雖然我地今日無咩特別行程，但住喺一間包咗早餐嘅酒店，總唔能夠訓到自然醒而miss咗個早餐嘅，同埋尋日都提過，Westin嘅早餐係真係唔錯的！因此我地特登較咗個鬧鐘，唔理個樣幾咁薘頭垢面咁落去食早餐！其實講緊都已經係早上9點^^"，但喺一個咁舒服嘅環境，要我地訓到自然醒，起碼都去到11點後啦！食完一個豐富嘅早餐，我地喺房再休息一陣就要執行李喇，我地將行李store喺Westin hotel，因為我地要去嘅Micronesia Mall比較近Westin一d。放低行李之後我地就用我地尋日買咗嘅2 day pass坐Lam Lam Bus出發喇！車站就喺Pacific Place，即係Westin對面。
關島嘅陽光真係非常猛烈，望上天空雖然都見到有雲，但就從來唔會有一刻擋到個太陽！婚後我決定放肆一下，同陽光玩下遊戲！畢竟黎到咁sunshine嘅地方渡假，時時刻刻都掛住開遮都真係有夠掃興嘅 ^^"
積本身叫我埋去坐，好坐無坐到落去！唔知呢隻昆蟲係咪曬死咗@@
等咗十零分鐘，終於都有車喇！呢架車要兜番入去Nikko Hotel先再兜番出黎Westin門口先上斜(即係頭先個站嘅對面馬路-_-)，但Westin門口又無站喎，雖然奇怪，但俾個機會我遊下車河入去Nikko睇下都幾好！
Micronesia Mall都係嗰個激唔起人購物意欲嘅感覺.....行到入Macy's, 見到有Michael Kors嘅專櫃，因為本身想黎關島睇呢個brand，但DFS對面嗰間啱啱裝修緊未開。行到埋去睇，新款又唔見佢特別平，特價款又唔靚.....本身都好失望咁離開。行咗去對面童裝部，其實d款都麻麻地，不過天生愛購物嘅我地，總唔能夠咩都買唔到，所以點都揀咗幾件 ！點知就喺俾錢嘅時候有驚喜！埋單嘅時候，個staff教我地用電話上網搵個online coupon，show俾佢地睇就有discount，個個dept. 嘅discount都唔同，好似童裝咁，就有75折！而再睇番手袋同手錶部，都係有75折！咁即係話我頭先睇嘅product全部都係75折？！？！我地即刻折返去再選購！今次我即刻買咗個手袋，而積就買咗兩隻Tommy手錶送俾屋企人。哈哈，我地呢D係買唔到野唔安樂嘅人黎架！
番番去Westin拎番件行李，我地就出去搭Lam Lam Bus去PIC喇！講真，拎住行李搭Lam Lam Bus嘅人真係少，因為喺關島應該比較少慳錢型嘅travaller.....我覺得呢d叫應洗則洗，我行出去都係幾步路就坐到車，何況我仲買咗day pass！所以我一於少理！巴士司機好好人，仲幫我地手搬行李上車，仲叫我地慢慢黎^^
因為我地買咗PIC嘅金咭，所以一直都係諗住去到再睇下係咪呢一日嘅lunch已經開始計，因此，我地係未食野嘅。而我因為個早餐食得太飽，所以我一直都未有餓意，而呢個時候，積已經餓到唔耐煩喇！
我地check in後已經係下午4點，而PIC嘅餐廳嘅lunch已經完咗，但因為我地諗住今晚係會去睇 dinner show，而因為佢6點鐘就開始，所以諗住簡單食少少野就算喇。我地去咗對面嘅ABC Store買咗d簡單野食上去酒店個露台食！呢個view咁正，食咩都好味啦！
食飽飽之後，我地就落咗去下面影相，PIC個教堂係眾多人黎到關島結婚會選擇嘅教堂之一。教堂範圍要你book咗先會開放，其餘時間都係鎖上，所以只可以影到側面嘅外觀。
呢個位一行埋去就餵飽晒d蚊！之後我地仲行埋出沙灘，啱啱好係日落嘅時間，呢個sunset view真係無敵！
影完之後，我地就行去dinner show個位置。因為佢話我地太遲做唔到reservation，所以我地唯有黎到walk in。好彩佢嘅坐位有好多，我地好快就安排到座位喇！
佢嘅食物係自助形式，偏向似大食會嘅類型，夠頂肚就算喇！相信呢個show都係以睇show為主啦！一路食一路等，7點半就開show喇！
呢個show結合咗好多款嘅查莫洛民族舞，個show講規模其實又唔算大，內容又唔算好精彩，不過都勝在有特式。不過如果唔係住喺度特登走入黎睇就唔會law。
沒有留言:
張貼留言