棵汁，點知由街頭行到街尾都唔見，本身以為佢未開檔啦！行黎行去等多陣都唔見，唯有食鹵水算啦．．．
之後坐低咗，就望到對面．．．．但係無開門．．．
又會咁啱，成個trip嘅時間都撞正佢休息．．．唉！緣份未到！
個鹵水都唔錯，咁熱天氣，個四果湯實正啦！
之後去咗Komtar附近行街，行咗1st Avenue同Prangin Mall，睇咗一陣衫，發現價錢同香港都差唔多，之後就去Aeon supermarket，入去之前，喺門口見到有幾張按摩椅，攰到爆嘅積即刻衝上去！第一次佢先按咗3分鐘，RM1 per 3 mins其實都抵！之後我地去買完野之後，出番黎，再encore！ 今次我地兩個一齊按咗15分鐘！都幾舒服，但張椅向住出面，個個行過都望住，都幾尷尬．．．
按完之後，本身諗住番酒店放低d野再出去食飯！之後行過一間食肆，好似都唔錯，就索性食完再番去！
之後積又再次不適！有人唔舒服仲要發脾氣！！食完好不快咁就行番酒店喇．．．之後積又發燒．．．迫住一早就瞓咗lu～～～
沒有留言:
張貼留言