之前試妝嘅時候，佢地已經叫我地可以快d試衫，以免d衫會無期，雖然我覺得咁快租到時佢又會出新款，但我地喺9月嘅時候，都約咗上去1st fitting先。話說，上一次試妝嘅時候因為佢地搞錯booking而鬧到有少少不快！所以今次試衫，為免重蹈覆轍，特別問清楚個時間，點知，慘遭到惡言相向。。。
內容大致上係我打去book嘅時候問多咗幾次個日期同時間，話俾佢知我想佢double confirm張單費事搞錯 (因為上次佢地聲稱係我個名同另一個新娘個名都係J字頭所以搞錯，雖然我唔明點解咁低級嘅錯誤都會犯，但我都係想令件事唔好再搞錯)，當時佢應該係有客試緊衫所以好忙，又覺得我問長問短阻住佢，所以態度奇差！咁我話你忙緊，不如你轉頭check咗再打番俾我 (我都係俾錢黎租衫，受到此等惡言相向，我自問我嘅態度都唔算係惡劣)！誰知，我再問對方有冇我電話號碼？佢真係講咗一個錯嘅電話號碼出黎！！！我即時真係著著地！我話真係又搞錯？！我再問佢叫咩名！(打電話去BOOK時間，問番個staff叫咩名係常識啦，有咩事搞錯都容易follow，都唔好話追究，但起碼有個人對口先)
點知對方態度更催惡劣！佢同我講：「我都係打份工姐，做咩要咁刁難我？！(下刪100字！)」 我自問我頭先嘅態度已經唔算差，今次真係咩人都有火！我再重提上次搞錯試妝時間嘅事，而當時我都已經知道呢個staff正正係上次handle我約錯時間試妝嘅阿P！我初初講番上次件事 (都只係事隔3個月，呢件事我仍然歷歷在目) 佢竟然話唔記得發生咩事！！！呢刻我仲驚！唔通佢地日日都會發生d咁嘅事？！我再詳細講多次我上次慘痛嘅經歷，佢話佢記得，話真係只係發生過一次！我真係信先奇，如果係嘅話點會咁快唔記得！講晒我成個背景之後，我再鬧爆咗佢幾分鐘，佢突然間變晒臉道歉，仲話會對我好好！(對我好好？講d咁嘅說話就知呢條友幾唔正常) 我真係咩火都黎晒，本身諗住同積講番件事，再睇下下一步嘅行動！上去鬧爆佢拎番按金？定搵佢老闆出黎投訴？點知我都未黎得切同積講晒成件事，佢又打黎番黎不斷道歉，道歉咗廿幾分鐘。。。。我只可以話，呢個人應該係有人。。格。。分。。裂。。。
最後，我決定算數！原因唔止係因為我心軟 (雖然事實上係，我認清我原來真係一個好人)。。。另外亦都係因為我地之前喺婚展搵咗好多間先揀啱，距離big day仲有半年左右，真係唔想再重新黎過！ 最後，我如期9月去到試衫。。。
可能我真係同呢個阿P八字唔夾，佢自上次道晒歉之後，服務突然變得好好 (其實只係最基本)，早幾日已經打黎提我幾點上去，要帶D咩，有冇咩款揀啱之類。點知，到到試衫嗰日，竟然打風，仲要係超強颱風天兔來襲嘅一日。。。雖然約嘅時間都仲未打8號風球，但已經講到明會打黎成，佢本身叫我改期，但改黎改去都唔知等到幾時，同埋我已經約埋我媽咪上去，所以我決定照去，諗住試得幾多得幾多！
都算好彩，我地試完晒先掛8號風球！呢D就係我第一次試衫定嘅款。我第一次唔同款式都有試，本身都想揀d A-line嘅款，但試上身都真係唔好睇，同埋都係好多粉色系，所以都要下次再睇下轉咩款喇。。。
p.s. 當我試完衫後兩個禮拜，收到Je T'aime公司send黎嘅SMS
我估計佢係遇到一個無我咁好人嘅顧客，講到尾，真係佢自己攞黎，希望Je T'aime之後嘅服務會可以正常番啦！
沒有留言:
張貼留言