Janis & Jack～～＊幸福點滴～～: 馬來西亞檳城4日3夜之旅 - Day 3 (娘惹菜Nyonya Breeze、batu ferringhi夜市)

今日要轉酒店，所以起身就執埋d行李，快手食埋酒店個早餐就check out喇。放低d luggage我地就出發去多春茶室，點知行到去，發現無開，唔知係無開定關咗．．．因為之前網上話佢淨係開早餐時間，我地去到嗰時已經11點，可能真係關咗都唔定！

之後行番出去買手信，買咗d醬料、白咖哩麵等等，仲有豆沙餅，話係檳城特產，但可能唔啱口味，真係唔係咁好食．．．

買完之後，本身諗住去愉園茶室，但一陣會去食娘惹菜，驚會食唔落，所以食咗碗煎蕊就算喇！呢間旅遊書有介紹，所以好多人排隊，都幾好食！

食完之後再去supermarket encore買多次手信，就番酒店放低d野再去檳城出名娘惹菜Nyonya Breeze食飯喇！距離酒店行幾條街，就到喇，遠就唔算遠，但天氣咁熱，真係行到出晒煙！我地叫咗出名嘅胭脂雞、娘惹甜酸魚同四念豆加拉武，前兩樣都係比一般好少少，四念豆佢係涼拌菜，但個四念豆係生食嘅，又係．．．唔係好啱口味啦．．．真係一般，不過價錢都唔貴。

之後就行去隔一條街嘅義香買手信，佢最出名嘅係麻油，連蘇施黃都勁讚，梗係要買啦！仲有就係我本人覺得唔係好好食嘅豆沙餅。佢有d款係可以買一件，我地全部買一件試食咗先再買，但全部都真係一般，真係唔啱口味！不過價錢都唔貴，買黎做手信都ok嘅！

之後就行番酒店拎番件行李，諗住坐的士走，原來酒店係有車，RM40去到batu ferringhi嘅Bayview Beach Hotel，咁就直接上車啦！

但架車個冷氣神神地，中途已經要開窗，熱到．．．．坐咗半個鐘多d就到喇！

check in之後，放低行李就去咗酒店行個圈影咗幾張相，個pool side無想像中咁靚，但都過得去，個沙灘就真係麻麻地，d水一d都唔清，望到都唔想行落去．．．

再去個小賣店買咗個泳鏡，積買咗條泳褲就去泳池游水喇！

有個外國人以為我地係去honeymoon，見我地喺度影相，主動幫我地合照！

"游"(我地兩個都唔識游水，所以用個游字其實唔太正確)咗個幾鐘，我地中途仲去咗個kids pool度玩，點知"sir"咗一次條滑梯，已經俾個職員叫番我地去大人池！哈哈，咁我地兩個都唔識游水丫ma！

玩完之後，沖好涼換好衫就行出去搵野食喇！沿路都有好多餐廳，間間都好有情調，但因為聽日係積正日生日，所以想聽日晏晝先食，今日都係想食夜市嗰d攤檔多d！行到去中段，終於都見到！